Hibuluma 13:1-25

  • Folɛdulɛ nee ahyebizalɛ mɔɔ li awieleɛ (1-25)

    • Bɛmmamaa bɛ rɛle fi nyɛvolɛlielɛ (2)

    • Bɛli agyalɛ eni (4)

    • Bɛdie menli mɔɔ li bɛ nyunlu la (7, 17)

    • Bɛbɔ ayɛlɛyelɛ afɔle (15, 16)

13  Bɛmaa bɛ mediema ɛlɔlɛ ɛhɔ zo.  Bɛmmamaa bɛ rɛle fi nyɛvolɛlielɛ, ɔluakɛ bie mɔ luale zo liele anwumabɔvolɛma mɔɔ bɛannwu ye.  Bɛhakye bɛdabɛ mɔɔ bɛgua bɛ efiade* la kɛ asɛɛ bɛ nee bɛ a wɔ ɛkɛ a, yɛɛ bɛdabɛ mɔɔ bɛlɛyɛ bɛ amumuyɛ la, ɔluakɛ bɛdabɛ noko bɛwɔ nwonane nu.*  Bɛ muala bɛli agyalɛ eni, na bɛmmagua agyalɛ ɛkpa ne anwo evinli, ɔluakɛ Nyamenle babua bɛdabɛ mɔɔ bɛle adwɔmane* nee agyalɛzɛkyelɛma la ndɛne.  Bɛmmamaa ezukoa nwo anyebolo ba bɛ ɛbɛlabɔlɛ nu, bɛmaa bɛ kunlu ɛdwo mɔɔ bɛlɛ ye la anwo. Na yeha kɛ: “Menrɛgyakyi wɔ, yɛɛ menrɛkpo wɔ ɛlɛ.”  Amaa yɛanyia akɛnrasesebɛ kpole na yɛaha kɛ: “Gyihova* le me boavolɛ; menrɛzulo. Duzu a sonla kɛhola kɛyɛ me a?”  Bɛhakye menli mɔɔ li bɛ nyunlu, mɔɔ ɛha Nyamenle edwɛkɛ ne ɛhile bɛ la, na bɛnlea kɛzi bɛ ɛbɛlabɔlɛ kɔ ye la, bɛzukoa bɛ diedi.  Kɛzi Gyisɛse Kelaese de anoma la, ɔle zɔhane ɛnɛ nee dahuu.  Bɛmmamaa ngilehilelɛ ngakyile nee edwɛkɛ fofolɛ twehwe bɛ adwenle, ɔluakɛ ɔle kpalɛ kɛ bɛkɛlua ɛlolɛ zo bɛkɛzi bɛ ahonle na tɛ aleɛ* mɔɔ ɛmboa bɛdabɛ mɔɔ bɛmaa ɔdie bɛ mekɛ la. 10  Yɛlɛ afɔlemokyea mɔɔ bɛdabɛ mɔɔ bɛsonle wɔ ɛdanlɛsua ne anu la ɛnlɛ adenle kɛ bɛkɛli zolɛ debie a. 11  Ɔluakɛ nane mɔɔ ɛtane ti ɛsɔfo kpanyinli ne fa bɛ mogya kɔ nwuanzanwuanza ɛleka ne la, bɛyela bɛ avunli wɔ azokoɛleɛ ne anzi lɔ. 12  Ɔti Gyisɛse noko nwunle amaneɛ wɔ sua ne kandiba amaa yeava ye mogya ne yeade menli ne anwo. 13  Zɔhane ati, bɛmaa yɛhɔ ɔ nwo ɛkɛ wɔ azokoɛleɛ ne anzi lɔ yɛhɔzoa ye anyiemgba ne bie, 14  ɔluakɛ yɛnlɛ sua mɔɔ wɔ ɛkɛ ne dahuu la wɔ ɛke, emomu yɛlɛkendɛ mɔɔ bara la ɛsesebɛ. 15  Bɛmaa yɛlua ɔ nwo zo yɛbɔ ayɛlɛyelɛ afɔle yɛmaa Nyamenle dahuu, ɛhye a le yɛ nloa anu edwɛkɛ mɔɔ bɔ ye duma wɔ bagua nu la. 16  Bieko, bɛmmamaa bɛ rɛle fi kɛ bɛkɛyɛ kpalɛ na bɛ nee awie mɔ kɛhyɛ mɔɔ bɛlɛ la, ɔluakɛ afɔlebɔlɛ zɛhae mɔ sɔ Nyamenle anye. 17  Bɛdie menli mɔɔ li bɛ nyunlu la na bɛbɛlɛ bɛ nwo aze bɛmaa bɛ, ɔluakɛ bɛmɛ a bɛnea bɛ nwo zo* na bɛbabu nwolɛ mgbonda a, amaa bɛava fɛlɛkolilɛ bɛayɛ ɛhye na bɛanli nyane, tɛ ye zɔhane a ɔnrɛwie bɛ boɛ. 18  Bɛhɔ zo bɛyɛ asɔne bɛmaa yɛ ɔluakɛ yɛdie yɛdi kɛ yɛlɛ adwenle mɔɔ anu te,* ɔluakɛ yɛkulo kɛ yɛfa nɔhalɛlilɛ yɛbɔ yɛ ɛbɛla wɔ debie biala anu. 19  Noko mesɛlɛ bɛ kpalɛ kɛ bɛyɛ asɔne amaa meazia meara bɛ nwo lɔ bieko ndɛndɛ. 20  Anzodwolɛ Nyamenle ne mɔɔ yele mboaneneavolɛ kpole ne, yɛ Awulae Gyisɛse mɔɔ ɛnee lɛ mogya ne mɔɔ maa dahuu ngyekyeleɛ ne di munli la vile mowuamra anu la, 21  ɛva debie biala mɔɔ le kpalɛ la ɛziezie bɛ ɔmaa bɛyɛ ye ɛhulolɛdeɛ, na ɔlua Gyisɛse Kelaese anwo zo ɔva yɛ ɔyɛ mɔɔ sɔ ɔ nye la, yemɔ a anyunlunyia ɛha ye dahuu a. Amen. 22  Mediema, akee bɛzi abotane na bɛdie anwosesebɛmaanlɛ edwɛkɛ ɛhye, ɔluakɛ mehɛlɛ bɛ kɛlata mɔɔ yeanwa biala. 23  Mekpondɛ kɛ bɛnwu ye kɛ bɛye yɛ diema Timote. Saa ɔba ndɛ a me nee ye yɛbaranwu bɛ. 24  Mebiza menli mɔɔ li bɛ nyunlu nee nwuanzanwuanzama ne mɔ amuala. Bɛdabɛ mɔɔ bɛwɔ Yetali la se bɛbiza bɛ. 25  Ɛlolɛ ɛha bɛ muala.

Ɔ Bo Edwɛkɛ

Giliki aneɛ nu, “bɛgua bɛ kyeenyi.”
Anzɛɛ ɔkola ɔkile, “kɛ asɛɛ bɛ nee bɛ ɛlɛnwu amaneɛ la.”
Nea Edwɛkɛbohilelɛ, “Adwɔmane ɛbɛla.”
Nea Edwɛkɛbohilelɛ.
Ɛhye kile, aleɛ nwo mɛla.
Anzɛɛ “bɛ ɛkɛla zo.”
Giliki aneɛ nu, “adwenle kpalɛ.”