Luku 12:1-59

  • Falasiima mgbɔvonle ne (1-3)

  • Bɛzulo Nyamenle, bɛmmasulo menli (4-7)

  • Menli mɔɔ bɔ Kelaese duma (8-12)

  • Sukoavolɛ koasea ne anwo ndonwo ne (13-21)

  • Bɛmmadwenledwenle (22-34)

    • Mboane ekpunli ekyi (32)

  • Ɛzinzalɛ (35-40)

  • Awuke zo neavolɛ nɔhavo nee mɔɔ ɛnli nɔhalɛ (41-48)

  • Tɛ anzodwolɛ, emomu mgbakyemgbakyenu (49-53)

  • Ɔhyia kɛ bɛneɛnlea mekɛ ne anu (54-56)

  • Bɛziezie bɛ avinli (57-59)

12  Akee mɔɔ menli apenle dɔɔnwo rabɔle yiale ye mɔɔ ɛnee bɛhyele zo kpalɛ la, ɔlimoale ɔdendɛle ɔhilele ye ɛdoavolɛma ne kɛ: “Bɛmaa bɛ nye ɛla ɛkɛ na bɛnlea bɛ nwo boɛ wɔ Falasiima mgbɔvonle ne mɔɔ le nabalaba la anwo.  Noko debie biala ɛnle ɛkɛ mɔɔ bɛheda zo mɔɔ ɔnrɛla ali a, anzɛɛ debie biala ɛnle fealeranu mɔɔ bɛnrɛnwu ye a.  Yemɔti, debie biala mɔɔ bɛkɛha ye wɔ awozinli nu la bɛbade ye wienyi nu, yɛɛ mɔɔ bɛkɛha bɛkɛgua bɛ nzo nu wɔ fealeranu la bɛbabɔ ye nolo wɔ azua ti zo.  Me gɔnwo mɔ, eza meka meahile bɛ kɛ, bɛmmasulo bɛdabɛ mɔɔ bɛku sonlabaka ne na yemɔ anzi bɛngola bɛnyɛ debie bieko la.  Noko mebahile bɛ mɔɔ ɔwɔ kɛ bɛsulo ye la: Bɛzulo Ahenle mɔɔ saa ɔku awie a ɔlɛ tumi ɔfuandi ye ɔto Gehenna* la. Ɛhɛe, meka meahile bɛ kɛ bɛzulo Ahenle zɔhane.  Bɛndɔne ngɛsanloma nnu ngapɛlɛ* nwiɔ ɔ? Noko Nyamenle arɛle ɛnvi bɛ nuhua ko bɔbɔ.*  Na bɛ ti zo enrinli bɔbɔ bɛdia ɔ muala. Bɛmmasulo; bɛsonle bolɛ bɛtɛla ngɛsanloma dɔɔnwo.  “Meka meahile bɛ kɛ, awie biala mɔɔ bɔ me duma wɔ menli nyunlu la, sonla Ra ne noko babɔ ye duma wɔ Nyamenle anwumabɔvolɛma ne anyunlu.  Noko awie biala mɔɔ kpo me wɔ menli nyunlu la bɛbakpo ye wɔ Nyamenle anwumabɔvolɛma ne anyunlu. 10  Na awie biala mɔɔ kɛha edwɛkɛ bie kɛtia sonla Ra ne la, bɛbava bɛahyɛ ye, noko awie biala mɔɔ kɛdendɛ kɛtia sunsum nwuanzanwuanza ne la, bɛnrɛva bɛnrɛhyɛ ye. 11  Saa bɛfa bɛ bɛkɔ nyianu azua nu, amɛnladoma anzɛɛ arane mgbanyima nyunlu a, bɛmmadwenledwenle kɛzi bɛbalie bɛ nwo nee mɔɔ bɛbaha la anwo, 12  ɔluakɛ sunsum nwuanzanwuanza ne bahile bɛ mɔɔ ɔwɔ kɛ bɛka la wɔ dɔnehwele ne anu.” 13  Akee awie bie mɔɔ wɔ menli ne anu la zele ye kɛ: “Kilehilevolɛ, ka kile me diema ne maa ɔ nee me ɛhyɛ agyapadeɛ ne.” 14  Ɔbuale ye kɛ: “Ayi, nwane a yele me ndɛnebuavolɛ anzɛɛ awie mɔɔ kyɛ ninyɛne maa bɛ mu nwiɔ a?” 15  Akee ɔzele bɛ kɛ: “Bɛmaa bɛ nye ɛla ɛkɛ na bɛnlea bɛ nwo boɛ wɔ anyebolo biala anwo, ɔluakɛ saa sonla nyia ɔ nwo bɔbɔ a, ye ninyɛne ne ɛnrɛhola ɛnrɛmaa ye ngoane.” 16  Ɛhye maanle ɔyɛle ndonwo bie ɔhilele bɛ kɛ: “Sukoavolɛ bie ɛya nu ninyɛne zole dɔɔnwo. 17  Yemɔti ɔbɔle ɔ bo ɔzuzule nwo wɔ ye ahonle nu kɛ, ‘Duzu a menyɛ a, ɔluakɛ menlɛ ɛleka mɔɔ mebava me ninyɛne ne mɔ meagua a?’ 18  Akee ɔhanle kɛ, ‘Ɛhye a mebayɛ a: Mebabubu me bonwolo ne mɔ na meazi bɛ mgbole, na meaboɔboa me aleɛ nee me ninyɛne kɔsɔɔti anloa wɔ ɛkɛ, 19  na meaha meahile me nwo* kɛ: “Ɛlɛ ninyɛne mgbalɛ dɔɔnwo mɔɔ wɔva wɔzie mɔɔ ɔbaza wɔ ɛvolɛ dɔɔnwo a; die ɛ menle, di, no, na die ɛ nye.”’ 20  Noko Nyamenle zele ye kɛ, ‘Ɛnlɛ adwenle, ɛnɛ nɔe bɛbalie wɔ ngoane* bɛavi ɛ sa nu. Nwane a bava ninyɛne mɔɔ wɔva wɔzie la ɛ?’ 21  Kɛ awie mɔɔ kpondɛ anwonyia sie maa ɔ nwo na ɔnle sukoavolɛ wɔ Nyamenle anyunlu la de la ɛne.” 22  Akee ɔzele ye ɛdoavolɛma ne kɛ: “Ɛhye ati meka meahile bɛ kɛ, bɛmmadwenledwenle bɛ ngoane* nwo kɛ duzu a bɛbali anzɛɛ bɛ sonlabaka ne anwo kɛ duzu a bɛbaheda a. 23  Ɔluakɛ ngoane* hyia tɛla aleɛ yɛɛ sonlabaka ne hyia tɛla ɛdanlɛ. 24  Bɛnlea ahɔhɔsɛlɛ: Bɛnlua yɛɛ bɛmbu; bɛnlɛ bonwolo anzɛɛ ɛleka mɔɔ bɛfa aleɛ bɛsie; noko Nyamenle maa bɛ aleɛ. Asoo bɛ nwo ɛngyia ɛndɛla nloma ɔ? 25  Bɛ nuhua boni a dwenledwenle a ɔbahola yeava mekɛ ekyi yeaboka ye ngoane mekɛ nwo a? 26  Yemɔti saa bɛnrɛhola bɛnrɛyɛ deɛ nretee ɛhye a, ɛnee duzu ati a bɛdwenledwenle ninyɛne mɔɔ ɛha la anwo a? 27  Bɛnlea kɛzi ɛbɔ nu aloa nyi la: Bɛnyɛ gyima anzɛɛ bɛnnwo ndanlɛ; noko meka meahile bɛ kɛ wɔ Sɔlɔmɔn anyunlunyia ne kɔsɔɔti anu bɔbɔ, yeanziezie ɔ nwo kɛ aloa ɛhye mɔ anu ko la. 28  Yemɔti, saa Nyamenle siezie ɛbɔ nu ndile mɔɔ ɛnɛ bɛfifi a ɛhyema ɛnee bɛyela bɛ la a, asoo ɔnrɛheda bɛdabɛ noko ndanlɛ, bɛmɛ mɔɔ bɛ diedi le ekyi a! 29  Yemɔti bɛgyakyi mɔɔ bɛbali nee mɔɔ bɛbanlo la ɛkpondɛlɛ na bɛgyakyi adwenleadwenle dɔɔnwo; 30  ɔluakɛ ninyɛne ɛhye mɔ a maanle maanle mɔɔ wɔ ewiade la anye ɛbolo ɛlɛkpondɛ a, noko bɛ Ze ne ze kɛ bɛhyia ninyɛne ɛhye mɔ anwo. 31  Emomu, bɛhɔ zo bɛkpondɛ ye Belemgbunlililɛ ne na bɛbava ninyɛne ɛhye mɔ bɛaboka bɛ nwo. 32  “Bɛmmasulo, mboane ekpunli ekyi, ɔluakɛ bɛ Ze ɛkponle zo kɛ ɔbava Belemgbunlililɛ ne yeamaa bɛ. 33  Bɛdɔne bɛ nwo ninyɛne na bɛhyɛ ehyiavolɛma debie. Bɛyɛ ezukoa kodoku mɔɔ ɛnzɛkye la bɛmaa bɛ nwo, anwonyia mɔɔ ɛmminli ɛlɛ la wɔ anwuma, ɛleka mɔɔ awule ɛngola ɛmbikye nwo na ngɛkɛba ɛngola ɛnzɛkye ye la. 34  Ɔluakɛ ɛleka mɔɔ bɛ anwonyia wɔ la, ɛkɛ ne a bɛ ahonle noko wɔ a. 35  “Bɛziezie bɛ nwo bɛmaa gyima biala* na bɛmaa bɛ ahɛnlaneɛ ɛda, 36  na bɛyɛ kɛ menli mɔɔ ɛlɛkendɛ kɛ bɛ menle kɛvi atɔfolɛlielɛ bo kɛra la, amaa saa ɔbabɔ anlenkɛ ne anu a, bɛahola bɛabuke ye ɛkɛ ne ala. 37  Anyelielɛ a le ngɛkɛlɛ ɛhye mɔ mɔɔ bɛ menle ne barado bɛ kɛ bɛlɛsinza la! Nɔhalɛ nu meka meahile bɛ kɛ, ɔbamaa bɛadɛnlɛndɛnla ɛkponle nwo na yeaziezie ɔ nwo* yeamaa bɛ aleɛ. 38  Na saa ɔba nɔsolɛ dɔne ngɔnla kɔdwu nɔɔzo bulu nee nwiɔ anzɛɛ nɔɔzo bulu nee nwiɔ kɔdwu aleɛbahye dɔne nsa na ɔbato bɛ kɛ bɛziezie bɛ nwo a, anyelielɛ a le bɛ! 39  Noko bɛnwu ɛhye, saa suamenle ne ze mekɛ mɔɔ awule ne bara la a, anrɛɛ ɔnrɛmaa ɔnrɛbu ye sua ne ɔnrɛwolo nu. 40  Bɛdabɛ noko bɛzinza, ɔluakɛ sonla Ra ne ɛlɛba wɔ mekɛ mɔɔ bɛ nye ɛnla la.” 41  Na Pita hanle kɛ: “Awulae, yɛ ngome a ɛlɛyɛ ndonwo ɛhye wɔahile yɛ a anzɛɛ awie biala ɔ?” 42  Na Awulae hanle kɛ: “Ɛnee akee nwane a le awuke zo neavolɛ nɔhavo mɔɔ ze nrɛlɛbɛ, mɔɔ ɔ menle bakpa ye kɛ ɔnlea ye sonvolɛma ne anwo zo na ɔmaa bɛ aleɛ wɔ mekɛ kpalɛ nu la? 43  Anyelielɛ a le akɛlɛ ne mɔɔ ɔ menle ne barado ye kɛ ɔlɛyɛ zɔ la! 44  Nɔhalɛ nu meka meahile bɛ, ɔbamaa yeanlea ye ninyɛne kɔsɔɔti azo. 45  Na saa akɛlɛ zɔhane ka ye wɔ ye ahonle nu kɛ, ‘Me menle ɛlɛkyɛ,’ na ɔbɔ ɔ bo ɔbo sonvolɛ mrenyia nee mraalɛ ne mɔ na ɔdi, ɔno na ɔbo a, 46  zɔhane akɛlɛ ne amenle bara kenle mɔɔ ɔ nye ɛnla nee dɔnehwele mɔɔ ɔnze la anu, na ɔbahwe ɔ nzo kpole kpalɛ na yeava ye yeado ɛleka mɔɔ bɛdabɛ mɔɔ bɛnli nɔhalɛ la wɔ la. 47  Akee bɛbabila akɛlɛ zɔhane mɔɔ ɔze mɔɔ ɔ menle kulo noko yeanziezie ɔ nwo anzɛɛ yeanyɛ mɔɔ ɔhanle* la mbaka dɔɔnwo. 48  Noko nuhua ne mɔɔ ɔnze na ɔkɛyɛ debie mɔɔ ɔfɛta kɛ bɛbo ye la bɛbabila ye mbaka ekyi. Nɔhalɛ nu, awie mɔɔ bɛmaa ye dɔɔnwo la bɛbabiza dɔɔnwo bɛavi ye ɛkɛ, na awie mɔɔ bɛva dɔɔnwo bɛwula ɔ sa nu la bɛbalie dɔɔnwo kpalɛ bɛavi ye ɛkɛ. 49  “Membale kɛ mebado senle wɔ azɛlɛ ye azo, na kɛmɔ yezɔ dɛbadɛba la ati duzu bieko a mekpondɛ a? 50  Nɔhalɛ nu, melɛ ɛzɔnenlɛ bie mebazɔne, na saa ɔtɛwiele a me nwo ɛtɛtɔle me! 51  Bɛdwenle kɛ menvale anzodwolɛ membale azɛlɛ ye azo ɔ? Kyɛkyɛ, emomu, meka meahile bɛ kɛ, mgbakyemgbakyenu ɔ. 52  Ɔluakɛ ɔvi ɛnɛ mɔɔ kɔ la saa menli nnu wɔ awuke ko anu a bɛ nu bahyɛ, nsa badwazo atia nwiɔ yɛɛ nwiɔ badwazo atia nsa. 53  Mgbakyemgbakyenu bara, papa badwazo atia ralɛ nrenyia na ralɛ nrenyia adwazo atia papa, mame badwazo atia ralɛ raalɛ na ralɛ raalɛ adwazo atia mame, ase badwazo atia agyalɛ raalɛ na agyalɛ raalɛ adwazo atia ase.” 54  Eza ɔzele menli ne kɛ: “Saa bɛnwu kɛ amungu ɛvinde aduduleɛ a, ɛkɛ ne ala bɛka kɛ, ‘Ahumu badu,’ na ɔyɛ zɔ. 55  Na saa bɛnwu kɛ nyiakɛ anwoma ne ɛlɛbɔ a, bɛka kɛ, ‘Wuluwulu bara,’ na ɔyɛ zɔ. 56  Nabalabama, bɛze kɛzi bɛkilehile azɛlɛ ye azo nee anwomanyunlu ninyɛne nu la, noko duzu ati a bɛngola bɛngile mekɛ ɛhye abo ɛ? 57  Duzu ati a bɛngola bɛmbua mɔɔ le tenlene la noko anwo ndɛne bɛmmaa bɛ nwo ɛ? 58  Kɛ neazo la, saa awie sɛma wɔ na ɛ nee ye lua adenle nu ɛlɛkɔ tumivolɛ ne anyunlu a, ɛ nee ye bɛziezie bɛ avinli amaa yeanva wɔ yeammaa ndɛnebuavolɛ ne, na ndɛnebuavolɛ ne anva wɔ ammaa sinzavolɛ ne, na sinzavolɛ ne ando wɔ efiade. 59  Meka meahile wɔ kɛ, ɛnrɛvi ɛkɛ kyesɛ ɛtua ezukoa ne amuala mɔɔ ekyi* bɔbɔ ɛnga a.”

Ɔ Bo Edwɛkɛ

Nea Edwɛkɛbohilelɛ.
Giliki aneɛ nu, “assarion,” ɛhye le ezukoa ekyi mɔɔ bɛfa bɛtua awie mɔɔ kɛyɛ gyima mitini 45 kakɛ la.
Anzɛɛ “ɛmbu ɔ nye ɛngua bɛ nuhua ko bɔbɔ azo.”
Anzɛɛ “me ɛkɛla.”
Anzɛɛ “ɛkɛla.”
Anzɛɛ “ɛkɛla.”
Anzɛɛ “ɛkɛla ne.”
Giliki aneɛ nu, “bɛbɛza.”
Anzɛɛ “na yeabɛza.”
Anzɛɛ “mɔɔ ɔkulo.”
Giliki aneɛ nu, “koadelane.”