Dwɔn 7:1-52

  • Gyisɛse wɔ Kpɔda Bo Ɛdɛnlanlɛ Ɛvoyia bo (1-13)

  • Gyisɛse kilehile wɔ ɛvoyia bo (14-24)

  • Kelaese anwo adwenle ngakyile (25-52)

7  Ɛhye anzi, Gyisɛse hɔle zo kpɔsale wɔ Galeli, ɛnee ɔngulo kɛ ɔkɔ Dwudiya ɔluakɛ ɛnee Dwuuma ne ɛlɛkpondɛ ye ahu ye.  Noko ɛnee Dwuuma Kpɔda Bo Ɛdɛnlanlɛ Ɛvoyia ne ɛbikye.  Yemɔti ɔ mediema ne mɔ zele ye kɛ: “Fi ɛke kɔ Dwudiya amaa wɔ ɛdoavolɛma ne noko anwu gyima mɔɔ ɛlɛyɛ la.  Awie biala ɛnyɛ debie fealeranu wɔ mekɛ mɔɔ ɔkulo kɛ menli nwu ye la. Saa ɛlɛyɛ ɛhye mɔ a, ɛnee da ɛ nwo ali kile ewiade ne.”  Nɔhalɛ nu, ɛnee ɔ mediema ne mɔ ɛnlie ye ɛnli.  Yemɔti Gyisɛse zele bɛ kɛ: “Me mekɛ ɛtɛdwule, noko bɛmɛ, mekɛ biala le kpalɛ maa bɛ.  Ewiade ne ɛnlɛ mɔɔ ɔgyinla zolɛ yeakpɔ bɛ a, noko ɔkpɔ me, ɔluakɛ medi ɔ nwo daselɛ kɛ ye gyima ɛnle kpalɛ.  Bɛmɛ bɛhɔ ɛvoyialilɛ ne abo; mame metɛnyianle metɛkɔle ɛvoyialilɛ ne abo ɔluakɛ me mekɛ ne ɛtɛdwule.”  Ɔti mɔɔ ɔhanle ɛhye ɔhilele bɛ la, ɔdɛnlanle Galeli. 10  Noko mekɛ mɔɔ ɔ mediema ne mɔ hɔle ɛvoyialilɛ ne abo la, ɔdaye noko ɔveale ɔ nwo ɔhɔle. 11  Yemɔti Dwuuma ne bɔle ɔ bo kpondɛle ye wɔ ɛvoyialilɛ ne abo na bɛhanle kɛ: “Nrenyia ne wɔ ni?” 12  Ɛnee menli ne ɛlɛka ɔ nwo edwɛkɛ huhuhuhu. Bie mɔ se: “Ɔle sonlakpalɛ.” Bie mɔ noko se: “Ɔnle nɔhalɛ. Ɔbɛlɛbɛla menli.” 13  Noko awie biala angola anga ɔ nwo edwɛkɛ wɔ bagua nu ɔluakɛ ɛnee bɛsulo Dwuuma ne. 14  Mɔɔ ɛvoyialilɛ ne hɔdwule avinli la, Gyisɛse hɔle ɛzonlenlɛ sua ne anu na ɔbɔle ɔ bo ɔhilehilele. 15  Na ɔzinle Dwuuma ne anwo na bɛhanle kɛ: “Kɛ ɔyɛle mɔɔ nrenyia ɛhye ze Ngɛlɛlera ne* zɛhae wɔ mekɛ mɔɔ ɔtɛkɔle sukulu* biala la ɛ?” 16  Na Gyisɛse buale bɛ kɛ: “Mɔɔ mekilehile la ɛnle me ɛdeɛ, emomu ɔle mɔɔ zoanle me la ɛdeɛ. 17  Saa awie kulo kɛ ɔyɛ Nyamenle ɛhulolɛdeɛ a, ɔbanwu ye saa ngilehilelɛ ne vi Ye ɛkɛ anzɛɛ mebɔ me ti anu a metendɛ a. 18  Awie biala mɔɔ bɔ ɔ ti anu tendɛ la wula ɔ nwo anyunlunyia; na awie biala mɔɔ wula ahenle mɔɔ zoanle me anyunlunyia la ka nɔhalɛ na adalɛ biala ɛnle ye nu. 19  Asoo tɛ Mosisi a vale Mɛla ne maanle bɛ a? Noko bɛ nuhua ko bɔbɔ ɛnli Mɛla ne azo. Duzu ati a bɛkpondɛ kɛ bɛku me a?” 20  Menli ne buale kɛ: “Sunsum ɛtane wɔ ɛ nwo. Nwane a ɛlɛkpondɛ wɔ ahu wɔ a?” 21  Gyisɛse buale bɛ kɛ: “Debie ko pɛ mɔɔ menyɛle la ɛzi bɛ muala bɛ nwo. 22  Ɛhye ati a Mosisi ɛmaa bɛ mrenyia zo ɛpɛlɛ nwo mɛla la—noko ɔnvi Mosisi, ɔvi bɛ nlenyia mɔ ɛkɛ—yɛɛ ɔdwu ɛnwomenlelielɛ kenle a bɛpɛ awie mrenyia zo. 23  Saa bɛpɛ awie mrenyia zo wɔ ɛnwomenlelielɛ kenle na ɔndo Mosisi Mɛla ne a, ɛnee duzu ati a bɛva me nwo ɛya kpole kɛ memaa awie ɛde kpɔkɛ bɔkɔɔ wɔ ɛnwomenlelielɛ kenle a? 24  Bɛmmanea sonla nyunlu bɛbua ndɛne, emomu bɛbua ndɛne fɔɔnwo.” 25  Na Gyɛlusalɛmma bie mɔ bɔle ɔ bo hanle kɛ: “Asoo tɛ nrenyia ɛhye a bɛlɛkpondɛ ye bahu ye la? 26  Noko nea! ɔlɛtendɛ bagua nu, noko bɛnga ɛhwee bɛngile ye. Asoo mgbanyima ne mɔ ɛlie ye ɛdo nu kɛ yemɔ a ɔle Kelaese ne ɔ? 27  Yɛze ɛleka mɔɔ nrenyia ɛhye vi a; noko saa Kelaese ne ba a, awie biala ɛnrɛnwu ɛleka mɔɔ ɔvi a.” 28  Akee mekɛ mɔɔ Gyisɛse ɛlɛkilehile wɔ ɛzonlenlɛ sua ne anu la, ɔhanle ye kpole kɛ: “Bɛze me yɛɛ bɛze ɛleka mɔɔ mevi a. Meamba me ti anwo adenle, emomu mɔɔ zoanle me la wɔ ɛkɛ amgba, na bɛnze ye. 29  Meze ye, yɛɛ megyi ɔ gyakɛ anu, yɛɛ ɔdaye a ɔzoanle me a.” 30  Yemɔti bɛyɛle kɛ bɛkye ye, noko awie biala angola anva ɔ sa anga ye ɔluakɛ ye mekɛ ne ɛtɛdwule. 31  Noko menli dɔɔnwo liele ye lile, na bɛhanle kɛ: “Saa Kelaese ne ba a, asoo ɔbayɛ nwanwane ninyɛne dɔɔnwo yeadɛla mɔɔ nrenyia ɛhye ɛyɛ la ɔ?” 32  Falasiima ne dele mɔɔ menli ne ɛlɛka ye huhuhuhu wɔ ɔ nwo la, na ɛsɔfo mgbanyinli nee Falasiima ne zoanle sinzavolɛma kɛ bɛhɔhye ye. 33  Akee Gyisɛse hanle kɛ: “Me nee bɛ badɛnla mekɛ ekyi na meahɔ Mɔɔ zoanle me la anwo lɔ. 34  Bɛbakpondɛ me noko bɛnrɛnwu me yɛɛ ɛleka mɔɔ mewɔ la bɛnrɛhola bɛnrɛra ɛkɛ.” 35  Yemɔti Dwuuma ne hanle ye wɔ bɛ nwo ɛkɛ ne kɛ: “Nienwu a nrenyia ɛhye kpondɛ kɛ ɔkɔ mɔɔ yɛnrɛnwu ye a? Asoo ɔkulo kɛ ɔkɔ Dwuuma mɔɔ wɔ Gilikima avinli la ɛkɛ na ɔkilehile Gilikima ne noko ɔ? 36  Edwɛkɛ ne mɔɔ ɔhanle kɛ, ‘Bɛbakpondɛ me noko bɛnrɛnwu me, yɛɛ ɛleka mɔɔ mewɔ la bɛnrɛhola bɛnrɛra ɛkɛ la kile duzu’?” 37  Kenle mɔɔ li awieleɛ, mɔɔ le ɛvoyialilɛ ne kenle kpole la, Gyisɛse dwazole gyinlanle na ɔhanle ye kpole kɛ: “Saa nzuhɔne ɛlɛku awie a, ɔrɛla me ɛkɛ na ɔranlo nzule. 38  Awie biala mɔɔ die me di, kɛ mɔɔ Ngɛlɛlera ne ɛha la: ‘Ngoane azudenle vi ye ahonle nu baze.’” 39  Noko ɛnee Gyisɛse ɛlɛka sunsum ne mɔɔ menli mɔɔ kɛlie kɛli banyia la anwo edwɛkɛ; ɛnee bɛtɛnyianle sunsum ne ɔluakɛ ɛnee bɛtɛwulale Gyisɛse anyunlunyia. 40  Menli ne bie mɔ mɔɔ dele edwɛkɛ ɛhye la bɔle ɔ bo hanle kɛ: “Amgba, Ngapezonli ne ɛne.” 41  Ɛnee bie mɔ noko ɛlɛka kɛ: “Kelaese ne ɛne.” Yɛɛ bie mɔ noko se: “Asoo Galeli a Kelaese ne bavi ara a? 42  Asoo ngɛlɛlera ne anga kɛ Kelaese ne bayɛ Devidi ara yɛɛ ɔbavi Bɛtelɛhɛm, namule ne mɔɔ ɛnee Devidi wɔ zo la azo a yeara ɔ?” 43  Yemɔti ɔ nwo edwɛkɛ maanle mgbakyemgbakyenu ralale menli ne avinli. 44  Bɛ nuhua bie mɔ yɛle kɛ bɛkye ye, noko awie biala angola anva ɔ sa anga ye. 45  Yemɔti mekɛ mɔɔ sinzavolɛma ne ziale hɔle la, ɛsɔfo mgbanyinli nee Falasiima ne bizale bɛ kɛ: “Duzu ati a bɛanva ye bɛamba ɛ?” 46  Sinzavolɛma ne buale kɛ: “Awie biala ɛtɛtendɛle zɛhae ɛlɛ.” 47  Na Falasiima ne buale kɛ: “Ɛnee bɛmaa yebɛlɛbɛla bɛdabɛ noko ɔ? 48  Asoo bɛnwu kɛ mgbanyima ne mɔ anzɛɛ Falasiima ne bie ɛlie ye ɛli ɔ? 49  Noko menli ɛhye mɔɔ bɛnze Mɛla ne la le menli mɔɔ nvasoɛ ɛnle bɛ nwo zo.” 50  Nekɔdimɛse mɔɔ ɛnee ɔle Falasiinli na mekɛ bie ɔhɔle ye ɛkɛ la zele bɛ kɛ: 51  “Asoo yɛ Mɛla ne maa yɛbua awie ndɛne wɔ mekɛ mɔɔ yɛtɛtiele ye edwɛkɛ na yɛtɛnwunle mɔɔ ɔlɛyɛ la ɔ?” 52  Bɛbuale ye kɛ: “Ɛnee ɛdawɔ noko ɛvi Galeli ɔ? Neɛnlea nu na ɛbanwu kɛ ngapezonli biala ɛnrɛvi Galeli ɛnrɛra.”*

Ɔ Bo Edwɛkɛ

Giliki aneɛ nu, “ninyɛne mɔɔ bɛhɛlɛ la.”
Ɛhye le Relabaema sukulu.
Tete bɛsanloangɛlɛlera dɔɔnwo ɛnva ngyɛnu 53 kɔdwu tile 8:11 ɛmboka nwo.