Luku 15:1-32

  • Boane ne mɔɔ minlinle la anwo ndonwo (1-7)

  • Delakema ne mɔɔ minlinle la anwo ndonwo (8-10)

  • Kakula nrenyia ne mɔɔ minlinle la anwo ndonwo (11-32)

15  Ɛnee adwuledievolɛma nee ɛtanevolɛma kɔsɔɔti ta ba ɔ nwo ɛkɛ ne batie ye.  Na Falasiima nee mɛla kilehilevolɛma ne mɔ hɔle zo dendɛle bɛ nzo abo kɛ: “Nrenyia ɛhye die ɛtanevolɛma na ɔ nee bɛ di aleɛ.”  Akee ɔhanle ndonwo ɛhye ɔhilele bɛ kɛ:  “Bɛ nuhua boni a lɛ mboane 100 na nuhua ko minli a, ɔnrɛgyakyi 99 ne wɔ fienemgbole ne anu na ɔnrɛhɔkpondɛ ko ne mɔɔ ɛminli la kɔkpula kɛ ɔkɛnwu ye ɛ?  Na saa ɔnwu ye a ɔfa ye ɔto ɔ kɔme zo na ɔ nye die.  Saa ɔba sua nu a, ɔfɛlɛvɛlɛ ɔ gɔnwo mɔ nee ye kpalɛzoamra na ɔka ɔkile bɛ kɛ, ‘Bɛmaa yɛlie yɛ nye, ɔluakɛ menwu me boane ne mɔɔ minlinle la.’  Meka meahile bɛ kɛ zɔhane ala a anyelielɛ bara anwuma wɔ ɛtanevolɛ ko mɔɔ kɛnlu ɔ nwo la anwo tɛla tenlenema 99 mɔɔ bɛngyia anlubɛnwo la a.  “Anzɛɛ raalɛ boni a lɛ delakema* bulu na ko minli a, ɔnrɛzɔ kɛnlaneɛ na ɔnrɛkpoa ye sua ne anu na ɔnrɛkpondɛ ye kpalɛ kɔkpula kɛ ɔkɛnwu ye ɛ?  Na saa ɔnwu ye a, ɔfɛlɛvɛlɛ ɔ gɔnwo mɔ* nee ye kpalɛzoamra na ɔka kɛ, ‘Bɛmaa yɛlie yɛ nye ɔluakɛ menwu me delakema ne mɔɔ minlinle la.’ 10  Meka meahile bɛ kɛ zɔhane ala a, Nyamenle anwumabɔvolɛma di fɛlɛko wɔ ɛtanevolɛ ko mɔɔ kɛnlu ɔ nwo la anwo a.” 11  Akee ɔhanle kɛ: “Ɛnee nrenyia bie lɛ mralɛ mrenyia nwiɔ. 12  Na kakula ne zele ye papa kɛ, ‘Egya, fa me agyapadeɛ ɛdeɛ maa me.’ Yemɔti ɔhyɛle ye ninyɛne ne ɔmaanle bɛ. 13  Mekɛ ekyi guale nu la, ralɛ nrenyia kakula ne boɔboale ye ninyɛne ne amuala anloa na ɔhɔle maanle bie mɔɔ wɔ moamoa la azo na ɔbɔle ɛbɛla mgbane mgbane ɔzɛkyele ye agyapadeɛ ne. 14  Mɔɔ ɔzɛkyele ye debie biala ɔwiele la, ɛhɔne kpole bie zile maanle zɔhane anu, na ɔ nwo hyelele ye. 15  Akee ɔvale ɔ nwo ɔhɔbɔle maanle ne anu sonla ko anwo, na ɔvale ye ɔhɔle ye ɛya nu kɛ ɔhɔnlea agbolike. 16  Na ɔ ti akunlu rale agbolike ne mɔ aleɛ ne mɔɔ bɛdi la azo, noko awie biala amaa ye ɛhwee. 17  “Mekɛ mɔɔ ɔ nye rale ɔ nwo zo la, ɔhanle kɛ: ‘Nea kɛ aleɛ ɛbu me ze ɛkpafoma dɔɔnwo ne anwo zo ɛ, yemɔ a mela ɛke mɔɔ ɛhɔne ɛlɛku me la! 18  Mebadwazo meahɔ me papa anwo lɔ na meaha meahile ye kɛ: “Egya meyɛ ɛtane metia Nyamenle nee ɛdawɔ. 19  Menfɛta kɛ ɛkɛvɛlɛ me ɛ ra bieko. Fa me yɛ wɔ ɛkpafoma ne anu ko.”’ 20  Yemɔti ɔdwazole na ɔhɔle ye papa anwo lɔ. Mekɛ mɔɔ ɔlua moamoa mɔɔ ɔlɛba la, ye papa nwunle ye na ɔ nwo yɛle ye alɔbɔlɛ, na ɔnriandile ɔhɔyɛle ye atuu* na ɔvole ɔ nloa anwo. 21  Akee ɔ ra ne zele ye kɛ, ‘Egya meyɛ ɛtane metia Nyamenle nee ɛdawɔ. Menfɛta kɛ ɛkɛvɛlɛ me ɛ ra bieko.’ 22  Noko papa ne hanle hilele ye ngɛkɛlɛ ne mɔ kɛ, ‘Bɛha bɛ nwo bɛva tɛladeɛ kpalɛ bɛrawula ye, na bɛva kpɔdelera bɛwula ɔ sa na bɛva mgbɔlaboa bɛwula ye. 23  Eza bɛva ɛnlankɛ ralɛ mɔɔ ɛlɔ la bɛrahu ye bɛmaa yɛli na yɛlie yɛ nye, 24  ɔluakɛ me ra ɛhye wule na yera ngoane nu bieko, ɔminlinle na bɛnwu ye.’ Na bɛbɔle ɔ bo bɛliele bɛ nye. 25  “Ɛnee ɔ ra kpanyinli ne ɛhɔ ɛbɔ nu, na mɔɔ ɔlɛba na ɔbikyele sua nu la, ɔdele edwɛne nee agolezilɛ ne. 26  Yemɔti ɔvɛlɛle sonvolɛma ne mɔ ko na ɔbizale ye mɔɔ ɛlɛkɔ zo la. 27  Ɔzele ye kɛ, ‘Ɛ diema ne ɛ ra na wɔ papa ɛhu ɛnlankɛ ralɛ mɔɔ ɛlɔ la ɔluakɛ yezia yera yɛɛ ɔte kpɔkɛ.’* 28  Noko ɔvale ɛya na yeangulo kɛ ɔbawolo ɛkɛ. Yemɔti ye papa vindele na ɔbɔle ɔ bo ɔbodole ye. 29  Ɔbuale ye papa kɛ, ‘Nea! Meva ɛvolɛ dɔɔnwo mezonle wɔ na kenle ko bɔbɔ ɛnle ɛkɛ mɔɔ meandie wɔ edwɛkɛ a, noko ɛtɛmaanle me abɔnkye ekyi ko bɔbɔ kɛ me nee me gɔnwo mɔ yɛva yɛlie yɛ nye. 30  Noko ɛ ra ɛhye mɔɔ ɔ nee tuutuuma ɛzɛkye wɔ ninyɛne rale ala la, wɔhu ɛnlankɛ ralɛ mɔɔ ɛlɔ la wɔmaa ye.’ 31  Na ɔzele ye kɛ, ‘Me ra, wɔmɔ ɛ nee me a wɔ ɛke dahuu a na debie biala mɔɔ melɛ la le wɔ ɛdeɛ. 32  Noko ɔwɔ kɛ yɛdie yɛ nye na yɛdi fɛlɛko ala, ɔluakɛ ɛ diema ne wule na yera ngoane nu bieko; ɔminlinle na bɛnwu ye.’”

Ɔ Bo Edwɛkɛ

Delakema ko le kenle ko ahatualɛ mɔɔ bɛhyɛ nu nna la anu nsa.
Anzɛɛ “ɔ gɔnwo mɔ mraalɛ.”
Anzɛɛ “ɔhɔbɛkale ɔ kɔme.”
Anzɛɛ “ɔ nwo kɔlɔɔnwo.”