Gyima Ne 28:1-31

  • Bɛdwule aze wɔ Mɔleta (1-6)

  • Pɛbeleɛse papa ayileyɛlɛ (7-10)

  • Wulomu ɛhɔlɛ (11-16)

  • Pɔɔlo tendɛ ahile Dwuuma wɔ Wulomu (17-29)

  • Pɔɔlo fa akɛnrasesebɛ aha edwɛkɛ ne ɛvolɛ nwiɔ (30, 31)

28  Mekɛ mɔɔ yɛradwule aze la, yɛnwunle kɛ bɛfɛlɛ bɔra ne Mɔleta.  Na menli mɔɔ wɔ ɛkɛ ne la yɛle yɛ nyele kpalɛ. Bɛhuanle senle na bɛliele yɛ muala kɛnlɛma ɔluakɛ ɛnee ezule ɛlɛtɔ na ɛyɛlɛ wɔ nu.  Mɔɔ Pɔɔlo sesale ɛyɛne guale senle ne anu la, wuluwulu ne maanle ɛwɔlɛ bie vindele na ɔbɛkale ɔ sa.  Mekɛ mɔɔ bɔra ne azo amra nwunle ɛwɔlɛ ne kɛ ɔhenda Pɔɔlo asa la, bɛbɔle ɔ bo bɛhanle kɛ: “Nrenyia ɛhye le kodiawu amgba, yehola yevi nyevile ne anu yera file zo ɛdeɛ noko Pɛlepɛlelilɛ* ɛnrɛmaa ɔnrɛhɔ zo ɔnrɛdɛnla ngoane nu.”  Noko ɔkpondenle ɛwɔlɛ ne ɔguale senle ne anu na ɛhwee anyɛ ye.  Ɛnee bɛ nye la kɛ ɔ sa banwu anzɛɛ ɔbadɔ aze arɛlevilɛ nu yeawu. Mɔɔ bɛhendɛle dedee na bɛannwu kɛ debie ɛyɛ ye la bɛhakyile bɛ adwenle na bɛbɔle ɔ bo bɛhanle kɛ ɔle nyamenle.  Ɛnee bɔra ne azo kpanyinli ne mɔɔ bɛfɛlɛ ye Pɛbeleɛse la lɛ azɛlɛ wɔ ɛkɛ, ɔliele yɛ na ɔlieliele yɛ nye kɛnlɛma kenle nsa.  Ɔrale ye kɛ ɛnee ebunlu ɛhye Pɛbeleɛse papa yɛɛ ɔ kunlu ɛlɛtu na ɔla ɛkpa zo, na Pɔɔlo hɔle ɔ nwo ɛkɛ ne hɔyɛle asɔne, ɔvale ɔ sa ɔguale ɔ nwo zo na ɔyɛle ye ayile.  Mɔɔ ɛhye zile la, menli mɔɔ ɛha wɔ bɔra ne azo mɔɔ ɛnde kpɔkɛ la noko rale ɔ nwo ɛkɛ ne na ɔyɛle bɛ ayile. 10  Bɛdabɛ noko bɛhyɛle yɛ ninyɛne dɔɔnwo, na mekɛ mɔɔ yɛlɛkɔ la bɛvale debie biala mɔɔ yɛbahyia nwolɛ la bɛmaanle yɛ. 11  Siane nsa pɛle nu la, yɛvole meli bie mɔɔ bɛhɛlɛ nwolɛ “Ziyɛse Amra” la. Meli ne vi Alɛzandelea na ɔralile fɔsɛlɛ ne wɔ bɔra ne azo. 12  Yɛhɔgyinlanle Saelekusu na yɛlile kenle nsa wɔ ɛkɛ; 13  yɛvi ɛkɛ ne la yɛrale Riligeɛm. Aleɛ hyenle la nyiakɛ anwoma bie dule na ye kenle nwiɔ ne azo yɛdwule Putiyɔle. 14  Yɛnwunle mediema wɔ ɛkɛ na bɛzɛlɛle yɛ kɛ yɛdɛnla bɛ nwo ɛkɛ ne kenle nsuu, na yɛvile bɛ nwo ɛkɛ ne la yɛhɔle Wulomu. 15  Mɔɔ mediema mɔɔ wɔ ɛkɛ ne la dele yɛ nganeɛ la, bɛvi ɛkɛ ne too bɛrayiale yɛ wɔ Apeɛse Gua nu nee Dabelɛ Nsa. Mɔɔ Pɔɔlo nwunle bɛ la, ɔyɛle Nyamenle mo na ɔnyianle akɛnrasesebɛ. 16  Mɔɔ yɛdwule Wulomu la bɛmaanle Pɔɔlo angomekye hɔdɛnlanle na sogyanli bie zinzale ye. 17  Noko ye kenle nsa anzi, ɔvɛlɛle Dwuuma mgbanyima ne mɔ amuala. Mɔɔ bɛrayiale la, ɔzele bɛ kɛ: “Mediema, meanyɛ debie meantia menli ɛhye anzɛɛ yɛ nlenyia mɔ amaamuo ne, noko bɛdole me efiade wɔ Gyɛlusalɛm na bɛvale me bɛwulale Wulomuma asa anu. 18  Na mɔɔ bɛnleɛnleanle edwɛkɛ ne anu la, ɛnee bɛkulo kɛ bɛgyakyi me ɔluakɛ bɛannwu debie mɔɔ bɛgyinla zo bɛahu me a. 19  Noko mɔɔ Dwuuma ne amkponle la, ɔmaanle mendole edwɛkɛ ne memaanle Siza, noko tɛ kɛ meto me maanle ne ɛzonle. 20  Ɛhye ati a menzɛlɛle kɛ me nee bɛ badendɛ a, ɔluakɛ Yizilayɛma anyelazo ne ati a kyeenyi ɛhye gua me sa a.” 21  Bɛzele ye kɛ: “Yɛ sa ɛtɛkanle ɛ nwo kɛlata biala ɛtɛfile Dwudiya yɛɛ mediema mɔɔ vi ɛkɛ ne rale la biala ɛtɛkanle edwɛkɛ ɛtane biala wɔ ɛ nwo. 22  Noko yɛsuzu kɛ ɔle kpalɛ kɛ yɛbadie wɔ ɔluakɛ eku ɛhye ɛdeɛ, bɛka nwolɛ edwɛkɛ ɛtane wɔ ɛleka biala.” 23  Bɛhilele kenle kɛ bɛ nee ye bayia, na bɛrale dɔɔnwo kpalɛ bɛrayiale ɛleka mɔɔ ɔde la. Ɔhilehilele edwɛkɛ ne anu ɔhilele bɛ, na ɔlile Nyamenle Belemgbunlililɛ ne anwo daselɛ bɔkɔɔ, ɔluale Mosisi Mɛla ne nee Ngapezoma ne anwo zo ɔhanle Gyisɛse anwo edwɛkɛ ɔhilele bɛ ɔvi nwonlomɔ kɔdwu nɔsolɛ. 24  Bie mɔ liele mɔɔ ɔhanle la lile, bie mɔ noko anlie anli. 25  Na kɛmɔ bɛ adwenle anyɛ ko la ati, bɛbɔle ɔ bo kɛ bɛkɔ, na Pɔɔlo hanle edwɛkɛ ɛhye kɛ: “Sunsum nwuanzanwuanza ne luale ngapezonli Ayezaya anwo zo dendɛle hilele bɛ nlenyia mɔ 26  kɛ, ‘Kɔze menli ɛhye mɔ kɛ: “Nɔhalɛ nu, bɛbadie noko bɛnrɛde ɔ bo, yɛɛ bɛbanlea noko bɛnrɛnwu ɛhwee. 27  Ɔluakɛ menli ɛhye mɔ ahonle ɛsolo, bɛfa bɛ nzo bɛtie ye mgbane, yɛɛ bɛmuomua bɛ nye, amaa bɛanva bɛ nye bɛannwu debie, bɛanva bɛ nzo bɛande edwɛkɛ, bɛande ɔ bo wɔ bɛ ahonle nu na bɛahakyi, na meayɛ bɛ ayile.”’ 28  Yemɔti bɛnwu ye kɛ saa bɛka adenle mɔɔ Nyamenle balua zo alie ngoane la bɛkile maanle maanle ne a bɛbadie.” 29  —— 30  Yemɔti ɔlile ɛvolɛ nwiɔ wɔ ɛkɛ wɔ ɔdaye mumua ne ye sua mɔɔ ɔtua nwolɛ kakɛ la anu, na ɛnee ɔdie bɛdabɛ mɔɔ bɛba ɔ nwo ɛkɛ ne la kɛnlɛma, 31  na ɔvale akɛnrasesebɛ kpole ɔhanle Nyamenle Belemgbunlililɛ ne nee Awulae Gyisɛse Kelaese anwo edwɛkɛ ɔhilele bɛ mɔɔ debie biala anzi ye adenle a.

Ɔ Bo Edwɛkɛ

Giliki Diʹke, bie a ɔkile nyamenle raalɛ ne mɔɔ ɔmaa bɛdi pɛlepɛle la, anzɛɛ pɛlepɛlelilɛ nwo adwenle mɔɔ bɛlɛ la.