Hibuluma 5:1-14

  • Gyisɛse tɛla alesama ɛsɔfo mgbanyinli (1-10)

    • Kɛ Mɛlekezidɛke la (6, 10)

    • Ɔzukoale tieyɛ wɔ amaneɛnwunlɛ nu (8)

    • Dahuu ngoane lua ɔ nwo zo (9)

  • Menli mɔɔ ɛtɛnyinle anwo kɔkɔbɔlɛ (11-14)

5  Na ɛsɔfo kpanyinli biala mɔɔ bɛye ye bɛfi menli avinli la, bɛkpa ye kɛ ɔyɛ Nyamenle gyima ɔmaa menli, amaa yeava ɛtane nwo ahyɛlɛdeɛ nee afɔlebɔlɛ yeamaa.  Ɔkola ɔ nee bɛdabɛ mɔɔ bɛnze na bɛfo* la di ye bɛtɛɛ ɔluakɛ ɔdaye noko ɔlɛ ye sinlidɔlɛ,  na ɛhye ati ɔwɔ kɛ ɔbɔ ɔdaye mumua ne ye ɛtane nwo afɔle kɛ mɔɔ ɔbɔ ɔmaa menli ne la.  Awie ɛngola ɛnva enililɛ ɛhye ɛmmaa ɔ nwo, kyesɛ Nyamenle ɛvɛlɛ ye na ɔ sa aha ye kɛ mɔɔ ɔvɛlɛle Aalɔn la.  Zɔhane ala a Kelaese anwula ɔ nwo anyunlunyia anyɛ ɔ nwo ɛsɔfo kpanyinli a, emomu Ahenle mɔɔ wulale ye anyunlunyia la zele ye kɛ: “Ɛle me ra; ɛnɛ merayɛ ɛ ze.”  Eza ɔka ye wɔ ɛleka fofolɛ kɛ, “Ɛle ɛsɔfo dahuu kɛ Mɛlekezidɛke la.”  Mekɛ mɔɔ Kelaese wɔ azɛlɛ ye azo la,* ɔvale ɛzunlɛ nee nyane ɔdeɛdeanle nu ɔvale ye modolɛ nee nzɛlɛlɛ ɔdole Ahenle mɔɔ kola die ye fi ewule nu la anyunlu, na ye nyamenlezulolɛ ti ɔdiele ye.  Ɔle ralɛ bɔbɔ ɛdeɛ, noko ɔzukoale tieyɛ ɔvile amaneɛ mɔɔ ɔnwunle ye la anu.  Na mekɛ mɔɔ ɔlile munli la, ɔrayɛle awie mɔɔ bɛdabɛ mɔɔ bɛtie ye la amuala balua ɔ nwo zo anyia dahuu ngoanelielɛ a, 10  ɔluakɛ Nyamenle ɛkpa ye ɛsɔfo kpanyinli kɛ Mɛlekezidɛke la. 11  Yɛlɛ ɔ nwo edwɛkɛ dɔɔnwo yɛka, noko ɔyɛ se kɛ yɛbahilehile nu ɔluakɛ ɔkyɛ na bɛade edwɛkɛ bo. 12  Na kɛkala* anrɛɛ ɔwɔ kɛ bɛyɛ kilehilevolɛma, noko bɛtɛkyia awie mɔɔ bahilehile bɛ Nyamenle edwɛkɛ nwuanzanwuanza ne anu ninyɛne mɔɔ limoa la, na bɛyɛ kɛ menli mɔɔ hyia nyɛfonzule na tɛ aleɛ mɔɔ anu yɛ ɛlomboɛ la. 13  Na awie biala mɔɔ kɔ zo no nyɛfonzule la ɛnze tenlene edwɛkɛ ne, ɔluakɛ ɔtɛde kakula. 14  Noko aleɛ mɔɔ anu yɛ ɛlomboɛ la wɔ ɛkɛ maa menli mɔɔ bɛnyi, bɛdabɛ mɔɔ bɛfa bɛ adwenle bɛyɛ gyima la ati, bɛtete ye na ɔkola ɔnwu ngakyile mɔɔ wɔ kpalɛ nee ɛtane nu la.

Ɔ Bo Edwɛkɛ

Anzɛɛ “bɛminli.”
Giliki aneɛ nu, “mekɛ mɔɔ ɔwɔ nwonane nu la.”
Giliki aneɛ nu, “mekɛ ne ati.”