Taetɛse 3:1-15

  • Mɛlɛbɛnwoaze kpalɛ (1-3)

  • Bɛziezie bɛ nwo bɛmaa gyima kpalɛ (4-8)

  • Kpo kpolerazulɛ mɔɔ nrɛlɛbɛ ɛnle nu nee adalɛ ngilehilelɛ (9-11)

  • Adehilelɛ nee ahyebizalɛ (12-15)

3  Kɔ zo kakye bɛ kɛ bɛbɛlɛ bɛ nwo aze na bɛyɛ tieyɛ bɛmaa arane nee tumivolɛma, na bɛziezie bɛ nwo bɛmaa gyima kpalɛ biala,  bɛmmaka edwɛkɛ ɛtane bɛkile awie biala, bɛmmadi butule, emomu bɛde edwɛkɛ bo, na bɛla bɛtɛɛyɛlɛ ali bɛhile menli kɔsɔɔti.  Ɔluakɛ mekɛ bie ɛnee yɛdayɛ noko yɛnze nrɛlɛbɛ, yɛ nzo yɛle se, yɛminlinle, yɛyɛle ngɛkɛlɛ yɛmaanle atiakunluwɔzo nee anyelielɛ ngakyile, yɛbɔle yɛ ɛbɛla wɔ ɛtaneyɛlɛ nee anyebolo nu, yɛyɛle ninyɛne mɔɔ bɛkyi, yɛkpɔle yɛ nwo ngoko.  Noko, mekɛ mɔɔ yɛ Ngoanedievolɛ Nyamenle ɛlolɛ ne nee alesama anwo ɛlɔlɛ mɔɔ ɔlɛ la lale ali la  (tɛ tenlene gyima bie mɔɔ yɛyɛle la ati ɔ, emomu ye anwunvɔnezelɛ ne ati ɔ), ɔluale yɛ nwo mɔɔ ɔdele* ɔvale yɛ ɔrale ngoane nu nee sunsum nwuanzanwuanza ne mɔɔ yɛle yɛ fofolɛ la azo ɔliele yɛ ngoane.  Ɔluale yɛ Ngoanedievolɛ Gyisɛse Kelaese anwo zo ɔmaanle yɛ ye sunsum ne dɔɔnwo,  amaa bɛdua ye ɛlolɛ ne azo bɛbua yɛ benle a, yɛayɛ koliagyama kɛ mɔɔ dahuu ngoane anyelazo ne kile la.  Edwɛkɛ ɛhye mɔ le nɔhalɛ, na mekulo kɛ ɛkɔ zo ɛsi ɛhye mɔ azo, amaa bɛdabɛ mɔɔ bɛlie Nyamenle bɛli la ava bɛ adwenle azie gyima kpalɛ zo na bɛayɛ. Ɛhye mɔ le kpalɛ yɛɛ nvasoɛ wɔ zo maa menli.  Noko kpo kpolerazulɛ mɔɔ nrɛlɛbɛ ɛnle nu nee mbusua nu ɛhilehilelɛ nee butulelilɛ nee Mɛla ne anwo kpolerazulɛ, ɔluakɛ nvasoɛ ɛnle zo yɛɛ ɔle debie mgbane. 10  Awie mɔɔ kilehile adalɛ ngilehilelɛ la, saa ɛtu ye folɛ* fane nwiɔ ɛwie a, twe ɛ nwo fi ɔ nwo, 11  nwu ye kɛ sonla zɛhae ɛvo adenle na ɔlɛyɛ ɛtane yɛɛ yebua ɔ nwo fɔlɛ. 12  Saa mesoa Aatɛmase anzɛɛ Tekekɛse wɔ ɛ nwo lɔ a, bɔ mɔdenle bɛla me nwo ɛkɛ wɔ Nekɔpɔlese, ɔluakɛ ɛkɛ ne a meyɛ me adwenle kɛ mebali fɔsɛlɛ ne a. 13  Bɔ mɔdenle maa Zinase mɔɔ ze Mɛla ne kpalɛ la nee Apɔlɔso ɛnyia mɔɔ bɛhyia nwo wɔ bɛ adendulɛ ne anu la amaa bɛangyia debie. 14  Na maa yɛ menli ne noko ɛzukoa kɛ bɛbayɛ gyima kpalɛ amaa bɛaboa wɔ mekɛ mɔɔ debie nwo kɛhyia ɛsesebɛ la, amaa nvasoɛ ara bɛ gyima zo dahuu. 15  Bɛdabɛ mɔɔ bɛwɔ me nwo ɛke la amuala biza bɛ. Mebiza bɛdabɛ mɔɔ bɛkulo yɛ edwɛkɛ wɔ diedi ne anu la. Ɛlolɛ ɛha bɛ muala.

Ɔ Bo Edwɛkɛ

Giliki aneɛ nu, “ɔbiale yɛ.”
Anzɛɛ “ɛbɔ ye kɔkɔ.”