Luku 7:1-50

  • Sogya kpanyinli bie diedi (1-10)

  • Gyisɛse dwazo kunlavolɛ raalɛ bie ara wɔ Neeyen (11-17)

  • Bɛhanvole Dwɔn Sɔnevolɛ ne (18-30)

  • Bɛbuale awolɛndoazo anzosesebɛ bie fɔlɛ (31-35)

  • Raalɛ ɛtanevolɛ bie nyianle ɛtanefakyɛ (36-50)

    • Kakɛdualɛ nwo ndonwo (41-43)

7  Mekɛ mɔɔ ɔhanle ye edwɛkɛ ne ɔhilele menli ne ɔwiele la, ɔhɔle Kapɛnayɛm.  Ɛnee sogya kpanyinli bie akɛlɛ mɔɔ ɔkulo ye edwɛkɛ la ɛnde kpɔkɛ fee na ɔkpondɛ yeawu.  Mekɛ mɔɔ ɔdele Gyisɛse nganeɛ la, ɔzoanle Dwuu mgbanyima bie kɛ bɛhɔzɛlɛ ye kɛ ɔrayɛ ye akɛlɛ ne ayile.  Bɛrale Gyisɛse ɛkɛ na bɛbodole ye ɛsesebɛ kɛ: “Ɔfɛta kɛ ɛboa ye,  ɔluakɛ ɔkulo yɛ maanle ne yɛɛ ɔdaye mumua ne a ɔzile yɛ nyianu sua ne a.”  Yemɔti Gyisɛse nee bɛ hɔle. Noko ɔka ekyii ɔdwu sua nu ɛkɛ la, sogya kpanyinli ne zoanle ɔ gɔnwo mɔ wɔ ɔ nwo ɛkɛ ne kɛ: “Yɛmenle, mmagyegye ɛ nwo, ɔluakɛ menfɛta kɛ ɛba me sua nu.  Ɛhye ati a ɛnee mesuzu kɛ ɔnfɛta kɛ meba wɔ ɛkɛ la. Wɔmɔ ka edwɛkɛ ala na me sonvolɛ ne bade kpɔkɛ.  Ɔluakɛ medame noko mewɔ awie abo, yɛɛ melɛ sogyama mɔɔ bɛwɔ me bo a, na meka mekile ko kɛ, ‘Kɔ a!’ ɔkɔ, yɛɛ bieko kɛ, ‘Bɛla a!’ ɔba, nee me akɛlɛ kɛ, ‘Yɛ ɛhye a!’ ɔyɛ.”  Mɔɔ Gyisɛse dele ɛhye la, ɔzinle ɔ nwo na ɔhanle ɔhilele menli mɔɔ doa ye la kɛ: “Meka meahile bɛ, metɛnwunle diedi kpole zɛhae bɔbɔ wɔ Yizilayɛ.” 10  Na mekɛ mɔɔ menli mɔɔ bɛzoanle bɛ la ziale hɔle sua nu la, bɛhɔnwunle kɛ akɛlɛ ne ɛde kpɔkɛ. 11  Ɛhye anzi mekɛ ekyi bie anu, ɔhɔle sua bie mɔɔ bɛfɛlɛ ye Neeyen la azo, na ye ɛdoavolɛma ne nee menli dɔɔnwo nee ye hɔle. 12  Mekɛ mɔɔ ɔbikyele sua ne anlenkɛ kpole ne anloa la, nea! ɛnee bɛzo funli bɛ nee ye ɛlɛfinde, ɔle ye mame ara kokye. Eza raalɛ ne le kunlavolɛ. Ɛnee sua ne azo amra dɔɔnwo doa ye. 13  Mɔɔ Awulae nwunle ye la, ɔ nwo yɛle ye alɔbɔlɛ na ɔzele ye kɛ: “Mmasu ko.” 14  Akee ɔbikyele bɛ na ɔvale ɔ sa ɔhanle ɛlɛka ne,* na menli mɔɔ zo ɛlɛka ne la gyinlanle. Akee ɔhanle kɛ: “Kpavolɛ, mese wɔ kɛ dwazo!” 15  Nrenyia ne mɔɔ ɛwu la dwazole dɛnlanle aze na ɔbɔle ɔ bo ɔdendɛle, na Gyisɛse vale ye maanle ye mame. 16  Ɛzulolɛ hanle bɛ muala, na bɛbɔle ɔ bo bɛwulale Nyamenle anyunlunyia kɛ: “Ngapezonli kpole bie ɛvinde yɛ avinli,” na “Nyamenle ɛranlea ye menli.” 17  Na ɔ nwo edwɛkɛ ɛhye dɛlɛle hɔle Dwudiya amuala nee maanzinli mɔɔ bikye ɛkɛ la kɔsɔɔti anu. 18  Na Dwɔn ɛdoavolɛma ne hɔhanle ɛhye mɔ amuala hilele ye. 19  Yemɔti Dwɔn vɛlɛle ye ɛdoavolɛma ne nwiɔ na ɔzoanle bɛ ɔmaanle bɛhɔbizale Awulae kɛ: “Wɔmɔ a ɛle Ahenle Mɔɔ Ɛlɛba La, anzɛɛ yɛmaa yɛ nye ɛla awie fofolɛ ade ɔ?” 20  Mɔɔ bɛrale ɔ nwo ɛkɛ la, bɛhanle kɛ: “Dwɔn Sɔnevolɛ ne ɛzoa yɛ kɛ yɛrabiza wɔ kɛ, ‘Wɔmɔ a ɛle Ahenle Mɔɔ Ɛlɛba La, anzɛɛ yɛmaa yɛ nye ɛla awie fofolɛ ade ɔ?’” 21  Mekɛ zɔhane anu, ɔyɛle menli dɔɔnwo mɔɔ ɛnde kpɔkɛ nee bɛdabɛ mɔɔ bɛ ewule ne anu yɛ se la ayile, ɔdule sunsum ɛtane na ɔmaanle anyenzinliravolɛma dɔɔnwo nwunle debie. 22  Ɔbuale bɛ kɛ: “Bɛzia bɛhɔ na bɛhɔha mɔɔ bɛde nee mɔɔ bɛnwu ye la bɛhile Dwɔn kɛ: Anyenzinliravolɛma nwu debie, abuburama tia, kokobɛvolɛma te kpɔkɛ, anzondiliravolɛma te edwɛkɛ, bɛdwazo mowuamra yɛɛ bɛka edwɛkpa ne bɛkile ehyiavolɛma. 23  Anyelielɛ a le awie mɔɔ ɔnrɛlua me nwo zo ɔnrɛdɔ aze la.” 24  Mɔɔ Dwɔn ɛdoavolɛma ne hɔle la, Gyisɛse bɔle ɔ bo hanle Dwɔn anwo edwɛkɛ hilele menli dɔɔnwo ne kɛ: “Duzu a bɛhɔle ye ɛnleanlɛ wɔ fienemgbole ne anu a? Ndɔ baka mɔɔ anwoma ɛlɛkpusu ye la ɔ? 25  Ɛnee duzu a bɛhɔle ye ɛnleanlɛ a? Nrenyia mɔɔ wula tɛladeɛ kpalɛ* la ɔ? Nea, menli mɔɔ wula adɛladeɛ mgbalɛ na bɛde boɛ la wɔ arelemgbunli azua nu. 26  Ɛnee akee duzu a bɛhɔle ye ɛnleanlɛ a? Ngapezonli ɔ? Ɛhɛe, ɔle zɔ, na meka meahile bɛ kɛ ɔtɛla ngapezonli bɔbɔ. 27  Ɛhye a le ahenle mɔɔ bɛhɛlɛ ɔ nwo edwɛkɛ kɛ: ‘Nea! melɛsoa me ɛbɔfoɔ meamaa yealimoa ɛ nyunlu, na yemɔ a ɔbaziezie wɔ adenle nu yeamaa wɔ a.’ 28  Nɔhalɛ nu meka meahile bɛ, wɔ menli mɔɔ mraalɛ ɛwo bɛ la anu, awie biala ɛnle kpole ɛndɛla Dwɔn, noko awie mɔɔ le ekyi wɔ Nyamenle Belemgbunlililɛ ne anu la le kpole tɛla ye.” 29  (Mɔɔ menli ne nee adwuledievolɛma ne amuala dele ɛhye la, bɛliele bɛdole nu kɛ Nyamenle le tenlenenli ɔluakɛ bɛmaanle Dwɔn zɔnenle bɛ. 30  Noko Falasiima nee menli mɔɔ ze Mɛla ne la bule bɛ nye guale adehilelɛ mɔɔ Nyamenle vale maanle bɛ la azo, ɔluakɛ bɛammaa Dwɔn anzɔne bɛ.) 31  “Yemɔti nwane anwo a menva awolɛndoazo ɛhye anu menli mendo a, na bɛle kɛ nwane mɔ? 32  Bɛle kɛ ngakula mɔɔ bɛde gua zo na bɛlɛtea nu bɛavɛlɛ bɛ nwo kɛ: ‘Yɛbɔle edwɛne yɛmaanle bɛ noko bɛanzi agole; yɛdole alɔbɔlɛ edwɛne noko bɛanzu.’ 33  Zɔhane ala a Dwɔn Sɔnevolɛ ne rale la, yeanli aleɛ yɛɛ yeanno nza, noko bɛse: ‘Ɔlɛ sunsum ɛtane.’ 34  Sonla ra ne ɛra, ɔdi na ɔno, noko bɛse: ‘Nea! Nrenyia adidikpoku nee nzanli, adwuledievolɛma nee ɛtanevolɛma agɔnwo!’ 35  Noko, nrɛlɛbɛ dua mɔɔ vi ye gyimayɛlɛ nu ba la azo di benle.” 36  Falasiinli ko hɔle zo vɛlɛle ye kɛ ɔrɛla ɔmaa bɛli debie. Yemɔti ɔhɔle Falasiinli ne sua nu na bɛlile debie. 37  Na nea! raalɛ bie mɔɔ bɛze ye wɔ sua ne azo kɛ ɔle ɛtanevolɛ la dele kɛ ɔlɛdi debie wɔ Falasiinli ne sua nu, na ɔvale alabaseta toba mɔɔ nwole evuanlɛ wɔ nu la ɔhɔle ɛkɛ. 38  Ɔhotole ɔ gyakɛ anu, ɔzunle ɔvale ɔ nye monle ɔwowole ɔ gyakɛ anwo, na ɔvale ɔ ti enrinli ɔkyikyile. Eza ɔvole ɔ gyakɛ anwo na ɔwolale nwole evuanlɛ ne ɔguale nwolɛ. 39  Mekɛ mɔɔ Falasiinli ne mɔɔ dole ɛsalɛ vɛlɛle ye la nwunle ɛhye la, ɔhanle ye ɔ ti anu kɛ: “Saa nrenyia ɛhye le ngapezonli amgba a, anrɛɛ ɔbanwu raalɛ ɛhye mɔɔ ɛlɛfa ɔ sa aha ye la sonla holɛ kɛ ɔle ɛtanevolɛ.” 40  Na Gyisɛse buale ye kɛ: “Saemɔn, meka edwɛkɛ bie meahile wɔ.” Ɔzele ye kɛ: “Kilehilevolɛ, ka!” 41  “Ɛnee menli nwiɔ bie tua awie kakɛ; ɛnee ko tua denale* 500, yɛɛ ko ne noko tua denale 50. 42  Mekɛ mɔɔ bɛannyia debie mɔɔ bɛfa bɛadua ye kakɛ ne la, ɔvale ɔhyɛle bɛ mu nwiɔ. Yemɔti bɛ nuhua boni a bahulo ye edwɛkɛ kpalɛ a?” 43  Saemɔn buale ye kɛ: “Mesuzu kɛ mɔɔ ɔvale dɔɔnwo ɔhyɛle ye la ɔ.” Ɔzele ye kɛ: “Wɔbua ye kpalɛ.” 44  Akee ɔhakyile ɔ nye wɔ raalɛ ne anwo na ɔzele Saemɔn kɛ: “Wɔnwu raalɛ ɛhye? Membale wɔ sua nu ɛke; wɔammaa me nzule meanwowo me gyakɛ anwo. Noko raalɛ ɛhye ɛva ɔ nye monle ɛwowo me gyakɛ anwo na yeva ɔ ti enrinli yekyikyi. 45  Wɔanvo me nloa anwo, noko raalɛ ɛhye, sumunli kɛ membale ɛke la, ɔtɛgyakyile me gyakɛ anwo ɛvolɛ. 46  Wɔanwola nwole wɔangua me ti zo, noko raalɛ ɛhye wolale nwole evuanlɛ guale me gyakɛ anwo. 47  Ɔlua ɛhye ati, meka meahile wɔ kɛ ye ɛtane zonle* bɔbɔ ɛdeɛ, noko bɛva bɛhyɛ ye, ɔluakɛ ɔnyianle menli dɔɔnwo anwo ɛlɔlɛ. Noko mɔɔ bɛva ekyi bɛhyɛ ye la lɛ menli ekyi anwo ɛlɔlɛ.” 48  Akee ɔzele ye kɛ: “Bɛva wɔ ɛtane bɛhyɛ wɔ.” 49  Menli mɔɔ ɔ nee bɛ ɛlɛdi aleɛ ne la bɔle ɔ bo zele bɛ nwo ngoko kɛ: “Nwane a le nrenyia ɛhye mɔɔ ɔfa ɛtane bɔbɔ ɔkyɛ a?” 50  Noko ɔzele raalɛ ne kɛ: “Wɔ diedi ɛlie wɔ ngoane; kɔ anzodwolɛ nu.”

Ɔ Bo Edwɛkɛ

Anzɛɛ “funli ɛlɛka.”
Anzɛɛ “mɔɔ keda ndanlɛ mgbalɛ.”
Denale ko le gyimayɛvo kenle ko ahatualɛ.
Anzɛɛ “le kpole.”