Gyima Ne 17:1-34

  • Pɔɔlo nee Saelɛse wɔ Tɛsalonaeka (1-9)

  • Pɔɔlo nee Saelɛse wɔ Bɛlia (10-15)

  • Pɔɔlo wɔ Atɛnse (16-22a)

  • Pɔɔlo tendɛ wɔ Alɛyɔpagɛse (22b-34)

17  Akee bɛhɔvale Amfepɔlese nee Apɔlonea na bɛrale Tɛsalonaeka, ɛleka mɔɔ Dwuuma nyianu sua bie wɔ la.  Na kɛ mɔɔ Pɔɔlo ta yɛ la, ɔhɔle bɛ nwo ɛkɛ na ɔvale ɛnwomenlelielɛ kenle nsa ɔ nee bɛ zuzule Ngɛlɛlera ne anwo,  ɔhilehilele nu na ɔgyinlanle mɔɔ bɛhɛlɛ la azo ɔhilele kɛ ɔwɔ kɛ Kelaese ne nwu amaneɛ na bɛdwazo ye bɛfi mowuamra anu, na ɔhanle kɛ: “Ɛhye a le Kelaese ne, Gyisɛse ne mɔɔ melɛka ɔ nwo edwɛkɛ meahile bɛ la.”  Ɛhye ati bɛ nuhua bie mɔ liele lile na bɛrabokale Pɔɔlo nee Saelase anwo, na zɔhane ala a menli dɔɔnwo mɔɔ bɛle Gilikima na bɛsonle Nyamenle la nee mraalɛ titili bie mɔ noko yɛle a.  Noko Dwuuma ne vale ɛya na bɛboɔboale amumuyɛma bie mɔ mɔɔ bɛluolua gua zo la anloa, bɛyɛle bɛ menli ekpunli na bɛbɔle ɔ bo bɛyɛle basabasa wɔ sua ne azo. Bɛhɔle Gyeesen sua nu ɛkɛ, ɛnee bɛkpondɛ kɛ ɔye Pɔɔlo nee Saelase ɔmaa menli ne.  Mɔɔ bɛannwu bɛ la, bɛhwenle Gyeesen nee mediema ne mɔ bie bɛhɔle sua ne azo mgbanyima ne mɔ ɛkɛ, na bɛdeɛdeanle nu kɛ: “Menli ɛhye mɔ mɔɔ maa basabasayɛlɛ kɔ zo wɔ ɛleka biala la ɛra ɛke noko,  na Gyeesen ɛlie bɛ kɛ ye nyɛvolɛ. Menli ɛhye mɔ amuala dwazo tia mɛla mɔɔ Siza ɛli la, na bɛka kɛ belemgbunli fofolɛ wɔ ɛkɛ, bɛfɛlɛ ye Gyisɛse.”  Mɔɔ menli ne nee sua ne azo mgbanyima ne mɔ dele ɛhye la, bɛvale ɛya;  na mɔɔ bɛliele ezukoa bɛvile Gyeesen nee menli ne mɔ ɛkɛ la, bɛgyakyile bɛ. 10  Mɔɔ maanle nu muanle la, ndɛndɛ ne ala mediema ne mɔ maanle Pɔɔlo nee Saelase hɔle Bɛlia. Mɔɔ bɛhɔdwule ɛkɛ ne la, bɛhɔle Dwuuma nyianu sua ne anu. 11  Ɛnee menli ɛhye mɔ kulo debiezukoalɛ tɛla bɛdabɛ mɔɔ bɛwɔ Tɛsalonaeka la, ɔluakɛ bɛvale bɛ adwenle amuala bɛliele edwɛkɛ ne na dahuu bɛnleɛnleanle Ngɛlɛlera ne anu kpalɛ kɛ saa ninyɛne ɛhye mɔ le zɔhane a. 12  Yemɔti bɛ nuhua dɔɔnwo liele lile na zɔhane ala a Giliki mraalɛ ekyi nee mrenyia bie mɔ mɔɔ bɛbu bɛ la noko yɛle a. 13  Noko mɔɔ Dwuuma mɔɔ vi Tɛsalonaeka dele kɛ Pɔɔlo ɛlɛka edwɛkɛ ne wɔ Bɛlia noko la, bɛrale ɛkɛ ne na bɛlile bɛwulale menli ne bɛmaanle bɛvale ɛya. 14  Na ndɛndɛ ne ala mediema ne mɔ hɔzɔhonle Pɔɔlo wɔ nyevile ne anloa, noko Saelase nee Timote hale ɛkɛ. 15  Noko menli mɔɔ hɔle Pɔɔlo ɛzɔhonlɛ la vale ye hɔle too hɔdwule Atɛnse, na mɔɔ Pɔɔlo hanle hilele bɛ kɛ ɔwɔ kɛ Saelase nee Timote ba ɔ nwo lɔ ndɛndɛ la, bɛziale. 16  Mekɛ mɔɔ Pɔɔlo ɛlɛkendɛ bɛ wɔ Atɛnse la, ɔnwunle kɛ ananze dɔɔnwo wɔ sua ne azo na ɔlile nyane. 17  Yemɔti ɔbɔle ɔ bo ɔ nee Dwuuma nee menli mɔɔ sonle Nyamenle la zuzule edwɛkɛ nwo wɔ nyianu sua ne anu, na dahuu biala ɔ nee menli mɔɔ ɔkɛnwu bɛ wɔ gua ne azo la noko yɛ ye zɔhane ala. 18  Noko Ɛpekulɛse nee Setɔyeke nrɛlɛbɛvolɛma bie mɔ bɔle ɔ bo nee ye zule kpolera, bie mɔ hanle kɛ: “Duzu a nrenyia ɛdendɛzoma ɛhye kpondɛ kɛ ɔka a?” Bie mɔ noko hanle kɛ: “Ɔzɔho kɛ ɔlɛka nyamenle gyɛne bie mɔ anwo edwɛkɛ.” Bɛhanle ɛhye ɔluakɛ ɛnee ɔlɛka Gyisɛse nee ewudwazo ne anwo edwɛkpa ne. 19  Yemɔti bɛvale ye bɛhɔle Alɛyɔpagɛse* ne azo na bɛhanle kɛ: “Ɛbahola wɔamaa yɛanwu ngilehilelɛ fofolɛ ɛhye mɔɔ ɛlɛka nwolɛ edwɛkɛ la ɔ? 20  Ɔluakɛ ɛlɛka edwɛkɛ bie mɔɔ le ngakyile wɔ yɛ nzo nu la, na yɛkpondɛ kɛ yɛnwu mɔɔ ɔkile la.” 21  Nɔhalɛ nu, Atɛnsema nee nyɛvolɛ mɔɔ wɔ ɛkɛ ne la amuala nyia mekɛ a, bɛnva bɛnyɛ debie biala kɛ bɛfa bɛka anzɛɛ bɛtie ninyɛne fofolɛ nwo edwɛkɛ ala. 22  Pɔɔlo dwazole gyinlanle Alɛyɔpagɛse ne azo wɔ menli ne avinli na ɔhanle kɛ: “Atɛnse mrenyia, menwu kɛ wɔ debie biala anu ɔzɔho kɛ bɛkulo nyamenlezonlenlɛ bɛtɛla menli mɔɔ ɛha la. 23  Kɛ neazo la, mɔɔ melɛpɛ nu na meneanle ninyɛne mɔɔ bɛsonle bɛ la, menwunle afɔlemokyea bie mɔɔ bɛhɛlɛ nwolɛ kɛ, ‘Ɔle Nyamenle Bie Mɔɔ Yɛnze Ye La Ɛdeɛ.’ Yemɔti mɔɔ bɛsonle ye noko bɛnze ye la, yemɔ a melɛka ɔ nwo edwɛkɛ meahile bɛ a. 24  Nyamenle ne mɔɔ bɔle ewiade nee debie biala mɔɔ wɔ nu mɔɔ ɔle anwuma nee azɛlɛ Menle la, ɔnde ɛzonlenlɛ sua mɔɔ bɛva bɛ sa bɛzi la anu; 25  yɛɛ ɔnnea kɛ menli kɛboa ye, ɔluakɛ ɔdaye a ɔmaa menli kɔsɔɔti ngoane nee ɛnwomenle nee debie biala a. 26  Na ɔmaanle menli mɔɔ wɔ maanle kɔsɔɔti anu la luale sonla ko anwo zo rale, kɛ bɛradɛnla azɛlɛ ye ɛleka biala, na ɔhyehyɛle mekɛ ɔdole ɛkɛ yɛɛ ɔtotole ɛleka mɔɔ ɔwɔ kɛ menli tɛnla la ɛweɛne, 27  amaa menli akpondɛ Nyamenle anzi adenle, na bɛakpondɛ ye ɛsesebɛ kɔkpula kɛ bɛkɛnwu ye, noko, nɔhalɛ nu, ɔ nee yɛ nuhua ko biala avinli anwa. 28  Na ɔlua ɔ nwo zo a yɛlɛ ngoane na yɛkɔ yɛba na yɛwɔ ɛkɛ a, kɛ mɔɔ bɛ edwɛkɛdwɛndolɛma bie mɔ bɔbɔ hanle la, ‘Yɛdayɛ noko yɛle ɔ mra.’ 29  “Yemɔti kɛmɔ yɛle Nyamenle amra la ati, ɔnle kɛ yɛdwenle kɛ Nyamenle le kɛ nvutuke anzɛɛ dwɛtɛ fufule anzɛɛ bolɛ, anzɛɛ debie mɔɔ sonla ɛva ye adwenle ɛhyehyɛ na yeyɛ la. 30  Nɔhalɛ nu, Nyamenle ɛbu ɔ nye ɛgua mekɛ mɔɔ ɛnee menli ɛnze ye la azo; noko kɛkala ɔlɛka yeahile menli mɔɔ wɔ ɛleka biala la kɛ bɛnlu bɛ nwo. 31  Ɔluakɛ yeye kenle bie yezie ɛkɛ ne mɔɔ ɔbalua nrenyia bie mɔɔ yekpa ye la anwo zo yeabua azɛlɛ ye azo amra kɔsɔɔti ndɛne wɔ tenleneyɛlɛ nu a, na yedwazo ye yevi mowuamra anu yeva yeyɛ ngyinlazo yemaa menli kɔsɔɔti.” 32  Na mɔɔ bɛdele ewudwazo ne anwo edwɛkɛ la, bie mɔ golole ɔ nwo, yɛɛ bie mɔ noko hanle kɛ: “Yɛbadie wɔ bieko wɔ ɛhye anwo.” 33  Yemɔti Pɔɔlo gyakyile bɛ ɛkɛ hɔle, 34  noko mrenyia bie mɔ hɔbokale ɔ nwo na bɛliele bɛlile. Bɛ nuhua bie mɔ a le Dayoneseɛse mɔɔ le Alɛyɔpagɛse kɔɔto ndɛnebuavolɛ ne, nee raalɛ bie mɔɔ bɛfɛlɛ ye Damalese la, yɛɛ bie mɔ dɔɔnwo.

Ɔ Bo Edwɛkɛ

Ɔle boka wɔ tete Atɛnse mɔɔ bɛyia wɔ zo bɛdi edwɛkɛ a.