Wulomuma 5:1-21

  • Bɛlua Kelaese anwo zo bɛziezie yɛ nee Nyamenle avinli (1-11)

  • Ewule lua Adam anwo zo, ngoane lua Kelaese anwo zo (12-21)

    • Ɛtane nee ewule ɛha menli kɔsɔɔti (12)

    • Tenleneyɛlɛ ko (18)

5  Yemɔti, kɛkala mɔɔ bɛlua diedi zo bɛbu yɛ tenlenema la, bɛmaa yɛlua yɛ Awulae Gyisɛse Kelaese anwo zo yɛ nee Nyamenle ɛnyia anzodwolɛ,*  eza yɛlua ɔ nwo zo yɛva diedi yɛnyia ɛlolɛ ne mɔɔ kɛkala yɛwɔ nu la anwo adenle; bɛmaa yɛli fɛlɛko ɔluakɛ yɛlɛ anyelazo kɛ yɛbanyia Nyamenle anyunlunyia ne.  Tɛ yemɔ angome, bɛmaa yɛli fɛlɛko noko wɔ mekɛ mɔɔ yɛwɔ amaneɛnwunlɛ nu la, ɔluakɛ yɛze kɛ amaneɛnwunlɛ maa yɛnyia abotane;  abotane maa yɛnyia subane kpalɛ; subane kpalɛ maa yɛnyia anyelazo,  na anyelazo ne ɛnye yɛ rɛle ɛndo yɛ sa nu; ɔluakɛ bɛlua sunsum nwuanzanwuanza ne mɔɔ bɛva bɛmaa yɛ la azo bɛmaa Nyamenle ɛlɔlɛ ne ɛyi yɛ ahonle ne mɔ tetɛkɛɛ.  Nɔhalɛ nu, mekɛ mɔɔ yɛtɛde bɛtɛɛ la, Kelaese wule maanle ɛtanevolɛma wɔ ye mekɛ nloa.  Ɔluakɛ ɔyɛ se kɛ awie kɛwu kɛmaa tenlenenli ɛdeɛ; noko, bie a awie kɛhulo kɛ ɔkɛwu ɔkɛmaa sonlakpalɛ.  Noko Nyamenle ɛla ɔdaye mumua ne ye ɛlolɛ ne ali ɛhile yɛ, yemɔ a le kɛ, mekɛ mɔɔ ɛnee yɛtɛde ɛtanevolɛma la, Kelaese wule maanle yɛ.  Yemɔti, kɛmɔ bɛlua ye mogya ne azo bɛbu yɛ tenlenema la ati, bɛbalua ɔ nwo zo bɛalie yɛ bɛavi Nyamenle ɛya ne anu. 10  Na saa mekɛ mɔɔ yɛle agbɔvolɛ la bɛluale ɔ Ra ne ewule ne azo bɛzieziele yɛ nee Nyamenle avinli a, ɛnee mɔɔ tɛla ɛhye la, kɛkala mɔɔ bɛziezie yɛ avinli la bɛbalua ɔ nwo zo bɛalie yɛ ngoane. 11  Tɛ yemɔ angome, emomu yɛdua Awulae Gyisɛse Kelaese mɔɔ yɛlua ɔ nwo zo yɛziezie yɛ avinli la anwo zo yɛdi fɛlɛko noko wɔ Nyamenle anu. 12  Ɛhye ati, kɛ mɔɔ ɔlua sonla ko anwo zo ɛtane rale ewiade na ewule luale ɛtane nwo zo rale la, yɛɛ ewule dɛlɛle hanle menli kɔsɔɔti a, ɔluakɛ bɛ muala bɛyɛ ɛtane—. 13  Ɛnee ɛtane wɔ ewiade kolaa na Mɛla ne ara, noko bɛmbɔ awie biala somolɛ kɛ yeyɛ ɛtane wɔ mekɛ mɔɔ mɛla ɛnle ɛkɛ la. 14  Noko, ewule lile belemgbunli ɔvi Adam anwo zo too ɔradwule Mosisi anwo zo, bɔbɔ bɛdabɛ mɔɔ bɛanyɛ ɛtane kɛ Adam mɔɔ le ahenle mɔɔ ɔwɔ kɛ ɔba la sɔhovolɛ yɛle la. 15  Na ahyɛlɛdeɛ ne ɛnle kɛ ɛtane ne la. Noko saa ɔlua sonla ko ɛtane ti menli dɔɔnwo wule a, ɛnee nea kɛzi Nyamenle ɛlolɛ ne nee ye ahyɛlɛdeɛ ne mɔɔ ɔdua sonla ko mɔɔ le Gyisɛse Kelaese ɛlolɛ ne azo ɔfa ɔmaa mgbane la bayɛ kpole a!* 16  Bieko, ahyɛlɛdeɛ ne mɔɔ ɔfa ɔmaa mgbane la ɛnle kɛ ɛtane ne mɔɔ sonla ko ne yɛle la. Ɔluakɛ ɛtane ko ne mɔɔ bɛyɛle la vale fɔlɛbualɛ rale, noko ahyɛlɛdeɛ ne bamaa bɛabua menli dɔɔnwo mɔɔ bɛyɛ ɛtane la benle. 17  Na saa ɔlua sonla ko ne ɛtane ti ewule luale ɔ nwo zo lile belemgbunli a, ɛnee nea kɛzi bɛdabɛ mɔɔ bɛnyia ɛlolɛ ne dɔɔnwo nee tenleneyɛlɛ ahyɛlɛdeɛ ne mɔɔ bɛfa bɛmaa mgbane la balua sonla ko ne, Gyisɛse Kelaese anwo zo adɛnla ngoane nu na bɛayɛ arelemgbunli a! 18  Zɔhane ati, kɛ mɔɔ ɛtane ko maanle bɛbuale menli kɔsɔɔti fɔlɛ la, zɔhane ala a bɛbalua tenleneyɛlɛ ko azo bɛabua menli kɔsɔɔti benle na bɛanyia ngoane a. 19  Na kɛ mɔɔ sonla ko anzosesebɛ maanle menli dɔɔnwo yɛle ɛtanevolɛma la, zɔhane ala noko a sonla ko tieyɛ bamaa menli dɔɔnwo ayɛ tenlenema a. 20  Mɛla rale amaa ɛtane dɔɔnwo ala ali. Noko, ɛleka mɔɔ ɛtane yɛle dɔɔnwo la, ɛlolɛ yɛle dɔɔnwo bole zolɛ. 21  Duzu ati ɔ? Amaa kɛ mɔɔ ɛtane nee ewule lile belemgbunli la, ɛlolɛ noko alua tenleneyɛlɛ zo ali belemgbunli, na yealua yɛ Awulae Gyisɛse Kelaese anwo zo yeahɔwie dahuu ngoane nu.

Ɔ Bo Edwɛkɛ

Anzɛɛ ɔkola ɔkile, “yɛlɛ anzodwolɛ.”
Anzɛɛ “bɛabu zo a.”