Dwɔn 9:1-41

  • Gyisɛse yɛ anyenzinliravolɛ bie ayile (1-12)

  • Falasiima biza nrenyia ne kpuya (13-34)

  • Falasiima le anyezinliravolɛma (35-41)

9  Mɔɔ ɔlɛpɛ nu la, ɔnwunle nrenyia bie mɔɔ bɛwole ye anyenzinliravolɛ la.  Na ye ɛdoavolɛma ne bizale ye kɛ: “Relabae, nwane a yɛle ɛtane a, nrenyia ɛhye anzɛɛ ye awovolɛ ɔ, mɔɔ ɔti bɛwo ye anyenzinliravolɛ a?”  Gyisɛse buale kɛ: “Tɛ nrenyia ɛhye ɛtane anzɛɛ ye awovolɛ ɛtane a ɛmaa yeyɛ anyenzinliravolɛ a. Ɛhye ɛra ye zɔ amaa menli anwu Nyamenle gyima.  Alehyenlɛ ye wɔ zo la, ɔwɔ kɛ yɛyɛ Mɔɔ zoanle me la gyima ne; aledwolɛ ɛlɛba mɔɔ awie biala ɛnrɛhola ɛnrɛyɛ gyima a.  Mekɛ tendenle ala mɔɔ mewɔ ewiade ye anu la, medame a mele ewiade wienyi ne a.”  Ɔhanle ɛhye la, ɔdole nyɛlɛ aze ɔvale ɔfɔtɔle ndɛtɛlɛ, na ɔvale ndɛtɛlɛ ne ɔkpudale nrenyia ne anye  na ɔzele ye kɛ: “Kɔnrinzi ye wɔ Saelowam nzubula ne anu” (Saelowam abo kile “Ɛzoanlɛ”). Na ɔhɔnrinzinle, na mɔɔ ɔziale ɔrale la ɛnee ɔnwu debie.  Akee kpalɛ ne azo amra nee menli mɔɔ ɛnwu ye ɛlɛ kɛ ɔlɛsɛlɛzɛlɛ debie la bɔle ɔ bo hanle kɛ: “Asoo tɛ nrenyia ne mɔɔ tɛnla sɛlɛzɛlɛ la ɛne?”  Bie mɔ hanle kɛ: “Ɔdaye ɔ.” Bie mɔ noko hanle kɛ: “Kyɛkyɛ, ɔzɔho ye ala.” Nrenyia ne hanle kɛ: “Medame ɔ.” 10  Yemɔti bɛbizale ye kɛ: “Ɛnee kɛ ɔyɛle mɔɔ ɛ nye ne bukele ɛ?” 11  Ɔbuale kɛ: “Nrenyia ne mɔɔ bɛfɛlɛ ye Gyisɛse la fɔtɔle ndɛtɛlɛ vale kpudale me nye na ɔzele me kɛ, ‘Kɔnrinzi ye wɔ Saelowam ne anu.’ Yemɔti mengɔnrinzinle yɛɛ me nye ne bukele a.” 12  Bɛbizale ye kɛ: “Nrenyia zɔhane wɔ ni?” Ɔbuale kɛ: “Menze.” 13  Bɛvale nrenyia ne mɔɔ ɛnee ɔ nye ɛzi la bɛhɔle Falasiima ne ɛkɛ. 14  Ɔrale ye kɛ, kenle ne mɔɔ Gyisɛse fɔtɔle ndɛtɛlɛ ne na ɔbukele ɔ nye ne la le Ɛnwomenlelielɛ kenle. 15  Yemɔti Falasiima ne noko bɔle ɔ bo bizale nrenyia ne kɛzi ɔ nye ne bukele la. Ɔzele bɛ kɛ: “Ɔvale ndɛtɛlɛ ɔkpudale me nye, na menrinzinle la yɛɛ menwunle debie a.” 16  Falasiima ne bie mɔ bɔle ɔ bo hanle kɛ: “Nrenyia ɛhye ɛnvi Nyamenle ɛkɛ ɔluakɛ ɔnli Ɛnwomenlelielɛ kenle ne azo.” Bie mɔ noko hanle kɛ: “Kɛ ɔkɛyɛ na awie mɔɔ le ɛtanevolɛ la ahola ayɛ nwanwane ninyɛne mɔɔ le zɛhae ɛ?” Yemɔti bɛ nuhua hyɛle nwiɔ. 17  Bɛbizale anyenzinliravolɛ ne bieko kɛ: “Kɛmɔ ɛdawɔ a ɔbukele ɛ nye la ati, duzu edwɛkɛ a ɛka ye wɔ ɔ nwo a?” Nrenyia ne hanle kɛ: “Ɔle ngapezonli.” 18  Noko ɛnee Dwuuma ne ɛnlie ɛnli kɛ ɔle anyenzinliravolɛ yɛɛ kɛkala ɔnwu debie a, yemɔti bɛvɛlɛle ye awovolɛ. 19  Na bɛbizale bɛ kɛ: “Asoo bɛ ra ne mɔɔ bɛse bɛwole ye anyenzinliravolɛ la ɛne? Kɛ ɔyɛle mɔɔ kɛkala ɔnwu debie ɛ?” 20  Ye awovolɛ buale kɛ: “Yɛze kɛ yɛ ra ne ɛne yɛɛ yɛwole ye la ɛnee ɔ nye ɛzi. 21  Noko kɛ ɔyɛle mɔɔ kɛkala ɔnwu debie la yemɔ yɛnze; yɛɛ yɛnze ahenle mɔɔ bukele ɔ nye a. Bɛbiza ye. Yenyi. Ɔdaye mumua ne ɔbaha ye edwɛkɛ.” 22  Ye awovolɛ hanle ɛhye ɔluakɛ bɛsulo Dwuuma ne, ɛnee Dwuuma ne ɛbɔ kpɔkɛ kɛ awie biala mɔɔ kɛha kɛ yemɔ a ɔle Kelaese ne la, ɔwɔ kɛ bɛye ahenle zɔhane bɛfi nyianu sua ne anu. 23  Ɛhye ati a ye awovolɛ hanle kɛ: “Yenyi. Bɛbiza ye” la. 24  Yemɔti bɛvɛlɛle nrenyia ne mɔɔ ɛnee le anyenzinliravolɛ la bieko na bɛzele ye kɛ: “Wula Nyamenle anyunlunyia; yɛze kɛ nrenyia ɛhye le ɛtanevolɛ.” 25  Ɔbuale kɛ: “Saa ɔle ɛtanevolɛ a, mame menze. Debie ko a meze a, yemɔ a le kɛ ɛnee me nye ɛzi, noko kɛkala menwu debie.” 26  Akee bɛbizale ye kɛ: “Duzu a ɔyɛle wɔ a? Kɛzi ɔbukele ɛ nye ne ɛ?” 27  Ɔbuale bɛ kɛ: “Meha mehile bɛ dɛba, noko bɛandie. Duzu ati a bɛkulo kɛ bɛtie ye bieko a? Bɛkulo kɛ bɛdabɛ noko bɛyɛ ye ɛdoavolɛma ɔ?” 28  Bɛbɔle ye aholoba kɛ: “Wɔmɔ a ɛle nrenyia zɔhane ɛdoavolɛ a, yɛmɛ yɛle Mosisi ɛdoavolɛma. 29  Yɛze kɛ Nyamenle dendɛle hilele Mosisi, noko nrenyia ɛhye, yemɔ yɛnze ɛleka mɔɔ ɔvi a.” 30  Nrenyia ne buale bɛ kɛ: “Ɛhye yɛ azibɛnwo kpalɛ, kɛ bɛnze ɛleka mɔɔ ɔvi a, noko yebuke me nye. 31  Yɛze kɛ Nyamenle ɛndie ɛtanevolɛma, noko saa awie sulo Nyamenle na ɔyɛ ye ɛhulolɛdeɛ a, ɔtie ye. 32  Ɔvi tete ne badwu ɛnɛ yɛtɛtele kɛ awie ɛbuke awie mɔɔ bɛwole ye anyenzinliravolɛ la anye ɛlɛ. 33  Saa nrenyia ɛhye ɛnvi Nyamenle ɛkɛ ne a, anrɛɛ ɔnrɛhola ɔnrɛyɛ ɛhwee.” 34  Bɛbuale ye kɛ: “Wɔmɔ mɔɔ bɛwole wɔ ɛtane nu la a ɛkilehile yɛ a?” Na bɛvoanle ye! 35  Gyisɛse dele kɛ bɛvoa ye na mɔɔ ɔnwunle ye la, ɔhanle kɛ: “Ɛdie sonla Ra ne ɛdi ɔ?” 36  Nrenyia ne buale kɛ: “Yɛmenle, yemɔ a le nwane, amaa mealie ye meali?” 37  Gyisɛse zele ye kɛ: “Wɔnwu ye, na yemɔ ala a nee wɔ ɛlɛtendɛ la.” 38  Ɔhanle kɛ: “Yɛmenle, medie ye medi.” Na ɔhotole ye. 39  Gyisɛse hanle kɛ: “Membale ewiade ɛhye anu amaa bɛabua ewiade ne ndɛne, na bɛdabɛ mɔɔ bɛ nye ɛzi la anwu debie na bɛdabɛ mɔɔ bɛnwu debie la anye azi.” 40  Falasiima bie mɔɔ ɛnee wɔ ɛkɛ ne la dele ɛhye na bɛhanle kɛ: “Ɛnee ɛdwenle kɛ yɛdayɛ noko yɛ nye ɛzi ɔ?” 41  Gyisɛse zele bɛ kɛ: “Saa bɛ nye ɛzi a, anrɛɛ ɛtane ɛnle bɛ nwo. Noko bɛse, ‘Yɛnwu debie.’ Bɛ ɛtane ne ɛha bɛ nwo.”

Ɔ Bo Edwɛkɛ