Wulomuma 14:1-23

  • Bɛmmabua bɛ nwo ndɛne (1-12)

  • Bɛmmamaa awie mɔ tɔ aze (13-18)

  • Bɛkpondɛ anzodwolɛ nee koyɛlɛ (19-23)

14  Bɛlie mɔɔ ye diedi nu ɛnyɛ se la, na bɛmmabua ye ndɛne wɔ ye nzuzulɛ nwo.  Bie diedi maa ɔdi debie biala, na mɔɔ ye diedi nu ɛnyɛ se la di nya nya ala.  Mɔɔ di la mmakpo mɔɔ ɛnli la, na mɔɔ ɛnli la mmabua mɔɔ di la ndɛne, ɔluakɛ Nyamenle ɛlie ye ɛdo nu.  Ɛdawɔ a le nwane mɔɔ ɛbua awie sonvolɛ ndɛne a? Ɔdaye mumua ne ɔ menle a bahile kɛ ɔbagyinla anzɛɛ ɔbadɔ aze a. Nɔhalɛ nu, bɛbamaa yeagyinla, ɔluakɛ Gyihova* kola maa ɔgyinla.  Bie bu kenle ne bie kɛ ɔhyia ɔtɛla mɔɔ ɛha la; bie noko bu kenle ne amuala kɛ bɛsɛ; bɛmaa awie biala adwenle ɛzi pi.  Mɔɔ di kenle bie la di maa Gyihova.* Mɔɔ di debie la noko di maa Gyihova,* ɔluakɛ ɔyɛ Nyamenle mo; na mɔɔ ɛnli debie la ɛnli ɛmmaa Gyihova* noko ɔyɛ Nyamenle mo.  Nɔhalɛ nu, yɛ nuhua ko biala ɛnde aze ɛmmaa ɔ nwo, yɛɛ awie biala ɛnwu ɛmmaa ɔ nwo.  Na saa yɛde aze a, yɛde yɛmaa Gyihova,* yɛɛ saa yɛwu a, yɛwu yɛmaa Gyihova.* Yemɔti saa yɛde aze o, yɛwu o, yɛle Gyihova* ɛdeɛ.  Na ɛhye ati a Kelaese wule na ɔrale ngoane nu bieko a, amaa yeayɛ mowuamra nee teasema Awulae. 10  Na duzu ati a ɛbua ɛ diema ndɛne a? Anzɛɛ ɛdawɔ noko duzu ati a ɛmbu ɛ diema ɛ? Na yɛ muala yɛbagyinla Nyamenle ndɛnebualɛ ebia ne anyunlu. 11  Ɔluakɛ bɛhɛlɛ kɛ: “‘Mekɛ ala mɔɔ mede aze la,’ Gyihova* a se a, ‘awie biala bahoto me, yɛɛ menli kɔsɔɔti bayeyɛ me kɛ mele Nyamenle.’” 12  Zɔhane ati yɛ nuhua ko biala babu ye mgbonda ahile Nyamenle. 13  Yemɔti bɛmmamaa yɛbua yɛ nwo ndɛne bieko, emomu bɛmaa yɛbɔ kpɔkɛ kɛ yɛnrɛva azedolɛ bolɛ anzɛɛ adenzilɛ debie yɛnrɛdo adiema bie anyunlu. 14  Meze yɛɛ medie medi wɔ Awulae Gyisɛse anu kɛ debie biala ɛnle ɛkɛ mɔɔ nwolɛ ɛnde a; saa awie bu debie kɛ nwolɛ ɛnde a, ɛnee nwolɛ ɛnde ɛmmaa ye. 15  Na saa aleɛ maa ɛ diema di nyane a, ɛnee ɛnlɛ ɛlɔlɛ. Mmafa aleɛ ɛsɛkye mɔɔ Kelaese wule maanle ye la. 16  Yemɔti bɛmmamaa bɛka kpalɛ mɔɔ bɛyɛ la anwo edwɛkɛ ɛtane. 17  Na Nyamenle Belemgbunlililɛ ne ɛnle nlidi nlidi nee nono nono, emomu ɔle tenleneyɛlɛ nee anzodwolɛ nee anyelielɛ mɔɔ lua sunsum nwuanzanwuanza ne azo a. 18  Na awie biala mɔɔ sonle Kelaese wɔ adenle ɛhye azo la sɔ Nyamenle anye na menli noko die ye to nu. 19  Ɔti bɛmaa yɛkpondɛ ninyɛne mɔɔ fa anzodwolɛ ba nee ninyɛne mɔɔ boa maa yɛmaa yɛ nwo ngoko anwosesebɛ la. 20  Bɛgyakyi kɛ aleɛ ti bɛkɛzɛkye Nyamenle gyima. Ɔle nɔhalɛ kɛ debie biala anwo te, noko ɔle ɛtane kɛ ɛkɛli debie mɔɔ kɛmaa awie kɛdɔ aze la. 21  Ɔle kpalɛ kɛ ɛnrɛli nane anzɛɛ ɛnrɛnlo nza anzɛɛ ɛnrɛyɛ debie biala mɔɔ kɛmaa ɛ diema kɛdɔ aze la. 22  Diedi ne mɔɔ ɛlɛ la, maa ɔha ɛdawɔ nee Nyamenle avinli. Anyelielɛ a le sonla ne mɔɔ ɔmmaa ninyɛne mɔɔ ɔkɛbɔ nwolɛ kpɔkɛ la ɛmbua ye ndɛne la. 23  Noko saa ye adwenle nu yɛ ye kesee na ɔdi a ɛnee yebua ɔ nwo fɔlɛ dɛbadɛba, ɔluakɛ ɔnlua diedi zo ɔnli. Nɔhalɛ nu, debie biala mɔɔ ɛngyi diedi zo la le ɛtane.

Ɔ Bo Edwɛkɛ

Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.