Gyima Ne 8:1-40

  • Sɔɔlo yɛ bɛ kpɔdekpɔde (1-3)

  • Felepe ka edwɛkɛ ne wɔ Samɛlea (4-13)

  • Bɛzoa Pita nee Dwɔn wɔ Samɛlea (14-17)

  • Saemɔn yɛle kɛ ɔtɔ sunsum nwuanzanwuanza (18-25)

  • Yiteyopeanli kpanyinli (26-40)

8  Sɔɔlo liele ye ɛhunlɛ ne dole nu. Ɔvi kenle zɔhane bɛbɔle ɔ bo bɛyɛle asafo ne mɔɔ wɔ Gyɛlusalɛm la kpɔdekpɔde; bɛ muala bɛbɔle asande bɛhɔle Dwudiya nee Samɛlea maanzinli ne mɔ anu, na ɔhale ɛzoanvolɛma ne ala.  Na menli bie mɔɔ sulo Nyamenle la vale Sitivin hɔziele ye, na bɛzunle ye kpole kpalɛ.  Na Sɔɔlo bɔle ɔ bo kɛ ɔsɛkye asafo ne. Ɔwolowolole azua nu ɔhɔhwenle mrenyia nee mraalɛ ɔmaanle bɛguale bɛ efiade.  Noko menli mɔɔ bɔle asande la bɔle edwɛkpa ne nolo wɔ ɛleka biala mɔɔ bɛhɔle la.  Felepe hɔle Samɛlea sua ne azo na ɔbɔle ɔ bo ɔhanle Kelaese ne anwo edwɛkɛ ɔhilele bɛ.  Mɔɔ menli ne diele Felepe na bɛnwunle nwanwane ninyɛne mɔɔ ɔlɛyɛ la, bɛ muala bɛvale koyɛlɛ bɛdiele mɔɔ ɔlɛka la kpalɛ.  Ɛnee sunsum ɛtane wɔ menli dɔɔnwo anwo, na ɛnee bɛteɛdea nu na bɛfi bɛ nwo bɛtu. Menli mɔɔ ɛbubu nee wuliravolɛma dɔɔnwo dele kpɔkɛ.  Yemɔti sua ne azo amra anye liele kpole.  Ɛnee nrenyia bie wɔ sua ne azo mɔɔ bɛfɛlɛ ye Saemɔn, ɛnee ɔye ngonyia ɔmaa ɔyɛ Samɛlea maanlema ne ɛzulolɛ, na ɔka kɛ ɔle sonlakpole. 10  Bɛ muala, ɔvi mɔɔ le ekyi wɔ bɛ nu kɔdwu mɔɔ le kpole la anwo zo tie ye na bɛka kɛ: “Nrenyia ɛhye a le Nyamenle Tumi ne, mɔɔ bɛfɛlɛ ye Bedevinli la.” 11  Kɛmɔ ɔyɛle ye ngonyia ninyɛne ne ɔmaanle ɔyɛle bɛ ɛzulolɛ mekɛ tendenle la ati, ɛnee bɛtie ye. 12  Noko mɔɔ Felepe hanle Nyamenle Belemgbunlililɛ ne nee Gyisɛse Kelaese duma ne anwo edwɛkpa ne hilele bɛ, na bɛliele bɛlile la, mrenyia nee mraalɛ kɔsɔɔti maanle bɛzɔnenle bɛ. 13  Saemɔn ɔdaye ɔrayɛle diedinli, na mɔɔ bɛzɔnenle ye la ɔ nee Felepe luale; na sɛkɛlɛneɛ nee nwanwane ninyɛne mɔɔ ɔnwunle kɛ Felepe ɛlɛyɛ la zinle ɔ nwo. 14  Mekɛ mɔɔ ɛzoanvolɛma ne mɔɔ wɔ Gyɛlusalɛm dele kɛ menli mɔɔ wɔ Samɛlea ɛlie Nyamenle edwɛkɛ ne ɛdo nu la, bɛzoanle Pita nee Dwɔn wɔ bɛ nwo ɛkɛ; 15  na bɛhɔyɛle asɔne bɛmaanle bɛ amaa bɛanyia sunsum nwuanzanwuanza ne. 16  Ɔluakɛ ɛnee bɛzɔne bɛ wɔ Awulae Gyisɛse duma nu ɛdeɛ, noko ɛnee ɔtɛbale bɛ nuhua biala anwo zo. 17  Akee bɛvale bɛ sa bɛguale bɛ nwo zo, na bɛnyianle sunsum nwuanzanwuanza ne. 18  Mɔɔ Saemɔn nwunle kɛ ɛzoanvolɛma ne fa bɛ sa gua menli nwo zo a bɛnyia sunsum ne la, ɔyɛle kɛ ɔmaa bɛ ezukoa, 19  ɔhanle kɛ: “Bɛmaa medame noko tumi ɛhye bie amaa awie biala mɔɔ mekɛva me sa mekɛgua ɔ nwo zo la anyia sunsum nwuanzanwuanza.” 20  Na Pita zele ye kɛ: “Ɛ nee wɔ ezukoa ne amuala ɛzɛkye, ɔluakɛ ɛdwenle kɛ ɛbahola wɔava ezukoa wɔadɔ Nyamenle ahyɛlɛdeɛ ne mɔɔ ɔfa ɔmaa mgbane la. 21  Ɛnlɛ kyɛfoa biala wɔ gyima ɛhye anu, ɔluakɛ wɔ ahonle nu ɛnde wɔ Nyamenle anyunlu. 22  Yemɔti nu ɛ nwo na gyakyi wɔ subane ɛtane ne, sɛlɛ Gyihova* na kakyi wɔ adwenle amaa yeava wɔ ɛtane yeahyɛ wɔ; 23  ɔluakɛ menwu kɛ anyebolo ɛyi wɔ tɛkɛɛ na dahuu ɛkpondɛ kɛ ɛyɛ mɔɔ le ɛtane la.” 24  Saemɔn buale bɛ kɛ: “Bɛzɛlɛ Gyihova* bɛmaa me amaa ninyɛne mɔɔ bɛha la anu biala anzi me nwo zo.” 25  Yemɔti mɔɔ bɛlile Gyihova* edwɛkɛ ne anwo daselɛ bɔkɔɔ la, bɛziale bɛhɔle Gyɛlusalɛm, na bɛhanle edwɛkpa ne wɔ Samɛlea namunamu dɔɔnwo azo. 26  Noko Gyihova* anwumabɔvolɛ zele Felepe kɛ: “Dwazo kɔ nyiakɛ, adenle ne mɔɔ vi Gyɛlusalɛm kɔ Gaza la azo.” (Ɛhye le ɛsɛlɛ zo adenle.) 27  Na ɔzile nu ɔhɔle, na nea! Yiteyopeanli kpanyinli bie ɛne, nrenyia ɛhye lɛ tumi na ɔnea Kandase, Yiteyopea belemgbunli raalɛ ne ezukoa zo. Ɛnee yehɔ Gyɛlusalɛm yehɔzonle 28  na ɔlɛsia, ɔde ye ehwili nu ɔlɛkenga ngapezonli Ayezaya buluku ne. 29  Ɔti sunsum ne zele Felepe kɛ: “Twe bikye ehwili ɛhye.” 30  Felepe nriandile hɔle ɔ nwo ɛkɛ na ɔdele kɛ ɔlɛkenga ngapezonli Ayezaya buluku ne, na ɔbizale ye kɛ: “Asoo ɛte mɔɔ ɛlɛkenga la abo?” 31  Ɔzele kɛ: “Saa awie angile me a, kɛ ɔkɛyɛ na meade ɔ bo ɛ?” Yemɔti ɔmaanle Felepe vole radɛnlanle ɔ nwo ɛkɛ. 32  Ngɛlɛlera ne mɔɔ ɛnee ɔlɛkenga la ɛne: “Ɔle kɛ boane mɔɔ bɛ nee ye ɛlɛkɔ ɛleka mɔɔ bɛkahu ye la, yɛɛ ɔle kɛ boaneralɛ mɔɔ yeyɛ koonwu wɔ awie mɔɔ ɛlɛpepɛ ɔ nwo enrinli anyunlu la, yemɔti yeambuke ɔ nloa. 33  Mekɛ mɔɔ bɛlɛgua ɔ nyunlu aze la, bɛanli ye edwɛkɛ bɛammaa ye. Nwane a baha ye awolɛndoazo ne anwo edwɛkɛ a? Ɔluakɛ bɛpɛ ye ngoane zo wɔ azɛlɛ ye azo.” 34  Kpanyinli ne bizale Felepe kɛ: “Mesɛlɛ wɔ, nwane anwo edwɛkɛ a ngapezonli ne ɛlɛka a? Ɔdaye ɔ nwo edwɛkɛ anzɛɛ awie gyɛne ɔ?” 35  Felepe bɔle ɔ bo kɛ ɔtendɛ, na ɔbɔle ɔ bo wɔ ngɛlɛlera ɛhye azo ɔhanle Gyisɛse anwo edwɛkpa ne ɔhilele ye. 36  Mekɛ mɔɔ bɛlua adenle ne azo bɛlɛkɔ la, bɛhɔdole azule bie, na kpanyinli ne hanle kɛ: “Nea! Azule ɛne; duzu a si me ɛzɔnenlɛ nwo adenle a?” 37  —— 38  Yemɔti ɔmaanle ehwili ne gyinlanle na Felepe nee kpanyinli ne dwule hɔle azule ne anu, na ɔzɔnenle ye. 39  Mɔɔ bɛvi azule ne anu bɛvole file zo la, Gyihova* sunsum ne maanle Felepe vile ɛkɛ ne ndɛndɛ, na kpanyinli ne annwu ye bieko noko ɔvale anyelielɛ ɔhɔle. 40  Na Felepe hɔvindele Ahyedɔdo, na ɔhɔbɔle edwɛkpa ne nolo wɔ azua dɔɔnwo azo too ɔhɔdwule Sizalia.

Ɔ Bo Edwɛkɛ

Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.