Mateyu 18:1-35

  • Mɔɔ le kpole kpalɛ wɔ Belemgbunlililɛ ne anu (1-6)

  • Azedolɛ bolɛ (7-11)

  • Boane ne mɔɔ minlinle la anwo ndonwo ne (12-14)

  • Kɛzi bɛnyia adiema la (15-20)

  • Akɛlɛ amumuyɛ ne anwo ndonwo ne (21-35

18  Mekɛ ne anu, ɛdoavolɛma ne rale Gyisɛse anwo ɛkɛ na bɛbizale ye kɛ: “Nwane a le kpole kpalɛ wɔ anwuma Belemgbunlililɛ ne anu a?”  Yemɔti ɔvɛlɛle kakula ekyi bie ɔmaanle ɔragyinlanle bɛ avinli  na ɔhanle kɛ: “Nɔhalɛ nu meka meahile bɛ, kyesɛ bɛkakyi na bɛyɛ kɛ ngakula la, anrɛɛ bɛnrɛhɔ anwuma Belemgbunlililɛ ne anu ɛlɛ.  Yemɔti, awie biala mɔɔ ɔbabɛlɛ ɔ nwo aze kɛ kakula ekyi ɛhye la, yemɔ a ɔle kpole kpalɛ wɔ anwuma Belemgbunlililɛ ne anu a;  na awie biala mɔɔ kɛlie kakula ekyi zɛhae ko wɔ me duma nu la, ɛlie medame noko.  Noko awie ko biala mɔɔ kɛmaa ngakula ɛhye mɔ mɔɔ die me di la anu ko kɛgyakyi ye diedi nu la, ɔle kpalɛ kɛ anrɛɛ bɛkɛva ɛdibolɛ mɔɔ asoaso twe la bɛkɛhenda ɔ kɔme na bɛkɛhɔdo ye nyevile kunlu.  “Ewiade ne gyakɔ ɔlua azedolɛ bolɛ ti! Nɔhalɛ nu, kɛ ɔkɛyɛ biala la azedolɛ bolɛ bara, noko sonla mɔɔ azedolɛ bolɛ kɛlua ɔ nwo zo kɛra la, ye gyakɔ!  Yemɔti saa ɛ sa anzɛɛ ɛ gyakɛ a ɛlɛmaa wɔayɛ ɛtane a, pɛ ye to ye lɔ. Ɔle kpalɛ kɛ ɛkɛyɛ wuliravolɛ anzɛɛ ɛ gyakɛ kɛha ko na ɛkɛhɔ ngoane nu tɛla kɛ ɛkɛva ɛ sa nwiɔ anzɛɛ ɛ gyakɛ nwiɔ ɛkɛhɔ senle ne mɔɔ ɛnnu ɛlɛ la anu.  Bieko, saa ɛ nye a ɛlɛmaa wɔayɛ ɛtane a, tu ye to ye lɔ. Ɔle kpalɛ kɛ ɛ nye ko na ɛkɛhɔ ngoane nu tɛla kɛ ɛ nye nwiɔ na bɛkɛdo wɔ Gehenna* senle nu. 10  Bɛnlea na bɛambu ngakula ɛhye mɔ anu ko kɛ ɔle mgbane, ɔluakɛ meka meahile bɛ kɛ bɛ anwumabɔvolɛma mɔɔ wɔ anwuma la nwu me Ze mɔɔ wɔ anwuma la anyunlu dahuu. 11  —— 12  “Kɛzi bɛdwenle nwo ɛ? Saa awie lɛ mboane 100 na nuhua ko minli a, asoo ɔnrɛgyakyi 99 ne wɔ awoka ne mɔ azo na ɔnrɛhɔkpondɛ mɔɔ ɛminli la ɔ? 13  Na saa ɔnwu ye a, meka meahile bɛ kɛ, ɔdi fɛlɛko kpole wɔ nwo ɔtɛla 99 ne mɔɔ bɛamminli la. 14  Zɔhane ala noko a me* Ze mɔɔ wɔ anwuma la anye ɛnlie nwo kɛ ngakula ɛhye mɔ anu ko bɔbɔ kɛminli a. 15  “Bieko, saa ɛ diema yɛ wɔ ɛtane a, kɔ na ɛ nee ye bɛ mu nwiɔ ala bɛhɔha na maa ɔnwu ye nvonleɛ ne.* Saa ɔtie wɔ a, wɔnyia ɛ diema. 16  Noko saa yeandie wɔ a, fa sonla ko anzɛɛ menli nwiɔ boka ɛ nwo, amaa edwɛkɛ biala agyinla alasevolɛ nwiɔ anzɛɛ nsa daselɛlilɛ zo. 17  Saa yeandie bɛ a, ka kile asafo ne. Saa yeandie asafo ne noko a, bu ye kɛ ɔle maanle maanle ne anu sonla nee adwuledievolɛ. 18  “Nɔhalɛ nu meka meahile bɛ kɛ, debie biala mɔɔ bɛkɛkyekye ye wɔ azɛlɛ ye azo la ɛnee bɛkyekye ye wɔ anwuma, yɛɛ debie biala mɔɔ bɛkɛtulu ye wɔ azɛlɛ ye azo la ɛnee bɛtulu ye wɔ anwuma. 19  Nɔhalɛ nu, eza meka meahile bɛ, saa bɛ nuhua nwiɔ kponle zo wɔ azɛlɛ ye azo kɛ bɛbabiza debie mɔɔ anwo hyia la a, me Ze mɔɔ wɔ anwuma la kɛyɛ kɛmaa bɛ. 20  Na ɛleka mɔɔ menli nwiɔ anzɛɛ nsa kɛyia nu wɔ me duma nu la, ɛnee mewɔ bɛ avinli.” 21  Akee Pita rabizale ye kɛ: “Awulae, fane nyɛ a me diema fo me a menva mengyɛ ye a? Ɔhɔdwu fane nsuu ɔ?” 22  Gyisɛse buale ye kɛ: “Meka meahile wɔ kɛ, tɛ fane nsuu, emomu, ɔhɔdwu fane 77. 23  “Ɛhye ati a anwuma Belemgbunlililɛ ne le kɛ belemgbunli bie mɔɔ ɛnee kpondɛ kɛ ɔ nee ye ngɛkɛlɛ bu mgbonda la. 24  Mekɛ mɔɔ bɛhɔle mgbondabulɛ ne azo la, bɛvale nrenyia bie mɔɔ tua ye talɛnte* 10,000 la bɛrale. 25  Noko kɛmɔ ɔnlɛ mɔɔ ɔfa yeadua kakɛ ne la ati, ɔ menle ne hanle kɛ bɛdɔne ye nee ɔ ye nee ɔ mra nee ninyɛne mɔɔ ɔlɛ la kɔsɔɔti bɛva bɛdua kakɛ ne. 26  Yemɔti akɛlɛ ne hotole na ɔzele ye kɛ, ‘Nyia me nwo abotane na mebadua meamaa wɔ.’ 27  Alɔbɔlɛ hanle akɛlɛ ne amenle, ɔgyakyile ye ɔmaanle ɔhɔle na ɔvale ye kakɛ ne ɔhyɛle ye. 28  Noko mɔɔ akɛlɛ zɔhane vindele la, ɔnwunle ɔ gɔnwo akɛlɛ ko mɔɔ tua ye kakɛ denale 100* la, ɔzɔle ye na ɔmianle ɔ kɔmenzia, ɔhanle kɛ, ‘Tua kakɛ mɔɔ ɛtua me la amuala.’ 29  Yemɔti ɔ gɔnwo akɛlɛ ne dule dɔle ɔ gyakɛ anu na ɔzɛlɛle ye kɛ, ‘Nyia me nwo abotane na mebadua meamaa wɔ.’ 30  Noko yeamkponle, ɔvale ye ɔhɔdole efiade kɔkpula kɛ ɔkɛdua kakɛ ne. 31  Mekɛ mɔɔ ɔ gɔnwo ngɛkɛlɛ ne mɔ nwunle mɔɔ ɛzi la, nyane kpole hanle bɛ, na bɛhɔhanle mɔɔ ɛzi la amuala bɛhilele bɛ menle ne. 32  Akee ɔ menle ne vɛlɛle ye na ɔzele ye kɛ: ‘Akɛlɛ amumuyɛ, mekɛ mɔɔ ɛbodole me la, menvale wɔ kakɛ ne amuala mengyɛle wɔ. 33  Asoo anrɛɛ ɔnle kɛ ɛse ɛ gɔnwo akɛlɛ ne anwunvɔne kɛ mɔɔ menzele wɔ anwunvɔne la ɔ?’ 34  Akee ɔ menle ne vale ɛya, ɔmaanle efiade sinzavolɛma hɔdole ye efiade kɔkpula kɛ ɔkɛdua ye kakɛ ne amuala la. 35  Saa bɛ nuhua ko biala anvi ye ahonle nu anva ɔ diema ɛtane angyɛ ye a, zɔhane ala a me Ze mɔɔ wɔ anwuma la noko bayɛ bɛ a.”

Ɔ Bo Edwɛkɛ

Nea Edwɛkɛbohilelɛ.
Anzɛɛ ɔkola ɔkile, “bɛ.”
Giliki aneɛ nu, “na twi ɔ nyunlu.”
Dwɛtɛ fufule talɛnte 10,000 le denale 60,000,000. Denale ko le gyimayɛvo kenle ko ahatualɛ.
Denale ko le gyimayɛvo kenle ko ahatualɛ.