Taetɛse 1:1-16

  • Ahyebizalɛ (1-4)

  • Taetɛse kpa mgbanyima wɔ Kiliti (5-9)

  • Twi atuadelɛma anyunlu (10-16)

1  Pɔɔlo, Nyamenle akɛlɛ nee Gyisɛse Kelaese ɛzoanvolɛ kɛ mɔɔ bɛdabɛ mɔɔ Nyamenle ɛkpa bɛ la diedi ne nee nɔhalɛ ne anwo nɔhalɛ ndelebɛbo mɔɔ nee nyamenlezonlenlɛ kpalɛ le ko de la  na ɔgyi dahuu ngoane ne mɔɔ Nyamenle mɔɔ ɔngola ɔmbɔ adalɛ vale bɔle ɛwɔkɛ mekɛ tendenle la anwo anyelazo zo;  noko wɔ ye mekɛ nloa ɔluale edwɛkɛhanlɛ ne mɔɔ yeva yewula me sa nu la azo ɔmaanle bɛnwunle ye edwɛkɛ ne, kɛ mɔɔ yɛ Ngoanedievolɛ Nyamenle ne hilele la;  ɛlɛkɛlɛ ahɔmaa me ra kpalɛ Taetɛse mɔɔ le me gɔnwo diedinli la: Nyamenle Selɛ ne nee yɛ Ngoanedievolɛ Kelaese Gyisɛse ɛlo wɔ na ɔmaa wɔ anzodwolɛ.  Mengyakyile wɔ wɔ Kiliti amaa wɔaziezie ninyɛne mɔɔ ɛdɔ sinli la na wɔakpa mgbanyima wɔ sua biala azo, kɛ mɔɔ mengilele wɔ la:  saa nrenyia bie wɔ ɛkɛ mɔɔ edwɛkɛ ɛnle ɔ nwo, ɔ ye kokye, ɔ mra le diedima mɔɔ bɛnga bɛ nwo edwɛkɛ kɛ bɛyɛ mgbane mgbane* anzɛɛ bɛte atua a.  Na ɔwɔ kɛ neavolɛ mɔɔ gyi Nyamenle gyima ne ati la, yɛ awie mɔɔ edwɛkɛ ɛnle ɔ nwo, ɔnli ɔ ti anwo, ɔnva ɛya ndɛndɛ, ɔnle nzanli, ɔnle basabasa,* ɔnlua adenle ɛtane zo ɔnnyia ɔ nwo,  emomu ɔdie nyɛvolɛ, ɔkulo kpalɛyɛlɛ, ye adwenle nu la ɛkɛ,* ɔle sonlakpalɛ, ɔdi nɔhalɛ, ɔkomo ɔ nwo zo,  na kɛzi ɔkilehile la gyi nɔhalɛ edwɛkɛ ne* azo kpundii, amaa yeahola yeava ngilehilelɛ kpalɛ ne* yeamaa anwosesebɛ* na yeahwi bɛdabɛ mɔɔ bɛka nwolɛ edwɛkɛ ɛtane la anyunlu. 10  Ɔluakɛ atuadelɛma dɔɔnwo wɔ ɛkɛ, bɛka edwɛkɛ mgbane mgbane, yɛɛ bɛbɛlɛbɛla menli, titili bɛdabɛ mɔɔ bɛli mrenyia zo ɛpɛlɛ ne anzi la. 11  Ɔwɔ kɛ bɛmaa bɛmua bɛ nloa, ɔluakɛ menli ɛhye mɔ sɛkye mbusua dɔɔnwo diedi na nvasoɛ ɛtane ti bɛkilehile ninyɛne mɔɔ ɔnle kɛ bɛkilehile la. 12  Bɛ nuhua ko mɔɔ le bɛdabɛ mumua ne bɛ ngapezonli la hanle kɛ: “Kilitima dahuu bɔ adalɛ, bɛle nane amumuyɛ, mgbovonle adidikpokuma.” 13  Daselɛ ɛhye le nɔhalɛ. Ɛhye ati kɔ zo twi bɛ nyunlu ɛsesebɛ amaa bɛayɛ se wɔ diedi ne anu, 14  na bɛandie Dwuuma nwɔra nee menli mɔɔ ɛhwe bɛ nwo ɛvi nɔhalɛ ne anwo la mɛla ne mɔ. 15  Debie biala anwo te maa menli mɔɔ anwo te la; na menli mɔɔ anwo ɛgua evinli na bɛnlɛ diedi la, debie biala anwo ɛnde, ɔluakɛ bɛ nzuzulɛ nee bɛ adwenle nwo ɛgua evinli. 16  Bɛka ye bagua nu kɛ bɛze Nyamenle, noko bɛfa bɛ gyima bɛkpo ye, ɔluakɛ bɛle kyibadeɛ nee anzosesebɛma na bɛnfɛta gyima kpalɛ biala.

Ɔ Bo Edwɛkɛ

Anzɛɛ “wowawowa.”
Anzɛɛ “ɔ sa ɛnyɛ kpokpo.”
Anzɛɛ “ɔze nrɛlɛbɛ.”
Anzɛɛ “edwɛkɛ mɔɔ bɛkola bɛfa bɛ rɛle bɛto zo la.”
Anzɛɛ “mɔɔ nvasoɛ wɔ zo la.”
Anzɛɛ “yeadu folɛ.”