Yekile 17:1-18

  • “Babelɔn Kpole” ne ndɛnebualɛ (1-18)

    • Tuutuunli kpole ne de nane kɔkɔlɛ zo (1-3)

    • Nane ne ‘ɛnee wɔ ɛkɛ, noko ɔnle ɛkɛ, na ɔbavi kuma kuloonwu nu yeavinde’ (8)

    • Mɛne bulu ne nee Boaneralɛ ne baho (12-14)

    • Mɛne bulu ne bakpɔ tuutuunli ne (16, 17)

17  Anwumabɔvolɛma nsuu ne mɔɔ dedɛ ahyɛnze nsuu ne la anu ko rale na ɔzele me kɛ: “Bɛla maa mengile wɔ tuutuunli kpole ne mɔɔ de nzule dɔɔnwo ne azo la ndɛnebualɛ ne,  azɛlɛ ye azo arelemgbunli nee ye ɛbɔ adwɔmane ɛbɛla,* na menli mɔɔ de azɛlɛ ye azo la ɛnlo ye adwɔmane ɛbɛla* nza ne ɛbo.”  Na ɔluale sunsum ne tumi zo ɔvale me ɔhɔle fienemgbole bie anu. Na menwunle raalɛ bie kɛ ɔde nane kɔkɔlɛ anwo ɛzulolɛ bie mɔɔ munzule aluma wɔ ɔ nwo amuala, ɔ ti le nsuu na ɔlɛ mɛne bulu la azo.  Raalɛ ne wula tɛladeɛ kɔkɔlɛ nee buluwu nee yɛlo mɔɔ ɛli afonla la, na yeva nvutuke nee ezukoa awolɛ nee avikpa yeziezie ɔ nwo, na ɔlɛ nvutuke kanrɛlɛ mɔɔ kyibadeɛ nee ye adwɔmane ɛbɛla* ninyɛne mɔɔ anwo ɛnde ɛyi ye tɛkɛɛ la wɔ ɔ sa nu.  Bɛhɛlɛ duma bie mɔɔ le fealeranu edwɛkɛ la wɔ ɔ nwoma azo kɛ: “Babelɔn Kpole, tuutuuma nee azɛlɛ ye azo kyibadeɛ bɛ nli.”  Na menwunle kɛ nwuanzanwuanzama mogya nee Gyisɛse alasevolɛ mogya ɛmaa raalɛ ne ɛbo. Mɔɔ menwunle ye la, ɔzinle me nwo kpole.  Ɔti anwumabɔvolɛ ne zele me kɛ: “Kɛmɔti a yezi ɛ nwo ɛ? Mebaha raalɛ ne nee nane ne mɔɔ ɔde ɔ nwo zo mɔɔ ɔ ti le nsuu na ɔlɛ mɛne bulu ne la anwo fealeranu edwɛkɛ meahile wɔ:  Nane ne mɔɔ ɛnwunle ye la, ɛnee wɔ ɛkɛ, noko ɔnle ɛkɛ, na ɔbavi kuma kuloonwu ne anu yeavinde, na yeahɔ ɛzɛkyelɛ nu. Na menli mɔɔ de azɛlɛ ye azo—bɛdabɛ mɔɔ bɛangɛlɛ bɛ aluma wɔ ngoane buluku ne anu ɔvi mekɛ mɔɔ bɛbɔle ewiade la—nwu kɛzi ɛnee nane ne wɔ ɛkɛ, noko ɔnle ɛkɛ, na ɔbara bieko la a, ɔbazi bɛ nwo.  “Ɛhye hyia adwenle nee nrɛlɛbɛ: Adile nsuu ne le awoka nsuu mɔɔ raalɛ ne de zolɛ a. 10  Na bɛle arelemgbunli nsuu: Nnu ɛdɔ aze, ko wɔ ɛkɛ, na ko ne mɔɔ ɛha la bɔ zo mɔɔ ɔbara a; noko saa ɔba a, ɔwɔ kɛ ɔtɛnla ɛkɛ ne mekɛ ekyi. 11  Na nane ne mɔɔ ɛnee wɔ ɛkɛ noko ɔnle ɛkɛ la, eza le belemgbunli mɔɔ tɔ zo mɔtwɛ, na ɔvi nsuu ne anu a ɔrale a, na ɔkɔ ɛzɛkyelɛ nu. 12  “Mɛne bulu ne mɔɔ ɛnwunle bɛ la le arelemgbunli bulu mɔɔ bɛtɛnyianle bɛ belemgbunlililɛ, noko bɛ nee nane ne banyia tumi kɛ arelemgbunli dɔnehwele ko. 13  Ɛhye mɔ lɛ adwenle ko, ɔti bɛfa bɛ tumi nee bɛ anwosesebɛ bɛmaa nane ne. 14  Bɛ nee Boaneralɛ ne baho, na kɛ mɔɔ ɔle awulae mɔ Awulae nee arelemgbunli Belemgbunli la ati, Boaneralɛ ne bali bɛ nwo zo konim. Bɛdabɛ mɔɔ bɛboka ɔ nwo mɔɔ bɛvɛlɛ bɛ na bɛkpa bɛ na bɛdi nɔhalɛ la noko bali konim.” 15  Ɔzele me kɛ: “Nzule ne mɔɔ ɛnwunle ye, ɛleka mɔɔ tuutuunli ne de la le mbusua nee menli dɔɔnwo nee maanle maanle nee aneɛ ngakyile. 16  Na mɛne bulu ne mɔɔ ɛnwunle bɛ nee nane ne la, ɛhye mɔ bakpɔ tuutuunli ne na bɛalie ɔ nwo ninyɛne bɛamaa yealɛ ɔ nwo zɔ, na bɛbali ye nwonane na bɛava senle bayela ye bɔkɔɔ. 17  Ɔluakɛ Nyamenle ɛva ɛwula bɛ ahonle nu kɛ bɛmaa ye nzuzulɛ ɛrɛla nu, ɛhɛe, kɛ bɛyɛ adwenle ko na bɛva bɛ belemgbunlililɛ ne bɛmaa nane ne, kɔkpula kɛ Nyamenle edwɛkɛ ne bara nu. 18  Na raalɛ ne mɔɔ ɛnwunle ye la a le suakpole ne mɔɔ di azɛlɛ ye azo arelemgbunli nwo zo tumi la.”

Ɔ Bo Edwɛkɛ

Nea Edwɛkɛbohilelɛ.
Giliki, por·neiʹa. Nea Edwɛkɛbohilelɛ.
Giliki, por·neiʹa. Nea Edwɛkɛbohilelɛ.