Hibuluma 6:1-20

  • Bɛnyi sunsum nu (1-3)

  • Menli mɔɔ kɛhwe bɛ nwo la bɔ Ralɛ ne baka nu bieko (4-8)

  • Maa wɔ anyelazo ɛzi pi (9-12)

  • Nyamenle ɛwɔkɛ ba nu (13-20)

    • Nyamenle ɛwɔkɛ nee ndane ɛngakyi (17, 18)

6  Zɔhane ati, kɛkala mɔɔ yɛzukoa Kelaese anwo mɔlebɛbo ngilehilelɛ ne yɛwie la, bɛmaa yɛbɔ mɔdenle yɛnyi sunsum nu, na yɛando adiabo bieko, mɔɔ le kɛ, yɛnu yɛ nwo wɔ gyima funli nwo nee Nyamenle anu diedi,  ɛzɔnenlɛ ngakyile nwo ngilehilelɛ nee ɛsalɛ mɔɔ bɛfa bɛgua bɛ nwo zo, ewudwazo nee dahuu ndɛnebualɛ.  Na ɛhye a saa Nyamenle maa adenle a, yɛbayɛ a.  Noko bɛdabɛ mɔɔ bɛnwunle wienyi ne mekɛ bie na bɛzɔ anwuma ahyɛlɛdeɛ ne bɛnlea na bɛnyia sunsum nwuanzanwuanza ne bie  na bɛzɔ Nyamenle edwɛkɛ ne mɔɔ le kpalɛ la nee ewiade ne mɔɔ ɛlɛba la* tumi ne bɛnlea,  na bɛhwe bɛ nwo la, yɛnrɛhola yɛnrɛmaa bɛnrɛnlu bɛ nwo bieko, ɔluakɛ bɛbɔ Nyamenle Ara ne baka nu bieko bɛmaa bɛ nwo, na bɛgua ɔ nyunlu aze wɔ bagua nu.  Ɔluakɛ azɛlɛ nyia nyilalɛ fi Nyamenle ɛkɛ wɔ mekɛ mɔɔ ɔkɛmeme nzule mɔɔ ta tɔ gua zo la, na ɔso ma kpalɛ ɔmaa bɛdabɛ mɔɔ bɛyɛ zolɛ egyinli la.  Noko saa zolɛ fifi mbowule nee ndile a, bɛkpo na ɔfɛlɛvɛlɛ munzule, na awieleɛ bɔkɔɔ ne bɛbayela ye.  Noko alɔvolɛ, wɔ bɛ afoa nu, yɛlɛtendɛ wɔ adenle zɛhae azo bɔbɔ ɛdeɛ, noko yɛlɛ anwodozo kɛ ɔle ninyɛne mgbalɛ, ninyɛne mɔɔ maa bɛnyia ngoanelielɛ a. 10  Ɔluakɛ Nyamenle ɛnle nzisi mɔɔ ɔ rɛle bavi bɛ gyima nee ɛlɔlɛ mɔɔ bɛlale ye ali wɔ ye duma ne anwo bɛzonlenle nwuanzanwuanzama na bɛlɛkɔ zo bɛazonle bɛ la. 11  Noko yɛkulo kɛ bɛ nuhua ko biala yele ɔ nwo yɛ gyima ɛsesebɛ ko ne ala bie amaa bɛanyia anyelazo ne anu anwodozo bɔkɔɔ bɛahɔ awieleɛ, 12  na bɛanyɛ mgbovonle, emomu bɛazukoa bɛdabɛ mɔɔ bɛdua diedi nee abotane zo bɛnyia ɛwɔkɛ ne mɔ la. 13  Na mekɛ mɔɔ Nyamenle bɔle Ebileham ɛwɔkɛ la, kɛmɔ awie biala ɛnle ɛkɛ mɔɔ le kpole tɛla ye mɔɔ ɔbava ye yeaha ndane la ati, ɔvale ɔdaye mumua ne ɔ nwo ɔhanle ndane, 14  ɔse: “Nɔhalɛ nu, mebayila wɔ, yɛɛ nɔhalɛ nu mebamaa ɛ bo zo amra ayɛ dɔɔnwo.” 15  Yemɔti mɔɔ Ebileham nyianle abotane la, ɔ sa hanle ɛwɔkɛ ɛhye. 16  Menli fa awie mɔɔ tɛla bɛ la ka ndane, na bɛ ndane ne pɛ kpolerazulɛ biala azo, ɔluakɛ ɔle mɛla adenle zo daselɛ ɔmaa bɛ. 17  Wɔ adenle ɛhye ala azo, mekɛ mɔɔ Nyamenle zile kpɔkɛ kɛ ɔmaa ɛwɔkɛ ne koliagyama anwu ye wienyi kɛ ye bodane* ɛngakyi ɛlɛ la, ɔvale ndane ɔzile zo,* 18  amaa yɛdayɛ mɔɔ yɛnriandi yɛhɔ ɛvealeka ne anu la yɛalua ninyɛne nwiɔ mɔɔ ɛngakyi na Nyamenle ɛngola ɛmbɔ adalɛ wɔ nu la azo yɛanyia anwosesebɛmaanlɛ mɔɔ anu yɛ se la, na yɛazɔ anyelazo ne mɔɔ bɛva bɛzie yɛ nyunlu la anu kpundii. 19  Anyelazo ɛhye mɔɔ yɛlɛ la le kɛ sɛkɛ maa yɛ ɛkɛla,* ɔgyi ye pi yɛɛ ɔgyi ye kpundii, na ɔwolo mgbɛnu ɛdanlɛ ne anu, 20  ɛleka ɛhye a Gyisɛse ɛli yɛ nyunlu ɛwolo ɛmaa yɛ a, ahenle mɔɔ ɛrayɛ ɛsɔfo kpanyinli dahuu kɛ Mɛlekezidɛke la.

Ɔ Bo Edwɛkɛ

Anzɛɛ “mekɛ ne mɔɔ ɛlɛba la.” Nea Edwɛkɛbohilelɛ.
Anzɛɛ “folɛdulɛ.”
Anzɛɛ “ɔbokale nwo.” Giliki aneɛ nu, “ɔlile agyinlanu.”
Anzɛɛ “maa yɛ ngoane.”