Hibuluma 10:1-39

  • Nane afɔlebɔlɛ ɛnli munli (1-4)

    • Mɛla, ɔle sɔhovolɛ (1)

  • Kelaese bɔle afɔle kokye ala (5-18)

  • Yebuke adenle fofolɛ mɔɔ kɔ ngoane nu (19-25)

    • Bɛmmamaa yɛgyakyi kɛ yɛkɛhɔ yɛ nyianu ne (24, 25)

  • Anye fuu ɛtane nwo kɔkɔbɔlɛ (26-31)

  • Anwodozo nee diedi maa bɛgyinla kpundii(32-39)

10  Na kɛmɔ Mɛla ne le ninyɛne mgbalɛ mɔɔ bara la sɔhovolɛ, na ɔnle ninyɛne mumua ne la ati, ɔnrɛhola ɔnrɛmaa menli mɔɔ dua afɔle ko ne ala mɔɔ ɛnee bɛkɔ zo bɛbɔ ye ɛvolɛ ɛvolɛ la azo bɛbikye Nyamenle la ɛnrɛli munli ɛlɛ.  Saa tɛ ye zɔ a, asoo anrɛɛ bɛangyakyi afɔle ne mɔɔ bɛbɔ la ɔ? Ɔluakɛ anrɛɛ bɛdabɛ mɔɔ bɛyɛ gyima nwuanzanwuanza ne mɔɔ bɛde bɛ nwo kokye la ɛnze ɛtane bieko.  Emomu, afɔlebɔlɛ ɛhye mɔ maa bɛkakye ɛtane ɛvolɛ biala,  ɔluakɛ nlankɛ nee mbɔnkye mogya ɛngola ɛnye ɛtane ɛnvi ɛkɛ.  Yemɔti mekɛ mɔɔ ɔrale ewiade la, ɔhanle kɛ: “‘Ɛmkpondɛ afɔlebɔlɛ nee ahyɛlɛdeɛ, emomu ɛzieziele sonlabaka ɛmaanle me.  Ɛ nye ɛnlie nane mumua ɛyelalɛ nee ɛtane nwo afɔlebɔlɛ nwo.’  Na menganle kɛ: ‘Nea! mera (bɛhɛlɛ me nwo edwɛkɛ wɔ nwomamobɔleɛ* ne anu) kɛ mebayɛ wɔ ɛhulolɛdeɛ, O Nyamenle.’”  Alimoa ne ɔhanle kɛ: “Ɛmkpondɛ anzɛɛ ɛ nye ɛnlie afɔlebɔlɛ nee ahyɛlɛdeɛ yɛɛ nane mumua ɛyelalɛ nee ɛtane nwo afɔlebɔlɛ nwo”—afɔle mɔɔ bɛbɔ kɛ mɔɔ Mɛla ne kile la—  akee ɔhanle kɛ: “Nea! mera kɛ mebayɛ wɔ ɛhulolɛdeɛ.” Ɔye alimoa ɛdeɛ ne ɔfi ɛkɛ amaa yeava mɔɔ tɔ zo nwiɔ la yeazie ɛkɛ. 10  Ɔlua “ɛhulolɛdeɛ” ɛhye ati, bɛlua Gyisɛse Kelaese sonlabaka ne mɔɔ ɔvale ɔbɔle afɔle kokye la azo bɛde yɛ nwo. 11  Bieko, ɛsɔfo biala gyinla ɔ bo zo ne alehyenlɛ biala yɛ ye gyima nwuanzanwuanza* ne na ɔbɔ afɔle ko ne ala fane dɔɔnwo, ɔluakɛ ɔngola ɔnye ɛtane ɔnvi ɛkɛ ne bɔkɔɔ. 12  Noko nrenyia ɛhye bɔle ɛtane nwo afɔle kokye ala na ɔhɔdɛnlanle Nyamenle asa fema zo, 13  ɔvi mekɛ zɔhane ɔlɛkendɛ kɔkpula kɛ bɛbava ye agbɔvolɛ bɛayɛ ɔ gyakɛ abo ebia. 14  Na yelua afɔlebɔlɛ kokye azo yemaa bɛdabɛ mɔɔ bɛmaa bɛ nwo ɛde la ɛli munli bɔkɔɔ. 15  Bieko, sunsum nwuanzanwuanza ne noko ɛli daselɛ ɛhile yɛ ɔluakɛ alimoa ne ɔhanle kɛ: 16  “‘Ɛhye a le ngyekyeleɛ mɔɔ me nee bɛ bayɛ wɔ mekɛ mɔɔ bara la a,’ kɛ Gyihova* se la ɛne. ‘Mebava me mɛla ne meawula bɛ ahonle nu na meahɛlɛ ye wɔ bɛ adwenle nu.’” 17  Akee ɔhanle kɛ: “Na menrɛhakye bɛ ɛtane nee bɛ anzosesebɛ nyɛleɛ ne mɔ bieko.” 18  Na ɛleka mɔɔ ɛhye mɔ anwo fakyɛ wɔ la, ɛtane nwo afɔlebɔlɛ ɛnle ɛkɛ bieko. 19  Zɔhane ati, mediema, kɛmɔ yɛdua Gyisɛse mogya ne azo yɛfa akɛnrasesebɛ* yɛkɔ nwuanzanwuanza ɛleka ne, 20  mɔɔ ɔbukele ɔmaanle yɛ kɛ adenle fofolɛ mɔɔ kɔ ngoane nu mɔɔ dua mgbɛnu ɛdanlɛ ne anu, ɛhye a le ye sonlabaka ne, 21  yɛɛ kɛmɔ yɛlɛ ɛsɔfo kpole mɔɔ nea Nyamenle sua ne azo la ati, 22  bɛmaa yɛva ahonle kpalɛ nee diedi mɔɔ di munli la yɛbikye Nyamenle, mekɛ mɔɔ bɛde yɛ ahonle nu bɛvi adwenle mɔɔ anu ɛnde la anwo na bɛva nzule anye komikomi bɛbia yɛ sonlabaka ne la. 23  Bɛmaa yɛzɔ yɛ anyelazo ne mɔɔ yɛka nwolɛ edwɛkɛ bagua nu la anu kpundii na yɛzi pi, ɔluakɛ ahenle mɔɔ bɔle ɛwɔkɛ ne la le nɔhavo. 24  Na bɛmaa yɛzuzu* yɛ nwo ngoko, yɛmaa yɛ nwo anwosesebɛ yɛhɔ ɛlɔlɛ nee gyima kpalɛ ɛyɛlɛ nu, 25  bɛmmamaa yɛgyakyi kɛ yɛkɛhɔ yɛ nyianu ne mɔ, kɛ mɔɔ yeyɛ bie mɔ subane la, emomu bɛmaa yɛmaa yɛ nwo anwosesebɛ, titili mekɛ mɔɔ bɛkɛnwu kɛ awieleɛ ne ɛlɛbikye la. 26  Ɔluakɛ saa yɛ nye fuu yɛyɛ ɛtane wɔ mekɛ mɔɔ yɛnyia nɔhalɛ ne anwo nɔhalɛ ndelebɛbo la a, ɛtane nwo afɔlebɔlɛ bieko ɛnle ɛkɛ, 27  emomu mɔɔ ɛha la a le kɛ, ndɛnebualɛ mɔɔ yɛ ɛzulolɛ la nee ɛya mɔɔ ɛlɛsɔ kɛ senle la bayela bɛdabɛ mɔɔ bɛdwazo bɛtia la. 28  Saa awie ambu Mosisi Mɛla ne a, bɛgyinla alasevolɛ nwiɔ anzɛɛ nsa daselɛlilɛ zo bɛku ye mɔɔ bɛnze ye anwunvɔne a. 29  Ɛnee bɛnea a anzohwenlɛ kpole boni a awie mɔɔ kɛtietia Nyamenle Ara ne anwo zo na ɔkɛbu ngyekyeleɛ mogya ne mɔɔ bɛvale bɛdele ɔ nwo la kɛ nwolɛ ɛngyia na ɔkɛdendɛ ɔkɛtia sunsum ne ɛlolɛ ne la kɛnyia a? 30  Ɔluakɛ yɛze Ahenle mɔɔ hanle ɛhye la: “Nzenralɛlilɛ le me ɛdeɛ; mebadua ɛtane nwo kakɛ.” Eza ɔse, “Gyihova* babua ye menli ndɛne.” 31  Ɔyɛ ɛzulolɛ kɛ tease Nyamenle ne kɛhwe awie anzo. 32  Noko, bɛhakye mekɛ mɔɔ bɛlimoale bɛnwunle wienyi ne la dahuu, bɛbɔle mɔdenle bɛgyinlanle nu na bɛhonle ɛsesebɛ wɔ amaneɛnwunlɛ nu. 33  Ɛnee ɔdwu mekɛ ne bie a, bɛbɔ bɛ aholoba na bɛkile bɛ nyane wɔ bagua nu,* yɛɛ ɔdwu mekɛ ne bie noko a bɛgyinla bɛdabɛ mɔɔ bɛnwu amaneɛ ɛhye mɔ la anzi. 34  Na bɛlile bɛdabɛ mɔɔ bɛguale bɛ efiade la anwo nyane yɛɛ mɔɔ bɛzale bɛ bɛliele bɛ nwo ninyɛne la bɛ rɛle ambɔ, ɛnee bɛze kɛ bɛlɛ agyapadeɛ kpalɛ mɔɔ ɛnzɛkye ɛlɛ la wɔ ɛkɛ. 35  Yemɔti, bɛmmagyakyi kɛ bɛbava akɛnrasesebɛ bɛadendɛ, ɔluakɛ ahatualɛ kpole bie li ɔ nzi. 36  Na ɔwɔ kɛ bɛnyia abotane, amaa bɛyɛ Nyamenle ɛhulolɛdeɛ bɛwie a, bɛ sa aha ɛwɔkɛ ne. 37  Ɔluakɛ “yeha ekyii bie,” na “ahenle mɔɔ ɛlɛba la ara, na ɔnrɛhyɛ fee.” 38  “Na tenlenenli balua ye diedi zo anyia ngoane,” na “saa ɔsia ɔ nzi a, me nye* ɛnrɛlie ɔ nwo.” 39  Yɛmɛ, yɛnle menli mɔɔ yɛsia yɛ nzi yɛkɔ ɛzɛkyelɛ nu a, emomu yɛle menli mɔɔ yɛlɛ diedi mɔɔ bɔ yɛ ngoane* nwo bane a.

Ɔ Bo Edwɛkɛ

Giliki aneɛ nu, “nwomamobɔleɛ buluku.”
Anzɛɛ “ɛzonlenlɛ gyima.”
Nea Edwɛkɛbohilelɛ.
Anzɛɛ “anwodozo.”
Anzɛɛ “yɛdwenle; yɛdie.”
Nea Edwɛkɛbohilelɛ.
Giliki aneɛ nu, “bɛfa bɛ bɛgyinla nwɔhoalilɛleka.”
Anzɛɛ “me ɛkɛla anye.”
Anzɛɛ “ɛkɛla.”