Luku 22:1-71

  • Ɛsɔfoma bɔ kpɔkɛ kɛ bɛku Gyisɛse (1-6)

  • Anwoziezielɛ maa Akpabɛnwo mɔɔ li awieleɛ (7-13)

  • Bɛvale Awulae Nɔsolɛ Aleɛlilɛ ne bɛziele ɛkɛ (14-20)

  • ‘Mɔɔ baye me amaa la nee me de ɛkponle nwo’ (21-23)

  • Kpoleyɛlɛ nwo kpolerazulɛ (24-27)

  • Gyisɛse belemgbunlililɛ nwo ngyekyeleɛ (28-30)

  • Bɛhanle Pita ɛkpolɛ ne bɛdole ɛkɛ (31-34)

  • Anwoziezielɛ nwo hyia; dadeɛ nwiɔ ne (35-38)

  • Gyisɛse asɔneyɛlɛ wɔ Ɔlivi Boka ne azo (39-46)

  • Bɛhye Gyisɛse (47-53)

  • Pita kpo Gyisɛse (54-62)

  • Bɛgolo Gyisɛse anwo (63-65)

  • Edwɛkɛlilɛ wɔ Sanhedelin ne anyunlu (66-71)

22  Ɛnee Paano Mɔɔ Mgbɔvonle Ɛnle Nu Ɛvoyia ne mɔɔ bɛfɛlɛ ye Akpabɛnwo ne la ɛlɛbikye.  Na ɛnee ɛsɔfo mgbanyinli nee mɛla kilehilevolɛma ne mɔ ɛlɛkpondɛ adenle kpalɛ alua zo ahu ye, ɔluakɛ ɛnee bɛsulo menli ne.  Seetan wolole Dwudase mɔɔ bɛfɛlɛ ye Yesekaleɔto mɔɔ ɛnee boka Bulu Nee Nwiɔ ne anwo la,  na ɔvindele ɔhɔle ɔ nee ɛsɔfo mgbanyinli nee ɛzonlenlɛ sua ne sinzavolɛma mgbanyinli ne mɔ hɔhanle kɛzi ɔbaye ye yeamaa bɛ la anwo edwɛkɛ.  Bɛ nye liele ɛhye anwo na bɛliele bɛdole nu kɛ bɛbamaa ye ezukoa.  Yemɔti ɔkponlenle zo na ɔbɔle ɔ bo ɔkpondɛle adenle mɔɔ ɔbalua zo yeaye ye yeamaa mɔɔ menli ɛnrɛde nwolɛ bie a.  Kenle mɔɔ limoa mɔɔ bɛdi Paano Mɔɔ Mgbɔvonle Ɛnle Nu la dwule, na ɛnee ɔwɔ kɛ bɛbɔ Akpabɛnwo afɔle ne;  yemɔti Gyisɛse zoanle Pita nee Dwɔn kɛ: “Bɛhɔ na bɛhɔziezie Akpabɛnwo ne bɛmaa yɛli.”  Bɛbizale ye kɛ: “Nienwu a ɛkulo kɛ yɛkɔsiezie a?” 10  Ɔbuale bɛ kɛ: “Nea! Saa bɛdwu sua ne azo a, bɛ nee nrenyia bie mɔɔ zo buakɛ mɔɔ nzule wɔ nu la bayia. Bɛdoa ye bɛhɔ awuke mɔɔ ɔkɛwolo nu la anu. 11  Bɛze suamenle ne kɛ, ‘Kilehilevolɛ ne se yɛbiza wɔ kɛ: “Nienwu a nyɛvolɛ sua ne mɔɔ me nee me ɛdoavolɛma ne bali Akpabɛnwo ne wɔ nu la wɔ a?”’ 12  Na nrenyia zɔhane bahile bɛ ekpumgbunli kpole bie wɔ ɛbolɔnsam zo mɔɔ bɛziezie nu dɛba la. Bɛziezie ye wɔ ɛkɛ.” 13  Yemɔti bɛhɔle na bɛhɔnwunle ye kɛ mɔɔ ɔhanle ɔhilele bɛ ala la, na bɛzieziele ninyɛne bɛmaanle Akpabɛnwo ne. 14  Ɔti mekɛ ne dwule la, ɔ nee ye ɛzoanvolɛma ne dɛnlanle aze wɔ ɛkponle nwo. 15  Na ɔzele bɛ kɛ: “Me nye die nwo kpalɛ kɛ me nee bɛ bali Akpabɛnwo ɛhye kolaa na meanwu amaneɛ; 16  ɔluakɛ meka meahile bɛ kɛ menrɛli ye bieko kɔkpula kɛ ninyɛne kɔsɔɔti bara nu wɔ Nyamenle Belemgbunlililɛ ne anu la.” 17  Na ɔliele kanrɛlɛ, ɔlale ase na ɔhanle kɛ: “Bɛlie ɛhye na bɛva bɛmaa bɛ nwo ngoko, 18  na meka meahile bɛ, ɔvi ɛnɛ mɔɔ kɔ la, menrɛnlo nwanye ɛhye bieko kɔkpula kɛ Nyamenle Belemgbunlililɛ ne kɛra la.” 19  Eza ɔvale paano ɔlale ase, ɔbubule nu na ɔvale ɔmaanle bɛ ɔhanle kɛ: “Ɛhye gyi ɛkɛ ne maa me sonlabaka ne mɔɔ bɛdabɛ ti bɛbava bɛamaa la. Bɛhɔ zo bɛyɛ ɛhye bɛva bɛhakye me.” 20  Zɔhane ala a ɔyɛle kanrɛlɛ ne wɔ mekɛ mɔɔ bɛlile nɔsolɛ aleɛ ne bɛwiele la a, na ɔhanle kɛ: “Kanrɛlɛ ɛhye gyi ɛkɛ ne maa ngyekyeleɛ fofolɛ ne mɔɔ bɛbalua me mogya ne azo bɛayɛ, mɔɔ bɛdabɛ ti bɛbahwi bɛagua la. 21  “Noko nea! ahenle mɔɔ baye me amaa la de me nwo ɛke wɔ ɛkponle ye anwo. 22  Nɔhalɛ nu, sonla Ra ne bawu kɛ mɔɔ bɛhanle bɛdole ɛkɛ ne la; noko sonla ne mɔɔ bɛbalua ɔ nwo zo bɛaye ye bɛamaa la, ye gyakɔ!” 23  Yemɔti bɛbizale bɛ nwo ngoko kɛ bɛ nuhua boni a bayɛ ɛhye a. 24  Na eza bɛzule mɔɔ le kpole wɔ bɛ avinli la anwo kpolera ɛsesebɛ. 25  Noko ɔzele bɛ kɛ: “Maanle maanle arelemgbunli kile bɛ tumi wɔ bɛ menli nwo zo, yɛɛ bɛfɛlɛ menli mɔɔ di bɛ nwo zo tumi la Nyeleyɛvolɛma. 26  Noko bɛmɛ, ɔnle kɛ bɛyɛ zɔ. Mɔɔ le kpole wɔ bɛ nu la ɛyɛ kakula, na mɔɔ li bɛ nyunlu la ɛzonle bɛ. 27  Boni a le kpole a, mɔɔ ɛlɛdi debie* anzɛɛ mɔɔ ɛlɛsonle la? Asoo tɛ mɔɔ ɛlɛdi debie la ɔ? Noko mame mewɔ bɛ avinli kɛ mesonle bɛ. 28  “Noko bɛmɛ a bɛbeta me nwo wɔ me sɔnea ne mɔ anu a; 29  na me nee bɛ yɛ Belemgbunlililɛ nwo ngyekyeleɛ kɛ mɔɔ me Ze noko nee me ɛyɛ ngyekyeleɛ la, 30  amaa bɛadɛnla me ɛkponle nwo wɔ me Belemgbunlililɛ ne anu, bɛali na bɛanlo na bɛadɛnla arelemgbunli mbia zo bɛabua Yizilayɛ mbusua 12 ne ndɛne. 31  “Saemɔn, Saemɔn, nea! Seetan kpondɛ kɛ ɔkpogya bɛ kɛ mɔɔ bɛkpogya hwiiti bɛye nwolɛ abonle la. 32  Noko mezɛlɛ memaa bɛ amaa bɛ diedi anwie; na wɔmɔ saa ɛnu ɛ nwo ɛsia ɛba a, maa ɛ mediema ne mɔ anwosesebɛ.” 33  Akee ɔzele ye kɛ: “Awulae, meziezie me nwo kɛ saa ewule nu o, efiadelalɛ nu o, me nee wɔ kɛhɔ.” 34  Noko ɔhanle kɛ: “Pita, meka meahile wɔ kɛ, ɛnɛ, too mɔɔ akɔlɛ kabɔ la, ɛnee wɔkpo me fane nsa.” 35  Eza ɔzele bɛ kɛ: “Mekɛ mɔɔ menzoanle bɛ mɔɔ bɛanva ezukoa kodoku nee aleɛ kodoku nee mgbɔlaboa la, asoo bɛhyianle debie nwo?” Bɛbuale kɛ: “Kyɛkyɛ!” 36  Akee ɔzele bɛ kɛ: “Noko kɛkala, mɔɔ lɛ ezukoa kodoku la ɛva, mɔɔ lɛ aleɛ kodoku la noko zɔhane ala, na mɔɔ ɛnlɛ dadeɛ la ɛdɔne ye tɛladeɛ aguzo ne na ɔdɔ bie. 37  Na meka meahile bɛ kɛ ɔwɔ kɛ ɛhye mɔɔ bɛhɛlɛ la ba nu wɔ me nwo zo kɛ, ‘Bɛdianle ye bɛbokale mɛladonlɛma anwo.’ Na ɛhye ɛlɛba nu wɔ me nwo zo.” 38  Na bɛhanle kɛ: “Awulae, nea! dadeɛ nwiɔ ɛne.” Ɔzele bɛ kɛ: “Ɔle kpalɛ.” 39  Mɔɔ ɔvile ɛkɛ ne la, ɔhɔle Ɔlivi Boka ne azo kɛ mɔɔ ɔta ɔyɛ ye la na ye ɛdoavolɛma ne doale ye. 40  Mɔɔ bɛdwule ɛkɛ ne la, ɔzele bɛ kɛ: “Bɛhɔ zo bɛyɛ asɔne na bɛangɔ sɔnea nu.” 41  Na ɔvile bɛ nwo ɛkɛ ɔhɔle ɔ nyunlu ekyii, ɔhotole na ɔbɔle ɔ bo ɔyɛle asɔne 42  kɛ: “Egya, saa ɔkɛyɛ boɛ a, maa kanrɛlɛ ɛhye ɛze me nwo ɛhɔ. Noko, tɛ kɛ mɔɔ mekulo la ɔ, emomu, kɛ mɔɔ ɛkulo la.” 43  Akee anwumabɔvolɛ bie vi anwuma rayele ɔ nwo hilele ye maanle ye anwosesebɛ. 44  Noko ɔvale nyanelilɛ kpole ɔhɔle zo ɔyɛle asɔne ɛsesebɛ; na ɔ nwo ɛhɛlɛnra yɛle kɛ mogya ndɔkɛ la na ɔtetele ɔguale aze. 45  Ɔwiele asɔne ne yɛ la ɔhɔle ɛdoavolɛ ne mɔ anwo ɛkɛ na ɔnwunle kɛ nyanelilɛ ɛmaa bɛlafe. 46  Ɔbizale bɛ kɛ: “Duzu ati a bɛlɛdafe ɛ? Bɛdwazo na bɛhɔ zo bɛyɛ asɔne na bɛangɔ sɔnea nu.” 47  Mɔɔ ɔ nloa wɔ zo ɔlɛtendɛ la, nea! menli ekpunli bie mɔɔ nrenyia ne mɔɔ bɛfɛlɛ ye Dwudase, Bulu Nee Nwiɔ ne anu ko li bɛ nyunlu la, rale Gyisɛse anwo ɛkɛ na ɔvole ɔ nloa anwo. 48  Noko Gyisɛse bizale ye kɛ: “Dwudase, ɛfo sonla Ra ne anloa anwo wɔaye ye wɔamaa ɔ?” 49  Mekɛ mɔɔ bɛdabɛ mɔɔ bɛwɔ ɛkɛ ne nwunle mɔɔ ɛlɛba arazi la, bɛhanle kɛ: “Awulae, yɛva dadeɛ ne yɛhɔ bɛ nwo zo ɔ?” 50  Bɛ nuhua ko bɔbɔ hwenle ye dadeɛ ne pɛle ɛsɔfo kpanyinli ne akɛlɛ ne anzo fema ne. 51  Noko Gyisɛse buale kɛ: “Yeyɛ boɛ.” Na ɔvale ɔ sa ɔhanle ɔ nzo ne ɔyɛle ye ayile. 52  Akee Gyisɛse zele ɛsɔfo mgbanyinli nee ɛzonlenlɛ sua ne anu mgbanyima nee mgbanyima ne mɔ mɔɔ bɛra kɛ bɛbahye ye la kɛ: “Bɛva dadeɛ nee ahoholombaka bɛlɛba bɛarahye me kɛ awule ɔ? 53  Ɛnee dahuu me nee bɛ wɔ ɛzonlenlɛ sua ne anu noko bɛangye me. Noko ɛhye le bɛdabɛ nee awozinli nu tumivolɛma mekɛ.” 54  Akee bɛhyele ye bɛvale ye bɛhɔle ɛsɔfo kpanyinli ne sua nu; noko ɛnee Pita li bɛ nzi wɔ moamoa. 55  Mekɛ mɔɔ bɛwudale senle wɔ alie ne anwo na bɛdede nwolɛ la, ɛnee Pita de bɛ nwo ɛkɛ ne. 56  Noko mɔɔ sonvolɛ bɛlɛra bie nwunle kɛ ɔde senle ne anwo la, ɔnleanle ye koonwu na ɔhanle kɛ: “Ɛnee nrenyia ɛhye noko boka ɔ nwo.” 57  Noko yeanlie yeando nu na ɔhanle kɛ: “Raalɛ ye, menze ye.” 58  Ɔyɛle ekyii la, awie fofolɛ nwunle ye na ɔhanle kɛ: “Ɛdawɔ noko ɛboka bɛ.” Noko Pita hanle kɛ: “Nrenyia ye, memboka nwo.” 59  Na mɔɔ dɔnehwele kɛyɛ ko pɛle nu la, awie bieko bɔle ɔ bo hanle ye ɛsesebɛ kɛ: “Amgba, ɛnee nrenyia ɛhye boka ɔ nwo, ɔluakɛ ɔle nɔhalɛ kɛ ɛle Galelinli!” 60  Noko Pita hanle kɛ: “Nrenyia ye, menze mɔɔ ɛlɛka la anwo ɛhwee.” Na mɔɔ ɔ nloa wɔ zo ɔlɛtendɛ la, ɛkɛ ne ala akɔlɛ bɔle. 61  Akee Awulae hakyile ɔ nye nleanle Pita koonwu, na Pita hakyele Awulae edwɛkɛ ne mɔɔ ɔhanle ɔhilele ye la kɛ: “Ɛnɛ, too mɔɔ akɔlɛ kabɔ la, ɛnee wɔkpo me fane nsa.” 62  Na ɔvindele ɔhɔzunle alɔbɔlɛ ɛzunlɛ. 63  Akee menli mɔɔ ɛlɛsinza Gyisɛse la bɔle ɔ bo golole ɔ nwo na bɛbole ye; 64  bɛhedale ɔ nyunlu, na bɛzele ye kɛ: “Ka ngapezo! Kile yɛ ahenle mɔɔ bɔle wɔ la.” 65  Na bɛhanle munzule edwɛkɛ dɔɔnwo bɛtiale ye. 66  Na mɔɔ aleɛ hyenle la, mgbanyima ne mɔ amuala, ɛsɔfo mgbanyinli nee mɛla kilehilevolɛma ne mɔ yiale nu na bɛvale ye bɛhɔle Sanhedelin ne asalo ɛkɛ na bɛhanle kɛ: 67  “Saa wɔmɔ a ɛle Kelaese ne a ka kile yɛ.” Noko ɔzele bɛ kɛ: “Saa meka mekile bɛ bɔbɔ a, bɛnrɛlie bɛnrɛli. 68  Eza noko saa mebiza bɛ edwɛkɛ a, bɛnrɛye ɔ nloa. 69  Noko ɔvi mekɛ ɛhye mɔɔ kɔ la, sonla Ra ne badɛnla Nyamenle asa fema ne mɔɔ tumi wɔ nu la azo.” 70  Na bɛ muala bɛhanle kɛ: “Yemɔti wɔmɔ a ɛle Nyamenle Ara ne a?” Ɔzele bɛ kɛ: “Bɛdabɛ a bɛse mele Nyamenle Ara a.” 71  Bɛhanle kɛ: “Duzu ati a ɔwɔ kɛ yɛkpondɛ daselɛ bieko a? Yɛdayɛ mumua ne yɛde yɛvi ɔ nloa anu.”

Ɔ Bo Edwɛkɛ

Anzɛɛ “bɛdede ɛkponle nwo.”