Gyima Ne 3:1-26

  • Pita yɛ abubura mɔɔ sɛlɛzɛlɛ la ayile (1-10)

  • Pita tendɛ wɔ Sɔlɔmɔn Abenlana nu (11-26)

    • “Bɛbayɛ ninyɛne kɔsɔɔti fofolɛ” (21)

    • Ngapezonli mɔɔ le kɛ Mosisi (22)

3  Ɛnee Pita nee Dwɔn ɛlɛkɔ ɛzonlenlɛ sua ne anu wɔ mekɛ mɔɔ bɛyɛ asɔne la anu, kɛyɛ ewiazo dɔne nsa,*  na ɛnee awie mɔ zo nrenyia bie mɔɔ bɛwole ye abubura la. Alehyenlɛ biala bɛfa ye bɛkɔtɛnla ɛzonlenlɛ sua ne anlenkɛ ne mɔɔ bɛfɛlɛ ye Kɛnlɛma la anloa, amaa yeazɛlɛzɛlɛ bɛdabɛ mɔɔ bɛlɛkɔ ɛzonlenlɛ sua ne anu la debie.  Mɔɔ ɔnwunle kɛ Pita nee Dwɔn ɛlɛwolo ɛzonlenlɛ sua ne anu la, ɔzɛlɛle bɛ debie.  Noko Pita nee Dwɔn nleanle ye koonwu na bɛhanle kɛ: “Nea yɛ.”  Ɔti ɔnleanle bɛ na ɛnee ɔ nye la kɛ ɔbanyia debie yeavi bɛ ɛkɛ.  Noko Pita hanle kɛ: “Dwɛtɛ fufule nee nvutuke, yemɔ menlɛ bie, emomu mɔɔ melɛ ye la a mefa meamaa wɔ a. Ɔlua Gyisɛse Kelaese mɔɔ vi Nazalɛte la duma nu, mese wɔ kɛ, dwazo tia!”  Mɔɔ ɔhanle ɛhye la, ɔzɔle ɔ sa fema ne na ɔmaanle ye zo. Ɛkɛ ne ala ɔ gyakɛ nee ye mbowule ne mɔ anu mianle;  na ɔwulule ɔgyinlanle ɔ gyakɛ azo, ɔbɔle ɔ bo ɔdiale na ɔ nee bɛ hɔle ɛzonlenlɛ sua ne anu, ɔlɛtia la ɛnee ɔlɛwuluwulu yeaye Nyamenle ayɛlɛ.  Na menli ne amuala nwunle kɛ ɔlɛtia yeaye Nyamenle ayɛlɛ. 10  Na bɛnwunle kɛ yemɔ a le nrenyia ne mɔɔ ɛnee tɛnla ɛzonlenlɛ sua ne Anlenkɛ Kɛnlɛma ne anloa sɛlɛzɛlɛ debie la, na mɔɔ zile la zinle bɛ nwo kpole. 11  Mekɛ mɔɔ nrenyia ne lɛ Pita nee Dwɔn asa la, menli ne kɔsɔɔti nriandile rale bɛ nwo ɛkɛ wɔ ɛleka mɔɔ bɛfɛlɛ ye Sɔlɔmɔn Abenlana ne la anu, na ɔyɛle bɛ azibɛnwo kpole. 12  Mɔɔ Pita nwunle ɛhye la, ɔzele menli ne kɛ: “Yizilayɛma, duzu ati a ɛhye ɛzi bɛ nwo a, na duzu ati a bɛlɛnea yɛ kɛ asɛɛ yɛdayɛ yɛ tumi anzɛɛ yɛ ɛzonlenlɛ kpalɛ ti a yɛmaa yedia a? 13  Ebileham nee Ayezeke nee Gyekɔbo Nyamenle ne, yɛ nlenyia mɔ Nyamenle ne ɛwula ye Sonvolɛ Gyisɛse mɔɔ bɛyele ye bɛmaanle na bɛkpole ye wɔ Paelɛte anyunlu wɔ mekɛ mɔɔ ɔyɛle ye adwenle kɛ ɔgyakyi ye la anyunlunyia. 14  Ɛhɛe, bɛkpole awie mɔɔ le nwuanzanwuanza nee tenlenenli la na bɛbizale bɛmaanle ɔvale awie mɔɔ le kodiawu la ɔmaanle bɛ, 15  na bɛhunle ngoane Adekilevolɛ Kpanyinli ne. Noko Nyamenle dwazole ye vile mowuamra anu, yɛle edwɛkɛ ɛhye anwo alasevolɛ. 16  Na ɔlua ye duma ne nee diedi mɔɔ yɛlɛ ye wɔ ye duma ne anu la ati a nrenyia ɛhye mɔɔ bɛnwu ye na bɛze ye la ɛnyia anwosesebɛ a. Ye nuhua diedi yɛɛ ɛmaa nrenyia ɛhye mɔɔ gyi bɛ nyunlu ɛke la ɛde kpɔkɛ bɔkɔɔ a. 17  Na kɛkala, mediema, meze kɛ bɛnze yɛɛ bɛyɛle a, kɛ mɔɔ bɛ mgbanyima ne mɔ noko yɛle la. 18  Noko adenle ɛhye azo a Nyamenle luale maanle edwɛkɛ ne mɔɔ ɔluale ye ngapezoma kɔsɔɔti anwo zo ɔhanle kɛ ye Kelaese ne banwu amaneɛ la rale nu a. 19  “Yemɔti bɛnlu bɛ nwo na bɛhakyi bɛ ɛbɛlabɔlɛ amaa bɛakyikyi bɛ ɛtane na anwodɔlɛ mekɛ vi Gyihova ɛkɛ* ara 20  na yeazoa Kelaese ne mɔɔ yekpa ye yemaa bɛ la, Gyisɛse. 21  Ɔwɔ kɛ ɔtɛnla anwuma lɔ kɔkpula mekɛ mɔɔ bɛbayɛ ninyɛne kɔsɔɔti fofolɛ kɛ mɔɔ Nyamenle luale ye tete ngapezoma nwuanzanwuanza ne mɔ anwo zo hanle la. 22  Na Mosisi hanle kɛ: ‘Gyihova* bɛ Nyamenle ne bamaa ngapezonli bie mɔɔ le kɛ medame la avi bɛ mediema ne mɔ anu ara. Ɔwɔ kɛ bɛtie edwɛkɛ biala mɔɔ ɔbaha yeahile bɛ la. 23  Nɔhalɛ nu, awie* biala mɔɔ andie Ngapezonli zɔhane la, bɛbazɛkye ye bɔkɔɔ wɔ menli ne avinli.’ 24  Na ngapezoma ne, ɔvi Samoɛle anwo zo nee bɛdabɛ mɔɔ bɛli ɔ nzi la amuala, noko hanle mekɛ ɛhye anwo edwɛkɛ wienyi. 25  Bɛmɛ a bɛle ngapezoma ne mɔ nee ngyekyeleɛ ne mɔɔ Nyamenle nee bɛ nlenyia mɔ yɛle la amra a, ɔzele Ebileham kɛ: ‘Ɔlua ɛ ra anwo zo a bɛbayila azɛlɛ ye azo mbusua kɔsɔɔti a.’ 26  Mɔɔ Nyamenle kpale ye Sonvolɛ ne la, ɔlimoale ɔzoanle ye ɔrale bɛ nwo ɛkɛ ne kɛ ɔboa bɛ nuhua ko biala ɔmaa ɔhwe ɔ nwo ɔvi ye ninyɛndane nwo.”

Ɔ Bo Edwɛkɛ

Giliki aneɛ nu, kɛyɛ dɔnehwele ngɔnla ne azo.
Giliki aneɛ nu, “vi Gyihova anyunlu.”
Nea Edwɛkɛbohilelɛ.
Anzɛɛ “ɛkɛla.”