Luku 8:1-56

  • Mraalɛ mɔɔ nee Gyisɛse luale (1-3)

  • Ɛyazonlɛnli ne ndonwo ne (4-8)

  • Deɛmɔti Gyisɛse yɛle ndonwo la (9, 10)

  • Ɛyazonlɛnli ne ndonwo ne ngilenu (11-15)

  • Bɛngeda kɛnlaneɛ zo (16-18)

  • Gyisɛse mame nee ɔ mediema (19-21)

  • Gyisɛse maa ahumu bie agua (22-25)

  • Gyisɛse maa sunsum ɛtane ahɔwolo agbolike nu (26-39)

  • Gyeeyaelɛse ara raalɛ; raalɛ bie fa ɔ sa ka Gyisɛse tɛladeɛ (40-56)

8  Ɛhye anzi mekɛ ekyi bie anu, ɔdule adenle ɔhɔle azua azua nee namunamu zo ɔhɔbɔle Nyamenle Belemgbunlililɛ ne anwo edwɛkpa ne nolo. Na ɛnee Bulu Nee Nwiɔ ne boka ɔ nwo,  yɛɛ mraalɛ bie mɔ mɔɔ ɛnee yedu sunsum ɛtane wɔ bɛ nwo na yeyɛ bɛ ayile la: Mɛle mɔɔ bɛfɛlɛ ye Magedalene mɔɔ sunsum ɛtane nsuu vile ɔ nwo la;  Twuza mɔɔ nea Hɛlɔdo sua nu ɛkɛ ne la aye Dwowana; Susana; yɛɛ mraalɛ gyɛne dɔɔnwo mɔɔ vale bɛ ninyɛne boale bɛ la.  Mekɛ mɔɔ menli dɔɔnwo bie nee menli mɔɔ vi azua azua zo ralile ɔ nzi la yiale la, ɔvale ndonwo ɔdendɛle ɔhilele bɛ kɛ:  “Ɛyazonlɛnli bie hɔle kɛ ɔkagua ye ma. Mɔɔ ɔlɛgua ma ne la, bie hɔguale adenle nloa na bɛtietiale zo, na anwomanyunlu nloma rasusole.  Bie hɔguale bolɛ zo, na mɔɔ bɛfifile la bɛwule ɔluakɛ bɛannyia nzule.  Bie hɔguale mbowule nu, na mbowule ne nee bɛ nyinle na ɔmianle bɛ.  Bie noko hɔguale azɛlɛ kpalɛ zo, na mɔɔ bɛfifile la, bɛzole ma mɔnwo 100.” Mɔɔ ɔhanle ɛhye la, ɔmaanle ɔ ne zo ɔhanle kɛ: “Bɛmaa mɔɔ lɛ ɛnzolɛ kɛva kɛdie la ɛdie.”  Noko ye ɛdoavolɛma ne bizale ye mɔɔ ndonwo ɛhye kile la. 10  Ɔhanle kɛ: “Bɛmɛ bɛmaa bɛ adenle kɛ bɛde anwuma Belemgbunlililɛ ne anwo fealeranu edwɛkɛ nwuanzanwuanza ne abo, na bɛdabɛ mɔɔ bɛha la ɛdeɛ, bɛte ye wɔ ndonwo nu amaa bɛnea, bɛnea a, bɛannwu ye, bɛtie, bɛtie a, bɛande ɔ bo. 11  Mɔɔ ndonwo ne kile la ɛne: Ma ne a le Nyamenle edwɛkɛ ne. 12  Mɔɔ guale adenle ne anloa la a le bɛdabɛ mɔɔ bɛte edwɛkɛ ne na Abɔnsam baye edwɛkɛ ne fi bɛ ahonle nu yemɔti bɛnlie bɛnli na bɛanyia ngoane la. 13  Mɔɔ guale bolɛ zo la a le bɛdabɛ mɔɔ bɛte edwɛkɛ ne a bɛfa anyelielɛ bɛdie bɛdi la, noko ɛhye mɔ ɛnlɛ ndinli. Bɛnyia diedi mekɛ ekyi, noko saa sɔnea ba a bɛkpo bɛ diedi ne. 14  Mɔɔ guale mbowule nu la a le bɛdabɛ mɔɔ bɛte edwɛkɛ ne noko mekɛ ɛhye anu adwenleadwenle, anwonyia, nee anyelielɛ ngakyile twehwe bɛ adwenle na ɔmia edwɛkɛ ne, na ɔnzo ma kpalɛ la. 15  Mɔɔ guale azɛlɛ kpalɛ zo la a le bɛdabɛ mɔɔ bɛfa ahonle kpalɛ bɛtie edwɛkɛ ne na bɛdie bɛdi bɛsi abotane bɛso ma la. 16  “Awie biala ɛnle ɛkɛ mɔɔ ɔsɔ kɛnlaneɛ a ɔfa debie ɔkeda zo anzɛɛ ɔfa ɔsie ɛkpa bo a, emomu ɔfa ɔsie kɛnlaneɛ baka zo amaa bɛdabɛ mɔɔ bɛbara ɛkɛ ne la anwu wienyi ne. 17  Ɔluakɛ debie biala ɛnle ɛkɛ mɔɔ vea mɔɔ ɛnrɛla ali, anzɛɛ debie biala ɛnle ɛkɛ mɔɔ bɛheda zo mɔɔ bɛnrɛbuke zo na ɔnrɛla ali wienyi a. 18  Yemɔti bɛdie edwɛkɛ ɛhye mɔɔ melɛka meahile bɛ la boɛ, ɔluakɛ mɔɔ lɛ bie la bɛbamaa ye bie bɛaboka nwo, na mɔɔ ɛnlɛ bie la, mɔɔ ɔsuzu kɛ ɔlɛ bɔbɔ la bɛbalie bɛavi ɔ sa nu.” 19  Akee ye mame nee ɔ mediema mrenyia ne mɔ rale ɛkɛ noko menli dɔɔnwo ne ati bɛangola bɛambikye ye. 20  Ɔti bɛhɔbɔle ye amaneɛ kɛ: “Wɔ mame nee ɛ mediema mrenyia ne mɔ gyi alienwo lɔ, bɛkulo kɛ bɛnwu wɔ.” 21  Ɔbuale bɛ kɛ: “Me mame nee me mediema mrenyia a le bɛdabɛ mɔɔ bɛtie Nyamenle edwɛkɛ ne na bɛdi zo la.” 22  Kenle ko bie ɔ nee ye ɛdoavolɛma ne hɔvole ɛlɛne nu na ɔzele bɛ kɛ: “Bɛmaa yɛpɛ yɛhɔ azule ne anzi lɔ.” Yemɔti bɛhɔle. 23  Noko mekɛ mɔɔ bɛlɛkɔ la, ɔlafele. Na ahumu kpole bie dule azule ne anye, nzule bɔle ɔ bo hɔle bɛ ɛlɛne ne anu mɔɔ anrɛɛ ɔnoma a. 24  Yemɔti bɛhɔdunwuele ye, na bɛhanle kɛ: “Kilehilevolɛ, Kilehilevolɛ, asɛɛ yɛwu!” Akee mɔɔ ɔdwazole na ɔdeanle anwoma ne nee azule ne mɔɔ ɛlɛtu la, bɛ nloa hanle aze, na bɛguale dii. 25  Akee ɔbizale bɛ kɛ: “Bɛ diedi ne wɔ nienwu?” Noko ɛzulolɛ hanle bɛ na ɔzinle bɛ nwo, bɛhanle bɛhilele bɛ nwo ngoko kɛ: “Duzu sonla a le ɛhye? Ɔtendɛ ɔkile anwoma nee azule bɔbɔ a bɛtie ye.” 26  Na bɛhɔdwule aze wɔ Gɛlasa maanzinli ne ɛnwea nloa, ɔ nee Galeli anye bɔ zo. 27  Mɔɔ Gyisɛse dwule aze la, nrenyia bie mɔɔ sunsum ɛtane wɔ ɔ nwo mɔɔ ɔvi sua ne azo la rayiale ye. Mekɛ dɔɔnwo mɔɔ ɛze la, ɔnwula tɛladeɛ, ɔnla sua nu, emomu azie* ne azo ala. 28  Mɔɔ ɔnwunle Gyisɛse la, ɔdeanle nu na ɔradule ɔdɔle ɔ nyunlu ɛkɛ na ɔvale ɛnelɛ kpole ɔhanle kɛ: “Duzu a ɛkpondɛ wɔavi me ɛkɛ a, Gyisɛse, Anwuma Anwumanli Nyamenle ne Ara? Mesɛlɛ wɔ, mmatea me.” 29  (Ɛnee Gyisɛse ɛze sunsum ɛtane ne kɛ ɔvi nrenyia ne nu. Ɔluakɛ ɛnee yegyegye ye fane dɔɔnwo,* bɛvale mbulalɛ nee kyeenyi bɛkyekyele ye fane dɔɔnwo na bɛmaanle awie zinzale ye, noko ɔbubule mbulalɛ ne na ɔtetele kyeenyi ne na ɛnee sunsum ɛtane ne fa ye kɔ ɛleka koonwu bie mɔ.) 30  Gyisɛse bizale ye kɛ: “Kɛ bɛfɛlɛ wɔ ɛ?” Ɔbuale kɛ: “Ɛlɔne,” ɔluakɛ ɛnee sunsum ɛtane dɔɔnwo wɔ ɔ nwo. 31  Yemɔti bɛhɔle zo bɛzɛlɛle ye kɛ ɔmmamaa bɛkɔ kuma kuloonwu ne anu. 32  Ɛnee agbolike dɔɔnwo bie ɛlɛdidi boka ne azo wɔ ɛkɛ, yemɔti bɛzɛlɛle ye kɛ ɔmaa bɛhɔwolo agbolike ne mɔ anu, na ɔmaanle bɛ adenle. 33  Yemɔti sunsum ɛtane ne mɔ vile nrenyia ne nu na bɛhɔwolole agbolike ne mɔ, na bɛvi boka ne azo bɛdule twi bɛhɔguale azule ne anu bɛnlomanle. 34  Mɔɔ menli mɔɔ nea agbolike ne mɔ la nwunle mɔɔ ɛzi la, bɛnriandile bɛhɔbɔle amaneɛ wɔ sua ne nee namunamu ne mɔ azo. 35  Akee menli hɔle kɛ bɛkanlea mɔɔ ɛzi la. Yemɔti bɛrale Gyisɛse anwo ɛkɛ na bɛnwunle nrenyia ne mɔɔ sunsum ɛtane ne ɛvi ɔ nwo la kɛ ɔwula tɛladeɛ, ɔ nye zo ɛtete ye, ɔde Gyisɛse anwo ɛkɛ, na ɔyɛle bɛ ɛzulolɛ. 36  Menli mɔɔ nwunle ye la hanle kɛzi nrenyia ne mɔɔ ɛnee sunsum ɛtane wɔ ɔ nwo dele kpɔkɛ la hilele bɛ. 37  Akee menli dɔɔnwo mɔɔ wɔ maanzinli ne mɔɔ bikye Gɛlasa anu la zele Gyisɛse kɛ ɔvi ɛkɛ ne ɔhɔ, ɔluakɛ ɛnee ɛzulolɛ kpole ɛha bɛ. Ɔti ɔhɔvole ɛlɛne ne anu kɛ ɔkɔ. 38  Noko nrenyia ne mɔɔ sunsum ɛtane ne mɔ vile ɔ nwo la kpale ye kyɛlɛ kɛ ɔ nee ye kɔ, na yeammaa ye adenle, emomu ɔhanle kɛ: 39  “Sia kɔ sua nu na kɔha mɔɔ Nyamenle ɛyɛ ɛmaa wɔ la kile awie biala.” Yemɔti ɔhɔle na ɔhɔbɔle mɔɔ Gyisɛse ɛyɛ ɛmaa ye la nolo wɔ sua ne azo amuala. 40  Mekɛ mɔɔ Gyisɛse ziale rale la, menli dɔɔnwo ne liele ye kɛnlɛma ɔluakɛ ɛnee bɛ nye la ye ade. 41  Noko nea! nrenyia bie mɔɔ bɛfɛlɛ ye Gyeeyaelɛse la rale; nrenyia ɛhye le nyianu sua ne azo neavolɛ. Na ɔdule ɔdɔle Gyisɛse agyakɛ anu na ɔbɔle ɔ bo ɔzɛlɛle kɛ ɔmaa bɛhɔ ye sua nu, 42  ɔluakɛ ɛnee ɔ ra raalɛ kokye mɔɔ ɛli ɛvolɛ 12 la kpondɛ awu. Mɔɔ Gyisɛse ɛlɛkɔ la, menli dɔɔnwo hyelele ɔ nwo zo. 43  Ɛnee raalɛ bie mɔɔ mogya ɛdudu ye ɛvolɛ 12 na awie biala ɛtɛkolale ye ayile yɛ la wɔ ɛkɛ. 44  Ɔralile ɔ nzi na ɔvale ɔ sa ɔhanle ye tɛladeɛ ne anloa, na ɛkɛ ne ala mogya ne mɔɔ ɛlɛtu ye la pɛle. 45  Yemɔti Gyisɛse hanle kɛ: “Nwane a vale ɔ sa hanle me a?” Mɔɔ awie biala hanle kɛ tɛ ɔdaye la, Pita hanle kɛ: “Kilehilevolɛ, ɛgyi menli avinli yɛɛ bɛhyele ɛ nwo zo.” 46  Na Gyisɛse hanle kɛ: “Awie ɛva ɔ sa ɛha me, ɔluakɛ menwu kɛ tumi ɛvi me nu.” 47  Mɔɔ raalɛ ne nwunle kɛ yenwu ye la, ɔvale anwowozolɛ ɔrahotole ɔ nyunlu ɛkɛ na ɔhanle deɛmɔti ɔvale ɔ sa ɔhanle ye nee kɛzi ɔdele kpɔkɛ ɛkɛ ne ala la ɔhilele menli ne amuala. 48  Noko ɔzele ye kɛ: “Me ra raalɛ, wɔ diedi ɛmaa wɔde kpɔkɛ. Fa anzodwolɛ kɔ.” 49  Mekɛ mɔɔ ɔ nloa wɔ zo ɔlɛtendɛ la, awie vi nyianu sua ne anu kpanyinli ne sua nu rahanle kɛ: “Ɛ ra raalɛ ne ɛwu; mmagyegye Kilehilevolɛ ne bieko.” 50  Mɔɔ Gyisɛse dele ɛhye la, ɔzele ye kɛ: “Mmasulo, wɔmɔ nyia diedi ala na ɔbanyia ngoane.” 51  Mɔɔ ɔdwule sua nu ɛkɛ ne la, yeammaa awie biala andoa ye kɛ Pita, Dwɔn, Gyemise, yɛɛ kakula raalɛ ne papa nee ye mame ala. 52  Noko ɛnee menli ne ɛlɛsu ali ɔ nwo nyane kpalɛ. Yemɔti ɔhanle kɛ: “Bɛmmasu, ɔluakɛ ɔtɛwule na yelafe.” 53  Yemɔti bɛbɔle ɔ bo bɛzelele ye, ɔluakɛ ɛnee bɛze kɛ yewu. 54  Noko ɔzɔle ɔ sa na ɔzele ye kɛ: “Kakula, dwazo!” 55  Yemɔti ɔrale ngoane nu,* na ɔdwazole ɛkɛ ne ala, na ɔzele bɛ kɛ bɛmaa ye debie bɛmaa ɔli. 56  Na ye awovolɛ anye liele kpalɛ, noko ɔzele bɛ kɛ bɛmmaka mɔɔ ɛzi la bɛkile awie biala.

Ɔ Bo Edwɛkɛ

Anzɛɛ “ngakyelɛ nla.”
Anzɛɛ ɔkola ɔkile, “yegyegye ye mekɛ tendenle.”
Anzɛɛ “ɔziale ɔnyianle ngoane tumi.”