Faelimɔn 1:1-25

  • Ahyebizalɛ (1-3)

  • Faelimɔn ɛlɔlɛ nee diedi (4-7)

  • Pɔɔlo sɛlɛ amaa Onɛsemɛse (8-22)

  • Ahyebizalɛ mɔɔ li awieleɛ (23-25)

 Pɔɔlo, mɔɔ Kelaese Gyisɛse ati mela efiade la nee yɛ diema Timote ɛlɛkɛlɛ ahɔmaa Faelimɔn, yɛ kulovolɛ nee yɛ gɔnwo gyimayɛvolɛ  nee yɛ diema raalɛ Afea nee yɛ gɔnwo sogyanli Aakepɛse, nee asafo ne mɔɔ wɔ wɔ sua nu ɛkɛ ne la:  Yɛ Ze Nyamenle nee Awulae Gyisɛse Kelaese ɛlo wɔ na ɔmaa wɔ anzodwolɛ.  Mekɛ biala mɔɔ mekɛbɔ wɔ duma wɔ me asɔneyɛlɛ nu la, meda me Nyamenle ne ase,  kɛ dahuu mete wɔ diedi nee ɛlɔlɛ mɔɔ ɛlɛ ɛmaa Awulae Gyisɛse nee nwuanzanwuanzama ne mɔ amuala la anwo edwɛkɛ.  Mesɛlɛ kɛ diedi ne mɔɔ ɛ nee ɛ gɔnwo mɔ diedima lɛ la bamaa wɔanwu nyilalɛ ne mɔɔ yɛlua Kelaese anwo zo yɛnyia la amuala.  Ɔluakɛ mɔɔ mendele wɔ ɛlɔlɛ ne anwo edwɛkɛ la, menlile fɛlɛko kpole na me rɛle kyekyele, ɔboalekɛ wɔmaa nwuanzanwuanzama ne ahonle ɛdɔ bɛ azule nu,* adiema.  Ɛhye ati, anrɛɛ mekola mefa akɛnrasesebɛ kpole metendɛ wɔ Kelaese anu memaa ɛyɛ mɔɔ fɛta la ɛdeɛ,  noko mekulo kɛ megyinla ɛlɔlɛ zo mesɛlɛ wɔ, ɔboalekɛ medame Pɔɔlo, meyɛ kpanyinli yɛɛ kɛkala noko Kelaese Gyisɛse ati, mela efiade. 10  Mesɛlɛ wɔ meamaa me ra Onɛsemɛse, mɔɔ membanyɛle ye papa wɔ mekɛ mɔɔ mela efiade la. 11  Mekɛ bie mɔɔ ɛraze ɛhɔ la, ɛnee ɔ nwo ɛnlɛ nvasoɛ ɛmmaa wɔ, noko kɛkala ɔ nwo lɛ nvasoɛ maa wɔ nee medame. 12  Melɛsiane ye meamaa yeara ɛ nwo lɔ, ɛhɛe, ahenle mɔɔ la me ahonle nwo la.* 13  Anrɛɛ mekulo kɛ ɔtɛnla me nwo ɛke na yeagyinla ɛ gyakɛ anu yeazonle me wɔ edwɛkpa ne anwo wɔ mekɛ mɔɔ mela efiade la. 14  Noko mengulo kɛ meyɛ debie mɔɔ ɛnze nu la, amaa wɔ kpalɛyɛlɛ ne anyɛ mialeranu debie, emomu mɔɔ vi ɛdawɔ mumua ne wɔ ɛhulolɛ nu la. 15  Ɔkɛyɛ kɛ ɛhye ati a ɔvile ɛ nwo ɛkɛ ne mekɛ ekyi* a, amaa saa ɔsia ɔba a yeaha ɛkɛ ne bɔkɔɔ, 16  tɛ kɛ akɛlɛ bieko, emomu awie mɔɔ tɛla akɛlɛ, kɛ adiema kulovolɛ, titili ɔmaa me, noko ɔle mɔɔ tɛla zɔ la ɔmaa wɔ, wɔ nwonane afoa nu nee Awulae anu. 17  Yemɔti saa ɛbu me kɛ mele ɛ gɔnwo a, ɛnee die ye kɛnlɛma kɛ anrɛɛ ɛbalie me la. 18  Bieko, saa yeyɛ wɔ ɛtane bie anzɛɛ ɔtua wɔ kakɛ a, fa kakɛ ne maa me. 19  Medame Pɔɔlo, medame mumua ne me sa a melɛfa meahɛlɛ a: Mebadua meamaa wɔ—ɔngyia kɛ meka mekile wɔ kɛ ɛdawɔ noko ɛtua me kakɛ. 20  Ɛhɛe, adiema, maa menyia moalɛ ɛhye menvi wɔ ɛkɛ wɔ Awulae anu; maa me ahonle ɛdɔ me azule nu* wɔ Kelaese anu. 21  Melɛkɛlɛ wɔ ɛhye, na melɛ anwodozo kɛ ɛbayɛ mɔɔ mebiza la, yɛɛ meze kɛ ɛbayɛ wɔamaa yeabo zolɛ bɔbɔ. 22  Eza kpondɛ ɛleka mɔɔ mebadɛnla la maa me, ɔluakɛ me nye la kɛ ɔlua bɛ asɔneyɛlɛ zo bɛbaye me na meara bɛ nwo lɔ.* 23  Ɛpafelase, mɔɔ me nee ye la efiade wɔ Kelaese Gyisɛse anu la, 24  nee Maake, Alesetaakɛse, Dimase, yɛɛ Luku, mɔɔ bɛle me gɔnwo mɔ gyimayɛvoma la biza wɔ. 25  Awulae Gyisɛse Kelaese ɛlolɛ ne nee sunsum ne mɔɔ bɛda ye ali la ɛdɛnla.

Ɔ Bo Edwɛkɛ

Anzɛɛ “anye ɛlie.”
Anzɛɛ “me nye die ɔ nwo la.”
Giliki aneɛ nu, “dɔnehwele ko.”
Anzɛɛ “maa me nye ɛlie.”
Anzɛɛ “bɛbagyakyi me bɛamaa bɛ.”