Wulomuma 7:1-25

  • Mɔɔ kile kɛ bɛlie yɛ bɛvi Mɛla ne abo la (1-6)

  • Mɛla ne maa ɛtane da ali (7-12)

  • Yɛ nee ɛtane ɛlɛko (13-25)

7  Mediema, asoo ɔbayɛ kɛ bɛnze kɛ (melɛtendɛ meahile bɛdabɛ mɔɔ bɛze mɛla la) mekɛ tendenle ala mɔɔ sonla de aze la, ɛnee ɔwɔ Mɛla ne abo ɔ?  Kɛ neazo la, raalɛ mɔɔ gya nrenyia la ahu de aze a, mɛla kyekye ye beta ɔ hu anwo; noko saa ɔ hu wu a, ɔ hu mɛla ɛnkyekye ye bieko.  Ɛhye ati, mekɛ mɔɔ ɔ hu de aze la saa ɔkɔ agyalɛ fofolɛ a, bɛbaha kɛ yɛzɛkye agyalɛ. Noko saa ɔ hu wu a, ɔnle ye mɛla bo bieko yemɔti saa ɔkɔ agyalɛ fofolɛ a, bɛnrɛha kɛ yezɛkye agyalɛ.  Ɔti me mediema, bɛdabɛ noko bɛluale Kelaese sonlabaka ne azo bɛwule bɛmaanle Mɛla ne, amaa bɛayɛ awie fofolɛ ɛdeɛ, ahenle mɔɔ bɛdwazole ye bɛvile mowuamra anu la, amaa yɛazo ma yɛamaa Nyamenle.  Ɔluakɛ mekɛ mɔɔ ɛnee yɛbɔ yɛ ɛbɛla kɛ mɔɔ nwonane ne kulo la, atiakunluwɔzo ɛtane ne mɔ mɔɔ Mɛla ne maanle bɛdwazole la yɛle gyima wɔ yɛ sonlabaka* ne mɔ anu, kɛ yɛzo ma mɔɔ kɔ ewule nu la.  Noko kɛkala bɛlie yɛ bɛvi Mɛla ne abo, ɔluakɛ yɛwu yɛmaa mɔɔ ɛnee kyekye yɛ la, amaa yɛalua sunsum ne azo yɛayɛ ngɛkɛlɛ wɔ adenle fofolɛ zo na tɛ adenle dɛba ne mɔɔ gyi mɛla ne mɔɔ bɛhɛlɛ la azo ɔ.  Ɛnee duzu a yɛha a? Mɛla ne le ɛtane ɔ? Kyɛkyɛ! Nɔhalɛ nu, saa tɛ Mɛla a anrɛɛ menze ɛtane. Kɛ neazo la, saa Mɛla ne anga kɛ: “Mmayɛ anyebolo” a, anrɛɛ menze anyebolo.  Ɛtane nyianle adenle luale mɛla ne azo vale anyebolo ngakyile muala wulale me nu, noko saa mɛla ɛnle ɛkɛ ne a, ɛtane ɛnlɛ tumi biala.  Nɔhalɛ nu, mɔɔ mɛla ɛtɛbale la, ɛnee mede ngoane nu. Noko mɛla rale la, ɛtane rale ngoane nu bieko, na menwule. 10  Na mɛla ne mɔɔ ɔwɔ kɛ kɔ ngoane nu la, menwunle kɛ ɔkɔ ewule nu. 11  Na ɛtane nyianle adenle luale mɛla ne azo bɛlɛbɛlale me na ɔluale zo ɔhunle me. 12  Yemɔti, Mɛla mumua ne le nwuanzanwuanza, yɛɛ mɛla edwɛkɛ ne le nwuanzanwuanza, ɔtenrɛ yɛɛ ɔle kpalɛ. 13  Yemɔti, debie kpalɛ hunle me ɔ? Kyɛkyɛ! Emomu, ɛtane a hunle me a, ɔluale debie kpalɛ zo ɔmaanle menyianle ewule amaa ɛtane ala ali, na ɛtane alua mɛla zo ala ali kpalɛ. 14  Na yɛze kɛ Mɛla ne le sunsum nu debie, noko mame, mele nwonane nu debie mɔɔ bɛdɔne me bɛmaa ɛtane a. 15  Na mɔɔ meyɛ la mende ɔ bo. Ɔluakɛ menyɛ mɔɔ mekulo la, emomu mɔɔ mekyi la a meyɛ a. 16  Noko, saa mɔɔ mengulo la a meyɛ a, ɛnee medie meto nu kɛ Mɛla ne le kpalɛ. 17  Noko kɛkala, tɛ medame a meyɛ ye bieko a, emomu ɛtane ne mɔɔ de me nu la ɔ. 18  Na meze kɛ wɔ me nu, kile kɛ, wɔ me nwonane nu, debie kpalɛ biala ɛnle nu; ɔluakɛ melɛ ɛhulolɛ kɛ mebayɛ mɔɔ le kpalɛ la noko mengola menyɛ. 19  Na kpalɛ ne mɔɔ mekulo la menyɛ, emomu ɛtane ne mɔɔ mengulo la a meyɛ a. 20  Yemɔti, saa mɔɔ mengulo la a meyɛ a, ɛnee tɛ medame a meyɛ ye bieko a, emomu ɛtane ne mɔɔ de me nu la ɔ. 21  Ɔti menwu mɛla ɛhye wɔ me nwo: Mekɛ mɔɔ mekulo kɛ meyɛ mɔɔ le kpalɛ la, ɛnee ɛtane ala a gyi me nye zo a. 22  Wɔ me nu ɛdeɛ, me nye die Nyamenle mɛla ne anwo kpalɛ, 23  noko menwu mɛla fofolɛ bie mɔɔ ko tia me adwenle mɛla ne la wɔ me sonlabaka* ne anu, na ɔmaa meyɛ akɛlɛ memaa ɛtane mɛla ne mɔɔ wɔ me sonlabaka ne anu la. 24  Me nwo yɛ anwunvɔne kpole! Nwane a kɛlie me kɛvi sonlabaka ɛhye mɔɔ ɛlɛkɔ ewule nu la anu a? 25  Melua yɛ Awulae Gyisɛse Kelaese anwo zo meyɛ Nyamenle mo! Ɛhye ati, mefa me adwenle meyɛ akɛlɛ memaa Nyamenle mɛla, na mefa me nwonane ne meyɛ akɛlɛ memaa ɛtane mɛla.

Ɔ Bo Edwɛkɛ

Giliki aneɛ nu, “nvɛyeba.”
Giliki aneɛ nu, “nvɛyeba.”