Gyima Ne 22:1-30

  • Pɔɔlo ka ye edwɛkɛ wɔ menli ne anyunlu (1-21)

  • Pɔɔlo kile kɛ ɔle Wulomunli (22-29)

  • Sanhedelin ne yiale (30)

22  “Mediema nee egya mɔ, akee bɛmaa menga me edwɛkɛ mengile bɛ.”  Mɔɔ bɛdele kɛ ɔlɛtendɛ yeahile bɛ wɔ Hibulu aneɛ nu la, akee bɛyɛle koonwu, na ɔhanle kɛ:  “Mele Dwuunli, bɛwole me wɔ Taasɛse mɔɔ wɔ Selesea la, Gameeleɛle a hilele me debie wɔ sua ye azo a, kɛ mɔɔ yɛ nlenyia mɔ Mɛla ne kile la pɛpɛɛpɛ, na ɛnee mebɔ Nyamenle gyima ne anwo mɔdenle kɛ mɔɔ bɛ muala bɛyɛ ye ɛnɛ la.  Menyɛle mrenyia nee mraalɛ mɔɔ boka Adenle ɛhye anwo la kpɔdekpɔde, memaanle bɛkyekyele bɛ bɛguale bɛ efiade na bɛhunle bɛ,  kɛ mɔɔ ɛsɔfo kpanyinli ne nee mgbanyima ne mɔ amuala di nwolɛ daselɛ la. Menliele ngɛlata wɔ bɛ lɔ kɛ mefa meahɔmaa mediema mɔɔ wɔ Dɛmasekɛse la, na menzile nu kɛ mekahye bɛdabɛ mɔɔ bɛwɔ ɛkɛ la meakyekye bɛ meara Gyɛlusalɛm meamaa bɛahwe bɛ nzo.  “Na mɔɔ melua adenle zo melɛkɔ na ɔka ekyii medwu Dɛmasekɛse kɛyɛ ewiazo bulu nee nwiɔ la, arɛlevilɛ nu ala, wienyi kpole bie vi anwuma rabɔle yiale me,  mempɛle menfinle na mendele ɛnelɛ bie kɛ: ‘Sɔɔlo, Sɔɔlo, duzu ati a ɛlɛyɛ me kpɔdekpɔde ɛ?’  Membuale kɛ: ‘Yɛmenle, ɛdawɔ nwane ɔ?’ Na ɔbuale kɛ: ‘Medame Gyisɛse mɔɔ mevi Nazalɛte mɔɔ ɛlɛyɛ me kpɔdekpɔde la ɔ.’  Menli mɔɔ me nee bɛ lua la nwunle wienyi ne noko bɛande ɛnelɛ ne mɔɔ dendɛle hilele me la. 10  Na menganle kɛ: ‘Yɛmenle, duzu a ɔwɔ kɛ meyɛ a?’ Awulae zele me kɛ: ‘Dwazo na kɔ Dɛmasekɛse na bɛbaha debie biala mɔɔ ɔwɔ kɛ ɛyɛ la bɛahile wɔ.’ 11  Noko kɛmɔ wienyi ne anyunlunyia ne ammaa meannwu debie la ati, menli mɔɔ me nee bɛ lua la sosɔle me sa vale me hɔle Dɛmasekɛse. 12  “Ɛnee nrenyia bie mɔɔ bɛfɛlɛ ye Ananayase, mɔɔ sonle Nyamenle kɛ mɔɔ Mɛla ne kile na Dwuuma amuala ka ɔ nwo edwɛkɛ kpalɛ la wɔ ɛkɛ, 13  na ɔrale me nwo ɛkɛ. Ɔgyinlanle me nwo ɛkɛ ne na ɔzele me kɛ: ‘Adiema Sɔɔlo, nwu debie bieko!’ Na ɛkɛ ne ala memaanle me nye zo meneanle ye. 14  Ɔhanle kɛ: ‘Yɛ nlenyia mɔ Nyamenle ne ɛkpa wɔ kɛ ɛnwu ye ɛhulolɛdeɛ, na ɛnwu tenlenenli ne na ɛde ɔ ne, 15  ɔluakɛ ɛbali ɔ nwo daselɛ wɔaha ninyɛne mɔɔ wɔde nee mɔɔ wɔnwu ye la wɔahile menli muala. 16  Na duzu a akee ɛlɛkendɛ a? Dwazo, maa bɛzɔne wɔ na bɔ ye duma fa wowo wɔ ɛtane ne mɔ.’ 17  “Na mɔɔ menziale mengɔle Gyɛlusalɛm na melɛyɛ asɔne wɔ ɛzonlenlɛ sua ne anu la, menwunle ɛnyelɛzodeɛnwunlɛ 18  na menwunle ye kɛ ɔlɛka yeahile me kɛ: ‘Ka ɛ nwo fi Gyɛlusalɛm ɛke, ɔluakɛ bɛnrɛlie me nwo daselɛ ne mɔɔ ɛlɛdi la bɛnrɛdo nu.’ 19  Na menganle kɛ: ‘Awulae, bɛdabɛ bɛze ye kpalɛ kɛ ɛnee mekɔ nyianu azua ne mɔ anu na mebo bɛdabɛ mɔɔ bɛdie wɔ bɛdi la na megua bɛ efiade; 20  na mekɛ mɔɔ bɛlɛku wɔ dasevolɛ Sitivin la, ɛnee megyi ɛkɛ, menliele mendole nuhua, na meneanle bɛdabɛ mɔ bɛlɛku ye la adɛladeɛ ne mɔ azo.’ 21  Noko ɔzele me kɛ: ‘Kɔ, ɔluakɛ mebazoa wɔ wɔ maanle maanle mɔɔ wɔ moamoa la anu.’” 22  Bɛdiele ye too ɔhanle edwɛkɛ ɛhye. Akee bɛdeɛdeanle nu kɛ: “Ku nrenyia ɛhye, ɔluakɛ ɔnfɛta kɛ ɔtɛnla aze!” 23  Kɛmɔ ɛnee bɛlɛteɛdea nu bɛavuandivuandi bɛ adɛladeɛ aguzo ne mɔ anwuma, na bɛfula munlutu bɛsande ye anwomanyunlu la ati, 24  sogyama kpanyinli ne hanle kɛ bɛva Pɔɔlo bɛrɛla ɛleka mɔɔ sogyama ne de la, na ɔhanle kɛ ɔwɔ kɛ bɛbo* ye na bɛbizebiza ye edwɛkɛ amaa yeanwu debie fɔɔnwo mɔɔ ɔti bɛlɛteɛdea nu bɛagua Pɔɔlo anwo zo la. 25  Noko mɔɔ bɛzanle ye nu kɛ bɛbo ye la, Pɔɔlo zele sogya kpanyinli ne mɔɔ gyi ɛkɛ la kɛ: “Asoo mɛla maa adenle kɛ bɛkɛbo Wulomunli wɔ mekɛ mɔɔ bɛtɛbuale ye fɔlɛ* la ɔ?” 26  Mɔɔ sogya kpanyinli ne dele ɛhye la, ɔhɔle sogyama kpanyinli ne anwo ɛkɛ na ɔzele ye kɛ: “Duzu a ɛkpondɛ wɔayɛ la? Ɔluakɛ nrenyia ɛhye le Wulomunli.” 27  Yemɔti sogyama kpanyinli ne hɔle ɔ nwo ɛkɛ na ɔbizale ye kɛ: “Saa ɛle Wulomunli a ka kile me?” Ɔhanle kɛ: “Ɛhɛe.” 28  Sogyama kpanyinli ne buale kɛ: “Menduale ezukoa kpole na meahola meayɛ Wulomunli.” Pɔɔlo hanle kɛ: “Mame, bɛwole me Wulomunli.” 29  Yemɔti ɛkɛ ne ala menli mɔɔ anrɛɛ bɛbo ye na bɛabizebiza ye edwɛkɛ la hwenle bɛ nwo vile ɔ nwo ɛkɛ; na mɔɔ sogyama kpanyinli ne nwunle kɛ ɔle Wulomunli na yeva kyeenyi yekyekye ye la, ye ahonle dule. 30  Ɔti aleɛ hyenle la, kɛmɔ ɛnee ɔkpondɛ kɛ ɔnwu deɛmɔti Dwuuma ne ɛlɛto ye ɛzonle la ati, ɔyele ye na ɔmaanle ɛsɔfo mgbanyinli ne mɔ nee Sanhedelin ne amuala rayiale nu. Akee ɔvale Pɔɔlo ɔragyinlanle bɛ avinli.

Ɔ Bo Edwɛkɛ

Giliki aneɛ nu, “bɛbila ye empele.”
Anzɛɛ “bɛtɛdile ye edwɛkɛ.”