Luku 17:1-37

  • Azedɔlɛ, ɛtanefakyɛ, nee diedi (1-6)

  • Ngɛkɛlɛ mɔɔ nvasoɛ ɛnle yɛ nwo zo (7-10)

  • Kokobɛvolɛma bulu ayileyɛlɛ (11-19)

  • Nyamenle Belemgbunlililɛ ne ɛralɛ (20-37)

    • Nyamenle Belemgbunlililɛ ne “wɔ bɛ avinli” (21)

    • “Bɛhakye Lɔɔto aye ne” (32)

17  Akee ɔzele ye ɛdoavolɛma ne kɛ: “Kɛ ɔkɛyɛ biala la ninyɛne mɔɔ maa awie mɔ tɔ aze la bara, noko sonla mɔɔ kɛmaa awie kɛdɔ aze la, ye gyakɔ!  Ɔle kpalɛ kɛ anrɛɛ bɛkɛva ɛdibolɛ bɛkɛhenda ɔ kɔme na bɛkɛhɔdo ye nyevile nu tɛla kɛ ɔkɛmaa ngakula ɛhye mɔ ko kɛyɛ ɛtane la.  Bɛnlea bɛ nwo boɛ. Saa ɛ diema yɛ wɔ ɛtane a, tea ye, na saa ɔnu ɔ nwo a fakyɛ ye.  Saa ɔyɛ ɛtane fane nsuu ɔtia wɔ alehyenlɛ biala bɔbɔ na ɔsia ɔba fane nsuu ɔbaka kɛ, ‘Menlu me nwo a,’ ɔwɔ kɛ ɛfa ɛkyɛ ye.”  Akee ɛzoanvolɛma ne zele Awulae kɛ: “Maa yɛnyia diedi kpole.”  Na Awulae hanle kɛ: “Saa bɛlɛ diedi mɔɔ ye kpole le kɛ mɛsetade ma bɔbɔ a, anrɛɛ bɛbahola bɛaha bɛahile sekamɔ baka ɛhye kɛ, ‘Tu kɔgyinla nyevile nu!’ na ɔbadie bɛ.  “Bɛ nuhua boni a ye akɛlɛ kɔfundu azɛlɛ anzɛɛ kɔnea mboane wɔ ɛbɔ nu na ɔba a ɔbaha yeahile ye kɛ, ‘Ka ɛ nwo badɛnla aze na di debie ɛ’?  Emomu, asoo ɔnrɛha ɔnrɛhile ye kɛ, ‘Ye wɔ tɛladeɛ ne na siezie ɛ nwo fa me nɔsolɛ aleɛ maa me na medi meno mewie a ɛdawɔ noko wɔali na wɔanlo ɔ’?  Ɔnrɛyɛ akɛlɛ ne mo ɔluakɛ ɔyɛle mɔɔ bɛse ɔyɛ la, ɔnle zɔ ɔ? 10  Zɔhane ala a bɛyɛ ninyɛne kɔsɔɔti mɔɔ bɛse bɛyɛ la bɛwie a, bɛha kɛ: ‘Yɛle ngɛkɛlɛ mɔɔ nvasoɛ ɛnle yɛ nwo zo a. Mɔɔ ɔwɔ kɛ yɛyɛ la a yɛyɛ la.’” 11  Mɔɔ ɔlɛkɔ Gyɛlusalɛm la, ɔvale Samɛlea nee Galeli avinli. 12  Na mɔɔ ɔlɛwolo namule bie azo la, mrenyia bulu mɔɔ bɛle kokobɛvolɛma la yiale ye, noko bɛgyinlanle moamoa. 13  Bɛmaanle bɛ ne zo bɛhanle kɛ: “Gyisɛse, Kilehilevolɛ, nwu yɛ anwunvɔne!” 14  Mekɛ mɔɔ ɔnwunle bɛ la ɔzele bɛ kɛ: “Bɛva bɛ nwo bɛhɔhile ɛsɔfo ne mɔ.” Mekɛ mɔɔ bɛlɛkɔ la bɛdele kpɔkɛ. 15  Mɔɔ bɛ nuhua ko nwunle kɛ yede kpɔkɛ la, ɔziale ɔ nzi na ɔvale ɛnelɛ kpole ɔwulale Nyamenle anyunlunyia. 16  Na ɔbutule ɔ nyunlu aze wɔ Gyisɛse agyakɛ anu na ɔyɛle ye mo. Ɛnee ɔle Samɛleanli. 17  Gyisɛse buale kɛ: “Bɛle bulu a bɛdele kpɔkɛ a, ɔnle zɔ ɔ? Na ngɔnla ne mɔɔ ɛha la wɔ ni? 18  Bɛ nuhua biala anzia kɛ ɔbawula Nyamenle anyunlunyia kɛ nrenyia ɛhye mɔɔ ɔvi maanle gyɛne nu la ala ɔ?” 19  Akee ɔzele ye kɛ: “Dwazo kɔ; wɔ diedi ɛmaa wɔde kpɔkɛ.” 20  Mɔɔ Falasiima ne bizale ye mekɛ mɔɔ Nyamenle Belemgbunlililɛ ne bara la, ɔbuale bɛ kɛ: “Nyamenle Belemgbunlililɛ ne ɛnrɛra mɔɔ menli kɔsɔɔti banwu ye a; 21  yɛɛ menli ɛnrɛha kɛ, ‘Bɛnlea ɛke!’ anzɛɛ ‘Nehane!’ Ɔluakɛ nea! Nyamenle Belemgbunlililɛ ne wɔ bɛ avinli.” 22  Akee ɔzele ɛdoavolɛma ne kɛ: “Mekɛ bara mɔɔ bɛbahulo kɛ bɛkɛnwu sonla Ra ne mekɛ ne bie a, noko bɛnrɛnwu ye. 23  Na menli baha ahile bɛ kɛ, ‘Bɛnlea nehane!’ anzɛɛ ‘Bɛnlea ɛke!’ Bɛmmafinde anzɛɛ bɛmmadi bɛ nzi. 24  Na kɛ mɔɔ ɛsɛlɛmanye kpakye anwuma ɛleka ko kɔdwu anwuma ɛleka fofolɛ la, zɔhane ala a sonla Ra ne mekɛ ne bayɛ a. 25  Noko mɔɔ limoa la, ɔwɔ kɛ ɔnwu amaneɛ dɔɔnwo na awolɛndoazo ɛhye kpo ye. 26  Eza kɛ mɔɔ Nowa mekɛ ne yɛle la, zɔhane ala a sonla Ra ne ɛralɛ ne bayɛ a: 27  bɛlile, bɛnlonle, mrenyia gyale, bɛvale mraalɛ bɛmaanle agyalɛ, ɔhɔdwule kenle mɔɔ Nowa vole ɛlɛne ne anu, na Azuyilɛ ne razɛkyele bɛ muala la. 28  Zɔhane ala a ɔyɛle wɔ Lɔɔto mekɛ zo a: bɛlile, bɛnlonle, bɛdɔle, bɛdɔnenle, bɛluale, bɛsisile azua. 29  Noko kenle mɔɔ Lɔɔto vile Sodɔm la, senle nee sɔlefa dɔle vile anwuma kɛ ezule la razɛkyele bɛ muala. 30  Zɔhane ala a ɔbayɛ wɔ kenle mɔɔ bɛbaye sonla Ra ne bɛahile la a. 31  “Kenle zɔhane, mɔɔ wɔ sua ti zo na ye ninyɛne wɔ ye sua nu la mmadwu aze kɛ ɔbava ye ninyɛne, yɛɛ mɔɔ wɔ ɛbɔ nu la mmasia kɛ ɔbava ninyɛne mɔɔ yegyakyi ye ɔ nzi la. 32  Bɛhakye Lɔɔto aye ne. 33  Awie biala mɔɔ kulo kɛ ɔbɔ ye ngoane* nwo bane la, ɔbavi ɔ sa, na awie biala mɔɔ ɔkɛvi ɔ sa la ɔbabɔ nwolɛ bane. 34  Meka meahile bɛ, zɔhane nɔe ne menli nwiɔ bala ɛkpa ko azo; bɛbava ko bɛahɔ na bɛagyakyi ko. 35  Mraalɛ nwiɔ badi debie wɔ ɛdibolɛ ko azo; bɛbava ko bɛahɔ na bɛagyakyi ko.” 36  —— 37  Yemɔti bɛbizale ye kɛ: “Awulae, nienwu ɔ?” Ɔzele bɛ kɛ: “Ɛleka biala mɔɔ debie funli wɔ la, ɛkɛ ne a kɔleɛ dɔɔnwo boɔboa bɛ nloa a.”

Ɔ Bo Edwɛkɛ

Anzɛɛ “ɛkɛla.”