Gyima Ne 6:1-15

  • Bɛyele mrenyia nsuu kɛ bɛzonle (1-7)

  • Bɛbɔle Sitivin somolɛ kɛ yeha munzule edwɛkɛ (8-15)

6  Mekɛ ne anu mɔɔ ɛnee ɛdoavolɛma ne anwo ɛlɛso la, Dwuuma mɔɔ bɛka Giliki aneɛ la bɔle ɔ bo dendɛle tiale Dwuuma mɔɔ bɛka Hibulu aneɛ la, ɔluakɛ ɛnee bɛbu bɛ nye bɛgua bɛ ahunlanvolɛ ne mɔ anwo zo wɔ aleɛ mɔɔ bɛkyɛ ye alehyenlɛ biala la anu.  Yemɔti Bulu Nee Nwiɔ ne vɛlɛle ɛdoavolɛma ne amuala na bɛhanle kɛ: “Ɔnle kpalɛ kɛ yɛkɛgyakyi Nyamenle edwɛkɛ ne na yɛkɛgyinla ɛkponle nwo yɛkɛhyɛ aleɛ.  Ɔti mediema, bɛye menli nsuu mɔɔ bɛlɛ duma kpalɛ wɔ bɛ avinli, mɔɔ bɛze nrɛlɛbɛ na sunsum ɛyi bɛ tɛkɛɛ la, amaa yɛakpa bɛ na bɛali edwɛkɛ ɛhye mɔɔ hyia la anwo gyima;  na yɛmɛ yɛbadu yɛ nwo yɛazie ɛkɛ yɛayɛ asɔne na yɛahilehile Nyamenle edwɛkɛ ne.”  Ɛdoavolɛma ne amuala anye liele mɔɔ bɛhanle la anwo na bɛyele Sitivin, nrenyia bie mɔɔ ɔlɛ diedi kpole na sunsum nwuanzanwuanza ne ɛyi ye tɛkɛɛ la, nee Felepe, Polɔkɔlɛse, Nekanɔ, Taemɔn, Paamɛnase, nee Nekɔlɔso mɔɔ vi Anteɔko na yerayɛ Dwuunli la.  Bɛvale bɛ bɛrɛlɛle ɛzoanvolɛma ne, na mɔɔ bɛyɛle asɔne bɛwiele la, bɛvale bɛ sa bɛguale bɛ nwo zo.  Na Nyamenle edwɛkɛ ne hɔle zo dɛlɛle, na ɛdoavolɛma ne dodo yɛle mɔnwo dɔɔnwo wɔ Gyɛlusalɛm; na ɛsɔfoma dɔɔnwo rayɛle diedima.  Ɛnee Sitivin mɔɔ Nyamenle ɛlolɛ nee ye tumi kpole ne wɔ ɔ nwo zo la ɛlɛyɛ nwanwane ninyɛne nee sɛkɛlɛneɛ mgbole wɔ menli ne avinli.  Na ekpunli bie mɔɔ bɛfɛlɛ bɛ Fanwodima la, nee Saelinma nee Alɛzandeleama, nee menli bie mɔɔ vi Selesea nee Ehyea la dwazole kɛ bɛ nee Sitivin su kpolera. 10  Noko bɛangola bɛangyinla ye nrɛlɛbɛ nee sunsum ne mɔɔ ɔlɛfa yeadendɛ la anloa. 11  Akee bɛwulowulale menli bie abo bɛmaanle bɛhanle kɛ: “Yɛdele kɛ ɔlɛka munzule edwɛkɛ yeatia Mosisi nee Nyamenle.” 12  Na bɛmaanle menli ne, mgbanyima ne mɔ, nee mɛla kilehilevolɛma ne vale ɛya, na bɛrale ɔ nwo zo arɛlevilɛ nu bɛrahyele ye bɛvale ye bɛhɔmaanle Sanhedelin ne. 13  Na bɛmaanle menli ralile daselɛ adalɛ na bɛhanle kɛ: “Nrenyia ɛhye dahuu tendɛ tia ɛleka nwuanzanwuanza ɛhye nee Mɛla ne. 14  Kɛ neazo la, yɛdele kɛ ɔlɛka kɛ Gyisɛse mɔɔ vi Nazalɛte la bazɛkye ɛzonlenlɛ sua ɛhye na yeahakyi amaamuo ne mɔɔ Mosisi vale gyakyile yɛ la.” 15  Mekɛ mɔɔ Sanhedelin ne anu amra amuala mɔɔ bɛde ɛkɛ la nleanle ɔ nyunlu koonwu la, bɛnwunle kɛ ɔ nyunlu ɛyɛ kɛ anwumabɔvolɛ nyunlu.

Ɔ Bo Edwɛkɛ