Yekile 18:1-24

  • “Babelɔn Kpole” ne azedɔlɛ (1-8)

    • “Bɛvi ye nu, me menli” (4)

  • Bɛzunle Babelɔn azedɔlɛ ne (9-19)

  • Anwuma fɛlɛkolilɛ wɔ Babelɔn azedɔlɛ nwo (20)

  • Bɛbavuandi Babelɔn bɛado nyevile nu kɛ bolɛ (21-24)

18  Ɛhye anzi menwunle anwumabɔvolɛ ko noko kɛ ɔvi anwuma ɔlɛdwu aze, ɔlɛ tumi kpole na ye anyunlunyia dale azɛlɛ ye azo.  Na ɔvale ɛnelɛ kpole ɔdeanle nu kɛ: “Yedɔ aze! Babelɔn Kpole ne ɛdɔ aze, na yerayɛ sunsum ɛtane ne mɔ tɛnlabelɛ nee ɛleka mɔɔ sunsum biala mɔɔ anwo ɛnde* nee aloma biala mɔɔ anwo ɛnde na ɔle bɛkyi la fea a!  Na yelua ye adwɔmane ɛbɛla* ɛya nza ne azo yenyia maanle maanle ne amuala, na azɛlɛ ye azo arelemgbunli nee ye bɔle adwɔmane, na azɛlɛ ye azo gualilɛma* luale ye anwonyia mɔɔ ɔnze nwolɛ nyiane la tumi zo nyianle bɛ nwo.”  Na mendele ɛnelɛ bieko vi anwuma kɛ: “Bɛvi ye nu, me menli, saa bɛngulo kɛ bɛnyia ye ɛtane ne anu kyɛfoa na bɛnyia ye ngyegyelɛ ne bie a.  Ɔluakɛ ye ɛtane ne anloa ɛboɔboa ɛhɔdwu anwuma, na Nyamenle ɛhakye ye amumuyɛ ne.*  Bɛva mɔɔ ɔvale ɔyɛle awie mɔ la bie bɛdua ye kakɛ, ɛhɛe, bɛva ye mɔnwo nwiɔ bɛdua ye kakɛ; kanrɛlɛ ne mɔɔ ɔfonlanle nu la, bɛfonla ye mɔnwo nwiɔ bɛmaa ye.  Kɛzi ɔwulale ɔ nwo anyunlunyia nee ye anwonyia mɔɔ yeanze nwolɛ nyiane mɔɔ ɔvale ɔyɛle ɔ nwo la, zɔhane ala a bɛmaa ɔnwu amaneɛ na ɔli nyane a. Ɔluakɛ ɔka ye wɔ ye ahonle nu kɛ: ‘Mede me ebia nu kɛ belemgbunli raalɛ, na menle kunlavolɛ, na menrɛli nyane ɛlɛ.’  Ɛhye ati a ye ngyegyelɛ bara kenle ko demua la, ewule nee nyane nee ɛhɔne, na bɛbava senle bayela ye bɔkɔɔ, ɔluakɛ Gyihova* Nyamenle mɔɔ buale ye ndɛne la anwo yɛ se.  “Na saa arelemgbunli mɔɔ wɔ azɛlɛ ye azo mɔɔ bɛ nee ye bɔle adwɔmane ɛbɛla* na bɛnyianle ye anwonyia ne mɔɔ ɔnze nwolɛ nyiane la bie la nwu ye ɛyelalɛ ne esike ne a, bɛbazu na bɛali ɔ nwo nyane. 10  Kɛmɔ bɛsulo ye amaneɛnwunlɛ ne la ati, bɛbagyinla moamoa bɛaha kɛ: ‘Gyakɔ, gyakɔ, wɔmɔ suakpole Babelɔn mɔɔ ɛyɛ se a, ɔluakɛ dɔnehwele ko anu ala a wɔ ndɛnebualɛ ɛra a!’ 11  “Gualilɛma mɔɔ bɛwɔ azɛlɛ ye azo la noko ɛlɛsu ali ɔ nwo nyane, ɔluakɛ awie ɛnle ɛkɛ mɔɔ ɔbadɔ bɛ ninyɛne ne bieko a, 12  ninyɛne mɔɔ le kɛ nvutuke, dwɛtɛ fufule, ezukoa awolɛ, avikpa, lenen kpalɛ, ɛdanlɛ kɔkɔlɛ, selekye, tɛladeɛ kɔkɔlɛ; nee debie biala mɔɔ bɛva baka mɔɔ bɔ evuanlɛ bɛyɛ; nee debie biala mɔɔ bɛva ɛzɛlɛ bɛyɛ, nee debie biala mɔɔ bɛva baka kpalɛ, kɔbele, bulalɛ nee bolɛ memeamemea bɛyɛ la; 13  akee ninyɛne evuanlɛ, Yindia sinzimile, ayilevuanlɛ, nwole evuanlɛ, ɛyɛlɛvuanlɛ, nwanye, ɔlivi nwole, esamo, hwiiti, nlankɛ, mboane, mgbɔnwɔ, ehwili, ngɛkɛlɛ, nee menli. 14  Ɛhɛe, ma kpalɛ ne mɔɔ ɛnee ɛkulo* la ɛbɔ wɔ, yɛɛ aleɛ kpalɛ nee ninyɛne mgbalɛ kɔsɔɔti ɛminli, ɛnrɛnyia bɛ bieko. 15  “Gualilɛma ne mɔɔ dɔnenle ninyɛne ɛhye mɔ mɔɔ bɛluale ɔ nwo zo bɛnyianle bɛ nwo la bagyinla moamoa ɔluakɛ bɛsulo ye amaneɛnwunlɛ ne la ati, na bɛbazu bɛali nyane, 16  na bɛaha kɛ: ‘Gyakɔ, gyakɔ, suakpole mɔɔ heda lenen kpalɛ, ɛdanlɛ kɔkɔlɛ na ɔwula tɛladeɛ kɔkɔlɛ na ɔfa nvutuke ninyɛne nee ezukoa awolɛ nee avikpa ɔsiezie ɔ nwo kɛnlɛma la, 17  ɔluakɛ dɔnehwele ko anu ala anwonyia kpole ɛhye ɛminli!’ “Na melikavolɛ biala nee awie biala mɔɔ dua nyevile zo tu adenle nee awie biala mɔɔ yɛ meli nu gyima nee bɛdabɛ mɔɔ bɛyɛ nyevile zo gyima la amuala gyinlanle moamoa 18  na mɔɔ bɛlɛnea esike ne mɔɔ vi ye ɛyelalɛ ne anu ɛlɛba la, bɛdeanle nu bɛhanle kɛ: ‘Sua boni a le kɛ suakpole ne a?’ 19  Bɛvale ndɛtɛlɛ bɛguale bɛ ti zo na bɛdeanle nu, bɛzunle na bɛlile nyane, na bɛhanle kɛ: ‘Gyakɔ, gyakɔ, suakpole mɔɔ nuhua a bɛdabɛ mɔɔ bɛfa meli bɛkɔ nyevile zo la kɔsɔɔti luale ye anwonyia zo nyianle bɛ nwo la, ɔluakɛ dɔnehwele ko anu ala, ye ninyɛne kɔsɔɔti ɛminli!’ 20  “O anwuma, di fɛlɛko wɔ mɔɔ ɛdo ye la anwo, bɛdabɛ nwuanzanwuanzama nee ɛzoanvolɛma nee ngapezoma noko, ɔluakɛ bɛdabɛ ti Nyamenle ɛbua ye ndɛne!” 21  Na anwumabɔvolɛ anwosesebɛ bie maanle bolɛ mɔɔ le kɛ ɛdibolɛ kpole bie la zo na ɔvuandinle ɔdole nyevile ne anu ɔhanle kɛ: “Kɛ bɛbavuandi Babelɔn suakpole ne ndɛndɛ bɛado ye lɔ la ɛne, na bɛnrɛnwu ye bieko. 22  Na bɛnrɛde edwɛndolɛma mɔɔ bɛbɔ sanwule nee bɛdabɛ mɔɔ bɛto edwɛne, nee bɛdabɛ mɔɔ bɛbɔ fulutu nee bɛdabɛ mɔɔ bɛbɔ aweɛne tendenle la ane bieko wɔ wɔ nu ɛlɛ. Na bɛnrɛnwu awie biala mɔɔ di adwinli la wɔ wɔ nu bieko, na bɛnrɛde ɛdibolɛ ne wɔ wɔ nu bieko. 23  Na kɛnlaneɛ wienyi biala ɛnrɛda wɔ wɔ nu bieko, na bɛnrɛde atɔfolɛ nrenyia nee atɔfolɛ ne wɔ wɔ nu bieko; ɔluakɛ ɛnee wɔ gualilɛma a le menli mgbole wɔ azɛlɛ ye azo a, na ɛluale wɔ sunsum ɛtane nyɛleɛ zo ɛbɛlɛbɛlale maanle maanle ne mɔ amuala. 24  Ɛhɛe, ye nuhua a bɛnwunle ngapezoma nee nwuanzanwuanzama nee bɛdabɛ mɔɔ bɛhunle bɛ wɔ azɛlɛ ye azo la amuala mogya a.”

Ɔ Bo Edwɛkɛ

Anzɛɛ ɔkola ɔkile, “ɛnwomenle; sunsum nu edwɛkɛ.”
Giliki, por·neiʹa. Nea Edwɛkɛbohilelɛ.
Anzɛɛ “gualilɛma mɔɔ bɛtu adenle.”
Anzɛɛ “ye ɛtane ne mɔ.”
Nea Edwɛkɛbohilelɛ.
Nea Edwɛkɛbohilelɛ.
Anzɛɛ “wɔ ɛkɛla kulo.”