Maake 12:1-44

  • Ɛyazonlɛma amumuyɛ ne anwo ndonwo ne (1-12)

  • Nyamenle nee Siza (13-17)

  • Ewudwazo nwo kpuya (18-27)

  • Mɛla mgbole nwiɔ ne (28-34)

  • Asoo Kelaese ne le Devidi ara? (35-37a)

  • Mɛla kilehilevolɛma ne anwo kɔkɔbɔlɛ (37b-40)

  • Kunlavolɛ raalɛ ehyianli ngapɛlɛ nwiɔ ne (41-44)

12  Akee ɔbɔle ɔ bo ɔvale ndonwo ɔdendɛle ɔhilele bɛ kɛ: “Nrenyia bie yɛle vanye egyinli na ɔliele nwolɛ bane na ɔdule kuma mɔɔ bɛbahwihwi vanye ma ne nu la wɔ nu na ɔzile tawa; akee ɔvale ɔwulale ɛyazonlɛma asa nu na ɔdule adenle.  Mɔɔ ma ɛdelɛ mekɛ ne dwule la, ɔzoanle ye akɛlɛ bie kɛ ɔhɔ ɛyazonlɛma ne ɛkɛ ɔhɔlie vanye egyinli ne anu ma ne bie ɔrɛlɛ ye.  Noko bɛhyele ye, bɛbole ye, na bɛmaanle ɔvale ɔ sa mgbane ɔhɔle.  Na ɔzoanle akɛlɛ bieko wɔ bɛ nwo ɛkɛ, na ɔdaye noko bɛvale debie bɛbɔle ɔ ti zo na bɛguale ɔ nyunlu aze.  Na ɔzoanle bieko, na yemɔ bɛhunle ye, nee gyɛne dɔɔnwo noko, bɛbole bie mɔ yɛɛ bɛhunle bie mɔ.  Ɛnee yeha sonla ko, ɔ ra mɔɔ ɔkulo ye. Nzinlii, ɔzoanle ye wɔ bɛ nwo lɔ na ɔhanle kɛ, ‘Bɛbaze me ra ne nyiane.’  Noko ɛyazonlɛma ne hanle hilele bɛ nwo ngoko kɛ, ‘Koliagya ne ɛne. Bɛrɛla, bɛmaa yɛhu ye, na agyapadeɛ ne ɛrayɛ yɛ ɛdeɛ.’  Yemɔti bɛhyele ye bɛhunle ye na bɛvuandinle ye bɛdole vanye egyinli ne anzi.  Duzu a vanye egyinli menle ne bayɛ a? Ɔbarahu ɛyazonlɛma ne na yeava vanye egyinli ne yeamaa menli fofolɛ. 10  Asoo bɛtɛkengale ngɛlɛlera ɛhye ɛlɛ: ‘Bolɛ ne mɔɔ suasivoma ne kpole la, ɛrayɛ bolɛ mɔɔ anwo hyia kpole kpalɛ. 11  Ɛhye vi Gyihova,* na ɔyɛ nwanwane wɔ yɛ nye zo ɔ’?” 12  Na ɛnee bɛkpondɛ kɛ bɛkye ye, ɔluakɛ bɛnwunle kɛ bɛdabɛ ti a ɔyɛle ndonwo ne a, noko bɛzulole menli ne. Yemɔti bɛgyakyile ye ɛkɛ na bɛhɔle. 13  Akee bɛzoanle Falasiima nee Hɛlɔdo eku ne anu amra bie mɔ wɔ ɔ nwo ɛkɛ amaa bɛalua ye ɛdendɛlɛ zo bɛahye ye. 14  Mɔɔ bɛrale la, bɛzele ye kɛ: “Kilehilevolɛ, yɛze kɛ ɛka nɔhalɛ yɛɛ ɛmkpondɛ awie biala anyunlu ɛlolɛ, ɔluakɛ ɛnnea sonla nyunlu, na ɛkilehile Nyamenle adenle ne wɔ nɔhalɛ nu. Asoo mɛla maa adenle* kɛ bɛdua adwule bɛmaa Siza anzɛɛ ɔmmaa adenle? 15  Ɔwɔ kɛ yɛtua anzɛɛ ɔnle kɛ yɛtua?” Mɔɔ ɔnwunle bɛ nabalaba ne la, ɔzele bɛ kɛ: “Duzu ati a bɛlɛsɔ me bɛanlea ɛ? Bɛva denale ne bie bɛrɛla bɛmaa menea.” 16  Bɛvale ko bɛrale, na ɔzele bɛ kɛ: “Nwane nvoninli nee ye ngɛlɛlera a le ɛhye?” Bɛzele ye kɛ: “Siza ɔ.” 17  Akee Gyisɛse hanle kɛ: “Bɛva Siza ɛdeɛ bɛmaa Siza, na bɛva Nyamenle ɛdeɛ bɛmaa Nyamenle.” Na ɔ nwo yɛle bɛ azibɛnwo. 18  Akee Sadusiima mɔɔ bɛka kɛ ewudwazo ɛnle ɛkɛ ne la rabizale ye kɛ: 19  “Kilehilevolɛ, Mosisi hɛlɛle maanle yɛ kɛ saa awie adiema nrenyia wu gyakyi ɔ ye na ɔnlɛ ralɛ a, ɔwɔ kɛ ɔ diema nrenyia gya ɔ ye ne na ɔ nee ye wo mralɛ maa ɔ diema ne. 20  Ɛnee mediema mrenyia nsuu bie wɔ ɛkɛ. Mɔɔ limoa la gyale raalɛ, noko ɔ nee ye anwo na yeawu. 21  Na mɔɔ tɔ zo nwiɔ la gyale raalɛ ne, na ɔdaye noko ɔ nee ye anwo na yeawu, yɛɛ mɔɔ tɔ zo nsa la noko zɔhane ala. 22  Na menli nsuu ne amuala nee ye anwo. Nzinlii, raalɛ ne noko wule. 23  Ewudwazo ne anu, boni a raalɛ ne bayɛ ɔ ye a? Ɔluakɛ menli nsuu ne amuala gyale ye bie.” 24  Gyisɛse buale bɛ kɛ: “Asoo tɛ ɛhye ati a bɛvo a, kɛmɔ bɛnze Ngɛlɛlera ne anzɛɛ Nyamenle tumi ne la ati ɔ? 25  Ɔluakɛ saa bɛdwazo bɛfi mowuamra anu a, mrenyia ɛnrɛgya anzɛɛ bɛnrɛva mraalɛ bɛnrɛmaa agyalɛ, emomu, bɛbayɛ kɛ anwumabɔvolɛma mɔɔ bɛwɔ anwuma la. 26  Na mɔɔ fale mowuamra ɛdwazolɛ ne anwo la, asoo bɛtɛkengale ye wɔ Mosisi buluku ne anu wɔ kpɔkɛ ne anwo edwɛkɛ ne anu kɛ, Nyamenle zele ye kɛ: ‘Mame a mele Ebileham Nyamenle ne nee Ayezeke Nyamenle ne nee Gyekɔbo Nyamenle ne a’? 27  Ɔnle mowuamra Nyamenle, emomu teasema ɛdeɛ. Bɛvo kpole kpalɛ.” 28  Mɛla kilehilevolɛma ne anu ko mɔɔ rale ɛkɛ la dele kɛ bɛlɛsu kpolera na ɔnwunle kɛ yebua bɛ edwɛkɛ ne kɛnlɛma la, ɔbizale ye kɛ: “Mɛla ne boni a limoa* a?” 29  Gyisɛse buale kɛ: “Mɔɔ limoa la a le kɛ, ‘O Yizilayɛ, tie, Gyihova* yɛ Nyamenle ne le Gyihova* kokye, 30  na fa wɔ ahonle muala nee wɔ ɛkɛla* muala nee wɔ adwenle muala nee wɔ anwosesebɛ muala kulo Gyihova* wɔ Nyamenle ne.’ 31  Mɔɔ tɔ zo nwiɔ la a le ɛhye, ‘Kulo ɛ gɔnwo kɛ ɛ nwo.’ Mɛla bieko ɛnle ɛkɛ mɔɔ le kpole tɛla ɛhye mɔ a.” 32  Mɛla kilehilevolɛ ne zele ye kɛ: “Kilehilevolɛ, wɔdendɛ kɛnlɛma, ɔle nɔhalɛ bɔkɔɔ, ‘Ɔle Kokye, na bieko ɛnle ɛkɛ kɛ Ɔdaye la’; 33  na awie ahonle muala, ye ndelebɛbo muala, nee ye anwosesebɛ muala mɔɔ ɔfa yeahulo ye na yeahulo ɔ gɔnwo kɛ ɔ nwo la sonle bolɛ tɛla ɛyelalɛ afɔlebɔlɛ nee afɔlebɔlɛ kɔsɔɔti.” 34  Mɔɔ Gyisɛse nwunle kɛ yebua ye nrɛlɛbɛ nu la, ɔzele ye kɛ: “Ɛ nee Nyamenle Belemgbunlililɛ ne avinli anwa.” Na awie biala annyia akɛnrasesebɛ ambiza ye edwɛkɛ bieko. 35  Noko, mɔɔ Gyisɛse ɛlɛkilehile wɔ ɛzonlenlɛ sua ne anu la, ɔhanle kɛ: “Kɛmɔti a mɛla kilehilevolɛma ne ka kɛ Kelaese ne le Devidi ara ɛ? 36  Sunsum nwuanzanwuanza ne maanle Devidi mumua ne hanle kɛ, ‘Gyihova* zele me Awulae kɛ: “Tɛnla me sa fema zo kɔkpula kɛ mebava wɔ agbɔvolɛ meawula ɛ gyakɛ abo la.”’ 37  Devidi mumua ne vɛlɛle ye Awulae, yemɔti kɛzi ɔkola ɔyɛ ɔ ra ɛ?” Na ɛnee menli dɔɔnwo ne ɛlɛfa anyelielɛ adie ye. 38  Wɔ ye ngilehilelɛ ne anu, ɔhanle kɛ: “Bɛnlea boɛ wɔ mɛla kilehilevolɛma mɔɔ bɛkulo kɛ bɛwula adɛladeɛ ndendenle bɛkpɔsa na bɛkulo gua zo ahyebizalɛ 39  nee nyianu azua nu mbia mɔɔ wɔ ɔ nyunlu* nee ɛleka mɔɔ menli titili tɛnla wɔ ɛkponledolɛ bo la anwo. 40  Bɛbɔ ahunlanvolɛ mraalɛ awuke* na bɛ nye fuu* bɛayɛ asɔne ndendenle. Ɛhye mɔ banyia ndɛnebualɛ mɔɔ anu yɛ se kpalɛ la.” 41  Na ɔdɛnlanle aze mɔɔ ɛnee ɔ nye dua ezukoa nlɛka ne mɔ, na ɔbɔle ɔ bo ɔnleanle kɛzi menli dɔɔnwo ɛlɛfa ezukoa agua ezukoa nlɛka ne mɔ anu la, na sukoavolɛma dɔɔnwo vale ezukoa dɔɔnwo raguale nu. 42  Akee raalɛ kunlavolɛ ehyianli bie vale ngapɛlɛ nwiɔ mɔɔ ɛnzonle bolɛ biala la raguale nu.* 43  Ɔti ɔvɛlɛle ye ɛdoavolɛma ne wɔ ɔ nwo ɛkɛ na ɔzele bɛ kɛ: “Nɔhalɛ nu meka meahile bɛ kɛ, raalɛ kunlavolɛ ehyianli ɛhye ɛva dɔɔnwo ɛgua nu ɛdɛla bɛdabɛ mɔɔ bɛva ezukoa bɛgua ezukoa nlɛka ne mɔ anu la amuala. 44  Ɔluakɛ bɛ kɔsɔɔti bɛva mɔɔ bɛnyia bɛmaa yebo zo la bie a bɛragua nu a, noko yemɔ, ɔvi ye ehyia nu, yeva debie biala mɔɔ ɔlɛ, mɔɔ ɛha ɔ nwo la amuala a yeragua nu a.”

Ɔ Bo Edwɛkɛ

Nea Edwɛkɛbohilelɛ.
Anzɛɛ “asoo ɔle kpalɛ.”
Anzɛɛ “hyia kpalɛ.”
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Anzɛɛ “mɔɔ le kpalɛ.”
Anzɛɛ “bɛsɛkye bɛ agyapadeɛ.”
Anzɛɛ “bɛkpati.”
Giliki aneɛ nu, “lepta nwiɔ.” Ɛnee lepta nwiɔ le mitini kɛyɛ bulu gyima nwo ahatualɛ.