Wulomuma 15:1-33

  • Bɛlie bɛ nwo ngoko kɛ mɔɔ Kelaese yɛle la (1-13)

  • Pɔɔlo, maanle maanle ne sonvolɛ (14-21)

  • Pɔɔlo adendulɛ nwo ngyehyɛleɛ (22-33)

15  Noko ɔwɔ kɛ yɛdayɛ mɔɔ yɛ diedi nu yɛ se la, boa bɛdabɛ mɔɔ bɛ diedi nu ɛnyɛ se la, na ɔnle kɛ yɛsɔ yɛdayɛ mumua ne yɛ nye.  Bɛmaa yɛ nuhua ko biala ɛzɔ ɔ gɔnwo anye wɔ ye boɛlilɛ ti, ɛva ɛmaa ye anwosesebɛ.  Ɔluakɛ Kelaese bɔbɔ anzɔ ɔdaye mumua ne ɔ nye, emomu bɛhɛlɛ kɛ: “Aholoba mɔɔ menli bɔ wɔ la ɛragua me nwo zo.”  Na debie biala mɔɔ bɛhɛlɛ bɛdo ɛkɛ la, bɛhɛlɛ bɛmaa yɛ ɛhilehilelɛ, amaa yɛalua yɛ abotane nee Ngɛlɛlera ne anu arɛlekyekyelɛ zo yɛanyia anyelazo.  Na Nyamenle ne mɔɔ maa abotane nee arɛlekyekyelɛ la ɛmaa bɛ kɔsɔɔti bɛnyia adwenle ko ne ala mɔɔ ɛnee Kelaese lɛ la bie,  amaa bɛayɛ ko na bɛava ɛnelɛ* ko bɛawula Nyamenle mɔɔ le yɛ Awulae Gyisɛse Kelaese ɔ Ze ne la anyunlunyia.  Ɔti bɛlie bɛ nwo ngoko kɛ mɔɔ Kelaese noko liele bɛ la, amaa yeawula Nyamenle anyunlunyia.  Na meka meahile bɛ kɛ Kelaese rayɛle sonvolɛ maanle bɛdabɛ mɔɔ bɛpɛle bɛ mrenyia zo la, ɔvale ɔhilele kɛ Nyamenle ka nɔhalɛ dahuu, na ɔmaanle ɔlale ali kɛ ɛwɔkɛ mɔɔ Nyamenle bɔle bɛ nlenyia mɔ la le nɔhalɛ,  na maanle maanle ne awula Nyamenle anyunlunyia wɔ ye anwunvɔnezelɛ nwo. Bɛhɛlɛ kɛ: “Zɔhane ati mebahanvo wɔ wɔ maanle maanle ne anu na meado edwɛne meayeyɛ wɔ duma ne.” 10  Bieko, ɔse: “Maanle maanle, bɛ nee ye menli ne ɛli fɛlɛko.” 11  Eza ɔse: “Bɛye Gyihova* ayɛlɛ, maanle maanle kɔsɔɔti, na bɛmaa menli kɔsɔɔti ɛye ye ayɛlɛ.” 12  Ayezaya noko se: “Gyɛsi ndinli ne bara, yemɔ a ɔbali maanle maanle ne anwo zo a; maanle maanle ne bava bɛ nwo ado ɔ nwo zo.” 13  Nyamenle mɔɔ maa anyelazo la ɛmaa anyelielɛ nee anzodwolɛ ɛyi bɛ tɛkɛɛ, kɛmɔ bɛva bɛ rɛle bɛwula ye nu la ati, amaa ɔlua sunsum nwuanzanwuanza ne tumi zo bɛ anyelazo ayɛ kpole.* 14  Me mediema, medame mumua ne medie bɛ medi kɛ kpalɛyɛlɛ ɛyi bɛdabɛ noko tɛkɛɛ kɛ mɔɔ ndelebɛbo muala ɛyi bɛ tɛkɛɛ la, na bɛkola bɛtu bɛ nwo folɛ* ngoko. 15  Noko, mehɛlɛ ninyɛne bie mɔ wienyi merɛlɛ bɛ kɛ mefa meahakye bɛ bieko, ɔlua Nyamenle ɛlolɛ ne mɔɔ yeva yemaa me 16  kɛ menyɛ sonvolɛ memaa Kelaese Gyisɛse wɔ maanle maanle ne anu la ati. Melɛyɛ Nyamenle edwɛkpa ne anwo gyima nwuanzanwuanza ne, amaa maanle maanle ɛhye mɔ ayɛ afɔlebɔlɛ mɔɔ fɛta na bɛva sunsum nwuanzanwuanza ne bɛde nwo la. 17  Ɔti me nye die ɔluakɛ mele Kelaese Gyisɛse ɛdoavolɛ yɛɛ melɛyɛ Nyamenle gyima. 18  Na menrɛha edwɛkɛ ngakyile biala kyesɛ mɔɔ Kelaese ɛlua me nwo zo ɛyɛ la ala amaa maanle maanle ne ayɛ tieyɛ, ɔlua me edwɛkɛhanlɛ nee me gyima zo, 19  ɔlua sɛkɛlɛneɛ nee nwanwane gyima tumi zo, nee Nyamenle sunsum ne tumi ne azo, yemɔti meli Kelaese edwɛkpa ne anwo daselɛ bɔkɔɔ ɔvi Gyɛlusalɛm badwu Yelelekɛm. 20  Na wɔ adenle ɛhye azo, menvale menziele me nye zo kɛ menrɛha edwɛkpa ne wɔ ɛleka mɔɔ bɛde Kelaese duma ne dɛba la, amaa meangɔnzɔ mɔɔ awie gyɛne ɛbɔ ɔ bo la azo; 21  noko bɛhɛlɛ kɛ: “Bɛdabɛ mɔɔ bɛanga ɔ nwo edwɛkɛ bɛangile bɛ la banwu ye, na bɛdabɛ mɔɔ bɛtɛtele la bade ɔ bo.” 22  Ɛhye noko ati a fane dɔɔnwo ne ala meannyia adenle meamba bɛ nwo nehane la. 23  Noko kɛkala, menlɛ azɛlɛsinli bieko wɔ maanzinli ɛhye mɔ anu mɔɔ metɛyɛle nuhua gyima a, na ɛvolɛ dɔɔnwo* mɔɔ ɛraze la mengulole kɛ mekɛra bɛ nwo lɔ. 24  Yemɔti, me nye la kɛ saa melɛkɔ Sepeen a mebanwu bɛ, amaa medi mekɛ ekyi wɔ bɛ nwo ɛkɛ a bɛahɔzɔho me ekyii. 25  Noko kɛkala ɛdeɛ, melɛtu adenle meahɔ Gyɛlusalɛm meahɔboa nwuanzanwuanzama ne. 26  Ɔluakɛ bɛdabɛ mɔɔ bɛwɔ Masidonea nee Akaya la anye ɛlie nwo kɛ bɛkɛva ndoboa bɛkɛmaa ehyiavolɛma mɔɔ wɔ nwuanzanwuanzama ne anu wɔ Gyɛlusalɛm la. 27  Ɔyɛ bɛ fɛ kɛ bɛyɛ zɔ la ɛdeɛ, noko nɔhalɛ nu, ɛnee bɛtua bɛ kakɛ; ɔluakɛ saa maanle maanle ne anu amra ɛnyia bɛ sunsum nu ninyɛne ne bie a, ɛnee ɔwɔ kɛ bɛdabɛ noko bɛfa bɛ nwonane afoa nu ninyɛne bɛboa bɛ. 28  Yemɔti saa mefa ndoboa* ne memaa bɛ mewie na melɛse meahɔ Sepeen a, mebava bɛ nwo ɛkɛ ne mearakpɔla bɛ. 29  Bieko, meze kɛ saa meba bɛ nwo lɔ a, mebava Kelaese anu nyilalɛ dɔɔnwo mearɛlɛ bɛ. 30  Mediema, akee mesɛlɛ bɛ, ɔlua yɛ Awulae Gyisɛse Kelaese nee sunsum ne ɛlɔlɛ zo, bɛzɛlɛ Nyamenle ɛsesebɛ bɛmaa me, kɛ mɔɔ meyɛ la, 31  amaa bɛalie me bɛavi bɛdabɛ mɔɔ bɛnle diedima mɔɔ bɛwɔ Dwudiya la asa nu, na me ɛzonlenlɛ gyima ne mɔɔ mekayɛ ye wɔ Gyɛlusalɛm la, nwuanzanwuanzama ne anye alie nwo, 32  amaa ɔyɛ Nyamenle ɛhulolɛdeɛ a, meava anyelielɛ meara bɛ nwo lɔ, na yɛ muala yɛ nye alie. 33  Nyamenle mɔɔ maa anzodwolɛ la nee bɛ muala ɛdɛnla. Amen.

Ɔ Bo Edwɛkɛ

Giliki aneɛ nu, “ɛnloanlɛ.”
Nea Edwɛkɛbohilelɛ.
Anzɛɛ “ayɛ molozo.”
Anzɛɛ “bɛkilehile bɛ nwo.”
Anzɛɛ ɔkola ɔkile, “ɛvolɛ bie mɔ.”
Giliki aneɛ nu, “ma.”