Hibuluma 3:1-19

  • Gyisɛse tɛla Mosisi (1-6)

    • Nyamenle yɛle ninyɛne kɔsɔɔti (4)

  • Diedi mɔɔ bɛnlɛ la anwo kɔkɔbɔlɛ (7-19)

    • “Ɛnɛ, saa bɛte ɔ ne a” (7, 15)

3  Zɔhane ati, mediema mɔɔ bɛ nwo te mɔɔ bɛvɛlɛ bɛ kɛ bɛbahɔ anwuma la, bɛdwenle ɛzoanvolɛ nee ɛsɔfo kpanyinli ne mɔɔ yɛdie ye yɛto nu* la anwo—Gyisɛse.  Ɔlile nɔhalɛ ɔmaanle Ahenle mɔɔ kpale ye la, kɛ mɔɔ Mosisi noko lile Ahenle zɔhane sua ne anu amuala nɔhalɛ la.  Na bɛbu ye* kɛ ɔfɛta anyunlunyia ɔtɛla Mosisi, ɔluakɛ awie mɔɔ si sua la lɛ enililɛ tɛla sua mumua ne.  Nɔhalɛ nu, sua biala, awie a si a na ahenle mɔɔ yɛle ninyɛne kɔsɔɔti la a le Nyamenle.  Na Mosisi lile Ahenle zɔhane sua ne anu amuala nɔhalɛ kɛ sonvolɛ ɔvale ɔlile ninyɛne mɔɔ bɛbaha nwolɛ edwɛkɛ nzinlii la anwo daselɛ,  na Kelaese ɛdeɛ, ɔlile nɔhalɛ wɔ Nyamenle sua nu ɛkɛ ne kɛ ralɛ. Nɔhalɛ nu, yɛle Ye sua, noko kyesɛ yɛkɔ zo yɛfa akɛnrasesebɛ yɛtendɛ na yɛsɔ yɛ anyelazo ne mɔɔ yɛfa yɛtu yɛ nwo la anu kpundii yɛkɔ awieleɛ.  Ɛhye ati sunsum nwuanzanwuanza ne ka kɛ, “Ɛnɛ, saa bɛte ɔ ne a,  bɛmmakpunli bɛ ahonle kɛ mekɛ mɔɔ bɛhanle me ɛya, kɛ kenle mɔɔ bɛzɔle me bɛnleanle wɔ fienemgbole ne anu,  ɛleka mɔɔ bɛ nlenyia mɔ nwunle me gyima ɛvolɛ 40 noko bɛgyegyele me na bɛzɔle me bɛnleanle la. 10  Ɛhye ati a menvale awolɛndoazo ɛhye anwo ɛya na menganle kɛ: ‘Bɛminli wɔ bɛ ahonle nu dahuu, na bɛtɛnwunle me ndenle’ la. 11  Ɔti menvale ɛya na menganle ndane kɛ: ‘Bɛnrɛwolo me ɛnwomenlelielɛ ne anu.’” 12  Mediema, bɛnlea boɛ na bɛ nuhua bie annyia ahonle ɛtane mɔɔ ɛnlɛ diedi la, na yeandwe ɔ nwo yeanvi tease Nyamenle ne anwo; 13  emomu bɛhɔ zo bɛmaa bɛ nwo anwosesebɛ alehyenlɛ biala mɔɔ bɛfɛlɛ ye “Ɛnɛ” la, amaa ɛtane ambɛlɛbɛla bɛ nuhua biala na yeakpunli ye ahonle. 14  Ɔluakɛ saa yɛbanyia mɔɔ Kelaese ɛnyia la bie a, kyesɛ yɛsɔ anwodozo mɔɔ yɛnyianle ye mɔlebɛbo ne la anu kpundii yɛkɔ awieleɛ. 15  Bɛhɛlɛ kɛ: “Ɛnɛ, saa bɛte ɔ ne a, bɛmmakpunli bɛ ahonle kɛ mekɛ mɔɔ bɛhanle me ɛya la.” 16  Na nwane mɔ a dele noko bɛhanle ye ɛya a? Asoo tɛ bɛdabɛ kɔsɔɔti mɔɔ Mosisi yele bɛ vile Yigyibiti la ɔ? 17  Bieko, nwane mɔ a Nyamenle vale bɛ nwo ɛya ɛvolɛ 40 a? Asoo tɛ bɛdabɛ mɔɔ bɛyɛle ɛtane na bɛwule wɔ fienemgbole ne anu la ɔ? 18  Na nwane mɔ a ɔhanle ndane kɛ bɛnrɛwolo ye ɛnwomenlelielɛ ne anu a? Asoo tɛ bɛdabɛ mɔɔ bɛyɛle anzosesebɛ la ɔ? 19  Ɔti yɛnwu kɛ diedi mɔɔ bɛannyia ye la ati bɛangola bɛanwolo nu.

Ɔ Bo Edwɛkɛ

Anzɛɛ “yɛka ɔ nwo edwɛkɛ.”
Ɛhye kile, Gyisɛse.