Luku 10:1-42

  • Gyisɛse soa 70 ne (1-12)

  • Azua mɔɔ anlu bɛ nwo la gyakɔyɛlɛ (13-16)

  • Menli 70 ne ziale rale (17-20)

  • Gyisɛse ye ɔ Ze ayɛlɛ kɛ ɔdie bɛlɛvoma (21-24)

  • Samɛleanli agɔnwolɛ kpalɛ ne anwo ndonwo (25-37)

  • Gyisɛse kpɔla Maata nee Mɛle (38-42)

10  Ɛhye mɔ anzi Awulae yele ye ɛdoavolɛma ne anu 70 na ɔzoanle bɛ nwiɔ nwiɔ ɔmaanle bɛlimoale ɔ nyunlu bɛhɔle sua biala azo nee ɛleka biala mɔɔ ɔdaye mumua ne ɔbahɔ ɛkɛ la.  Akee ɔzele bɛ kɛ: “Nɔhalɛ nu, ma ɛdelɛ gyima ne le kpole, noko gyimayɛvoma ne le ekyi. Yemɔti bɛzɛlɛ ma ɛdelɛ gyima ne Amenle kɛ ɔmaa gyimayɛvoma ɛrɛla ye ma ɛdelɛ gyima ne anu.  Bɛhɔ! Nea! melɛsoa bɛ kɛ mboane la wɔ bedi avinli.  Bɛmmafa ezukoa kodoku anzɛɛ aleɛ kodoku anzɛɛ mgbɔlaboa, yɛɛ bɛmmabiza awie biala ahye* wɔ adenle nu.  Awuke biala mɔɔ bɛbahɔ nu wɔ ɛleka biala la, bɛlimoa bɛha kɛ: ‘Anzodwolɛ ɛrɛla awuke ye anu.’  Na saa awie mɔɔ kulo anzodwolɛ la wɔ ɛkɛ a, bɛ anzodwolɛ ne baha ye. Na saa bie ɛnle ɛkɛ a ɔbazia yeara bɛ ɛkɛ.  Yemɔti bɛdɛnla awuke ne anu, bɛli na bɛnlo debie biala mɔɔ bɛbava bɛamaa bɛ la, ɔluakɛ gyimayɛvolɛ ahatualɛ fɛta ye. Bɛmmatu bɛfi awuke ko anu bɛkɔ fofolɛ nu.  “Bieko, sua biala mɔɔ bɛbahɔ zo wɔ ɛleka biala na bɛkɛlie bɛ la, bɛli mɔɔ bɛbava bɛamaa bɛ la  na bɛyɛ wuliravolɛma mɔɔ wɔ ɛkɛ la ayile na bɛze bɛ kɛ: ‘Nyamenle Belemgbunlililɛ ne ɛbikye bɛ.’ 10  Noko sua biala mɔɔ bɛbahɔ zo wɔ ɛleka biala na bɛanlie bɛ la, bɛhɔ ye awɔdenle ne mɔ azo na bɛha kɛ: 11  ‘Bɛ sua ye azo munlutu bɔbɔ mɔɔ guale yɛ gyakɛ anwo la, yɛkpokpo yɛagua bɛ ti zo. Noko bɛnwu ye kɛ, Nyamenle Belemgbunlililɛ ne ɛbikye.’ 12  Noko meka meahile bɛ, wɔ kenle zɔhane, ɔbayɛ bɛtɛɛ yeamaa Sodɔm yeadɛla sua zɔhane. 13  “Koleezen, gyakɔ! Bɛteseeyeda, gyakɔ! ɔluakɛ nwanwane gyima mɔɔ bɛyɛle ye wɔ zo la, saa bɛyɛle ye wɔ Taya nee Saedɛn a, anrɛɛ bɛnlunle bɛ nwo bɛhedale ɛrele na bɛdɛnlanle nzonle nu dɛbadɛba. 14  Yemɔti ɔbayɛ bɛtɛɛ yeamaa Taya nee Saedɛn wɔ ndɛnebualɛ ne anu yeadɛla bɛ. 15  Na wɔmɔ Kapɛnayɛm, bɛbamaa wɔ zo bɛahɔ anwuma ɔ? Nla* nu a ɛbadwu wɔahɔ a! 16  “Awie biala mɔɔ kɛdie bɛ la ɛdie me. Yɛɛ awie biala mɔ kɛkpo bɛ la ɛkpo medame noko. Eza noko awie biala mɔɔ kɛkpo me la ɛkpo Ahenle mɔɔ zoanle me la.” 17  Akee 70 ne vale anyelielɛ rahanle kɛ: “Awulae, saa yɛbɔ wɔ duma a sunsum ɛtane ne mɔ bɔbɔ tie yɛ.” 18  Ɔdele ɛhye la ɔhanle kɛ: “Menwu Seetan kɛ ɔvi anwuma yerade aze dɛbadɛba kɛ ɛsɛlɛmanye la. 19  Bɛnlea! Memaa bɛ tumi kɛ bɛtietia nwɔlɛ nee nyamenleakɛlɛ nwo zo, yɛɛ memaa bɛ tumi wɔ kpɔvolɛ ne anwo zo, na debie biala ɛnrɛyɛ bɛ. 20  Noko, bɛmmadi fɛlɛko kɛ sunsum ɛtane ne mɔ tie bɛ la, emomu bɛli fɛlɛko kɛ bɛhɛlɛ bɛ aluma wɔ anwuma.” 21  Mekɛ zɔhane sunsum nwuanzanwuanza ne maanle Gyisɛse lile fɛlɛko na ɔzele kɛ: “Egya, anwuma nee azɛlɛ Menle, meye wɔ ayɛlɛ wɔ bagua nu, ɔluakɛ wɔva ninyɛne ɛhye mɔ wɔvea nrɛlɛbɛvolɛma nee nwomama na wɔye wɔhile ngakula. Ɛhɛe, O Egya, ɔluakɛ ɛnee ɛhye a le adenle mɔɔ ɛ nye die nwo a. 22  Me Ze ɛva ninyɛne kɔsɔɔti ɛmaa me, na awie biala ɛnze Ralɛ ne sonla holɛ kɛ Selɛ ne, yɛɛ awie biala ɛnze Selɛ ne sonla holɛ kɛ Ralɛ ne nee awie biala mɔɔ Ralɛ ne kulo kɛ ɔda ye ali ɔkile ye la.” 23  Akee ɔhakyile ɔ nwo wɔ ɛdoavolɛ ne mɔ anwo ɛkɛ na ɔhanle ɔhilele bɛ wɔ ahane kɛ: “Anyelielɛ a le bɛdabɛ mɔɔ bɛnwu ninyɛne mɔɔ bɛnwu ye la. 24  Na meka meahile bɛ kɛ, ngapezoma nee arelemgbunli dɔɔnwo hulole kɛ bɛkɛnwu ninyɛne mɔɔ bɛnwu ye la noko bɛannwu ye, na bɛkɛde mɔɔ bɛde la noko bɛande.” 25  Na nea! nrenyia bie mɔɔ ze Mɛla ne kpalɛ la dwazole gyinlanle kɛ ɔsɔ ye yeanlea na ɔbizale kɛ: “Kilehilevolɛ, duzu a ɔwɔ kɛ meyɛ na meanyia dahuu ngoane a?” 26  Ɔzele ye kɛ: “Duzu a bɛhɛlɛ ye wɔ Mɛla ne anu a? Kɛzi ɛte mɔɔ ɛkenga la abo ɛ?” 27  Ɔbuale ye kɛ: “‘Fa wɔ ahonle muala nee wɔ ɛkɛla* muala nee wɔ anwosesebɛ muala nee wɔ adwenle muala kulo Gyihova* wɔ Nyamenle ne’ na ‘kulo ɛ gɔnwo kɛ ɛ nwo.’” 28  Ɔzele ye kɛ: “Wɔbua ye kpalɛ; kɔ zo yɛ ɛhye na ɛbanyia ngoane.” 29  Noko kɛmɔ ɛnee nrenyia ne kulo kɛ ɔbua ɔ nwo benle la ati, ɔbizale Gyisɛse kɛ: “Nwane bɔbɔ a le me gɔnwo a?” 30  Gyisɛse buale ye kɛ: “Ɛnee nrenyia bie vi Gyɛlusalɛm ɛlɛtolo ahɔ Gyɛleko na ɔhɔdɔle nwule avinli, bɛliele ɔ nwo ninyɛne kɔsɔɔti, bɛbole ye, na bɛgyakyile ye ɛkɛ ne bɛhɔle, na ɛnee asɛɛ yewu. 31  Ɔrale ye kɛ ɛsɔfo bie hɔvale zɔhane adenle ne azo, noko mekɛ mɔɔ ɔnwunle ye la ɔvale ahane ɔhɔle. 32  Zɔhane ala a Livaenli bie noko dwule ɛkɛ na ɔnwunle ye la, ɔvale ahane ɔhɔle a. 33  Noko Samɛleanli bie mɔɔ lua adenle ne azo la radole ye, mɔɔ ɔnwunle ye la ɔ nwo yɛle ye alɔbɔlɛ. 34  Yemɔti ɔbikyele ye, ɔvale nwole nee nwanye ɔguale ye nganlɛ ne mɔ anu na ɔkyekyele. Akee ɔvale ye ɔdɛnlanle ye asoaso ne azo na ɔvale ye ɔhɔle nyɛvolɛ sua bie anu ɔhɔnleanle ye. 35  Aleɛ hyenle la, ɔvale denale* nwiɔ ɔmaanle nyɛvolɛ sua ne amenle na ɔhanle kɛ: ‘Nea ye na kakɛ biala mɔɔ ɛbabɔ ye ɔ nzi la, saa mesia meba a mebadua meamaa wɔ.’ 36  Menli nsa ɛhye mɔ anu boni a ɛsuzu kɛ ɔyɛle ɔ nwo agɔnwolɛ ɔmaanle nrenyia ne mɔɔ hɔdɔle nwule ne mɔ avinli la ɛ?” 37  Ɔbuale kɛ: “Nuhua ne mɔɔ ɔzele ye anwunvɔne la ɔ.” Akee Gyisɛse buale ye kɛ: “Ɛdawɔ noko kɔyɛ ye zɔhane ala.” 38  Mɔɔ bɛlɛkɔ la, ɔhɔle namule bie azo. Ɛnee raalɛ bie mɔɔ bɛfɛlɛ ye Maata la wɔ ɛkɛ na ɔliele ye wɔ ye sua nu. 39  Ɛnee raalɛ ɛhye lɛ ɔ diema raalɛ ko mɔɔ bɛfɛlɛ ye Mɛle, ɔdɛnlanle Awulae anwo ɛkɛ na ɔdiele ye edwɛkɛ ne. 40  Noko Maata ɛdeɛ, ɛnee gyima dɔɔnwo ɛli ye adwenle. Yemɔti ɔrale ɔ nwo ɛkɛ ne na ɔhanle kɛ: “Awulae, ɛnnwu kɛ me diema ne ɛgyakyi ninyɛne ne amuala ɛgua me sa zo ɔ? Ka kile ye kɛ ɔraboa me.” 41  Awulae buale ye kɛ: “Maata, Maata, ninyɛne dɔɔnwo gyegye wɔ na ɔmaa ɛdwenledwenle. 42  Ninyɛne ekyi bie anzɛɛ ko ala a nwolɛ hyia a. Mɛle ɛkpa nu ɛva kpalɛ ne na bɛnrɛlie bɛnrɛvi ɔ sa nu.”

Ɔ Bo Edwɛkɛ

Anzɛɛ “bɛmmagyinla bɛbiza ahye.”
Anzɛɛ “Hades,” ɛhye kile, alesama nla. Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Denale ko le gyimayɛvo kenle ko ahatualɛ.