Dwɔn 4:1-54

  • Gyisɛse nee Samɛleanli raalɛ ne (1-38)

    • Sonle Nyamenle “sunsum nee nɔhalɛ nu” (23, 24)

  • Samɛleama dɔɔnwo die Gyisɛse di (39-42)

  • Gyisɛse yɛ kpanyinli bie ara ayile (43-54)

4  Mekɛ mɔɔ Awulae nwunle kɛ Falasiima ɛde kɛ ɔlɛnyia* ɛdoavolɛma dɔɔnwo yɛɛ ɔlɛsɔne menli yeadɛla Dwɔn la—  Gyisɛse mumua ne anzɔne menli, emomu ye ɛdoavolɛma ne a zɔnenle bɛ a—  ɔvile Dwudiya na ɔhɔle Galeli bieko.  Noko ɛnee ɔwɔ kɛ ɔfa Samɛlea.  Yemɔti ɔrale Samɛlea sua bie mɔɔ bɛfɛlɛ ye Saekaa la azo, ɔbikye azɛlɛ ne mɔɔ Gyekɔbo vale maanle ɔ ra Dwosefi la.  Ɛkɛ ne noko a ɛnee Gyekɔbo bula ne wɔ a. Ɛnee adendulɛ ne ɛmaa Gyisɛse ɛvɛ yemɔti ɔdɛnlanle bula ne azo. Ɛnee bɛbɔ kɛyɛ ewiazo bulu nee nwiɔ.*  Raalɛ bie mɔɔ vi Samɛlea la rale kɛ ɔbaza nzule. Gyisɛse zele ye kɛ: “Maa me nzule ne bie meno.”  (Ɛnee ye ɛdoavolɛma ne ɛhɔ sua zo kadɔ aleɛ.)  Yemɔti Samɛleanli raalɛ ne bizale ye kɛ: “Duzu ati a ɛle Dwuunli noko ɛlɛbiza medame mɔɔ mele Samɛleanli la kɛ memaa wɔ nzule ne bie ɛnlo ɛ?” (Ɛnee Dwuuma nee Samɛleama ɛnga.) 10  Gyisɛse buale ye kɛ: “Saa ɛze Nyamenle ahyɛlɛdeɛ ne nee ahenle mɔɔ ɛlɛka ahile wɔ kɛ, ‘Maa me nzule ne bie meno la a,’ anrɛɛ ɛbabiza ye na yeamaa wɔ ngoane nzule.” 11  Ɔzele ye kɛ: “Yɛmenle, ɛnlɛ bokiti mɔɔ ɛbava wɔaza nzule a, yɛɛ bula ne noko anu kɔ. Ɛnee nienwu a ɛbanyia ngoane nzule ne a? 12  Ɛnle kpole ɛndɛla yɛ nlenyia Gyekɔbo mɔɔ dule bula ɛhye maanle yɛ na ɔ nee ɔ mra nee ye nlankɛ nlonle bie la, ɔnle zɔ ɔ?” 13  Gyisɛse buale ye kɛ: “Awie biala mɔɔ no nzule ɛhye bie la, nzuhɔne bahu ye bieko. 14  Awie biala mɔɔ kɛnlo nzule ne mɔɔ mebava meamaa ye la, nzuhɔne ɛnrɛhu ye ɛlɛ, emomu nzule ne mɔɔ mebava meamaa ye la bayɛ nzubula wɔ ye nu mɔɔ bamaa yeanyia dahuu ngoane a.” 15  Raalɛ ne zele ye kɛ: “Yɛmenle, maa me nzule ɛhye bie, amaa nzuhɔne angu me na meangɔ zo meamba ɛke kɛ mebaza nzule.” 16  Ɔzele ye kɛ: “Kɔvɛlɛ ɛ hu na ɛ nee ye bɛrɛla.” 17  Raalɛ ne buale kɛ: “Mengya nrenyia.” Gyisɛse zele ye kɛ: “Wɔha ye boɛ kɛ ɛse, ‘Mengya nrenyia la.’ 18  Ɔluakɛ wɔgya mrenyia nnu, na nrenyia ne mɔɔ ɛ nee ye de kɛkala la, ɔnle ɛ hu. Yemɔti wɔha nɔhalɛ.” 19  Raalɛ ne zele ye kɛ: “Yɛmenle, menwu kɛ ɛle ngapezonli. 20  Yɛ nlenyia mɔ zonlenle wɔ boka ɛhye azo, noko bɛmɛ bɛse Gyɛlusalɛm a le ɛleka mɔɔ ɔwɔ kɛ menli sonle a.” 21  Gyisɛse zele ye kɛ: “Raalɛ ye, die me di, mekɛ ɛlɛba mɔɔ tɛ boka ɛhye azo anzɛɛ Gyɛlusalɛm a bɛbazonle Selɛ ne a. 22  Bɛsonle mɔɔ bɛnze ye la; yɛmɛ yɛsonle mɔɔ yɛze ye la, ɔluakɛ ngoanelielɛ bɔle ɔ bo wɔ Dwuuma ɛkɛ. 23  Noko mekɛ ɛlɛba na yedwu bɔbɔ, mɔɔ nɔhalɛ azonvolɛ bazonle Selɛ ne wɔ sunsum nee nɔhalɛ nu a, na Selɛ ne ɛlɛkpondɛ bɛdabɛ mɔɔ bɛle kɛ ɛhye mɔ la yeamaa bɛazonle ye. 24  Nyamenle le Sunsum, na ɔwɔ kɛ bɛdabɛ mɔɔ bɛlɛsonle ye la sonle ye wɔ sunsum nee nɔhalɛ nu.” 25  Raalɛ ne zele ye kɛ: “Meze kɛ Mɛzaya ne mɔɔ bɛfɛlɛ ye Kelaese ne la ɛlɛba. Saa ɔba a, ɔbaha debie biala yeahile yɛ wienyi.” 26  Gyisɛse zele ye kɛ: “Medame ɔ, mame a me nee wɔ ɛlɛtendɛ la.” 27  Mekɛ ne anu ala ye ɛdoavolɛma ne rale, na ɔyɛle bɛ azibɛnwo kɛ ɔ nee raalɛ ɛlɛtendɛ la. Noko awie biala ambiza ye kɛ: “Duzu a ɛkpondɛ a?” anzɛɛ “Duzu ati a ɛ nee ye ɛlɛtendɛ ɛ?” 28  Yemɔti raalɛ ne gyakyile ye nzule buakɛ ne ɛkɛ na ɔhɔle sua ne azo ɔhɔhanle ɔhilele menli ne kɛ: 29  “Bɛrɛla na bɛranlea nrenyia bie mɔɔ ɛha debie biala mɔɔ meyɛ la ɛhile me a. Asoo tɛ yemɔ a ɔle Kelaese ne ɔ?” 30  Bɛvile sua ne azo na bɛrale ɔ nwo ɛkɛ. 31  Mekɛ ne anu, ye ɛdoavolɛma ne zɛlɛle ye kɛ: “Relabae, di debie.” 32  Noko ɔzele bɛ kɛ: “Melɛ aleɛ medi mɔɔ bɛnze a.” 33  Yemɔti ɛdoavolɛma ne hanle hilele bɛ nwo ngoko kɛ: “Ɛnee awie ɛrɛlɛ ye debie yeli ɔ?” 34  Gyisɛse zele bɛ kɛ: “Me aleɛ a le kɛ mebayɛ ahenle mɔɔ zoanle me la ɛhulolɛdeɛ na meawie ye gyima ne. 35  Asoo bɛnga kɛ yeha siane nna na ma ɛdelɛ mekɛ ne adwu ɔ? Nea! meka meahile bɛ kɛ: Bɛmaa bɛ nye zo bɛnlea ɛya ne mɔ anu kɛ ma ɛbolo mɔɔ ɔwɔ kɛ bɛte a. Kɛkala, 36  mɔɔ te la ɛlɛnyia ahatualɛ na ɔlɛboɔboa ma ne anloa yeamaa dahuu ngoane, amaa mɔɔ dua la nee mɔɔ te la abɔ nu ali fɛlɛko. 37  Ɛhye maa edwɛkɛ ne yɛ nɔhalɛ kɛ: Ko dua yɛɛ ko noko te. 38  Menzoanle bɛ kɛ bɛhɔde mɔɔ bɛanyɛ nwolɛ gyima la. Bie mɔ ɛyɛ gyima, na bɛmɛ a bɛnyia bɛ gyima ne azo nvasoɛ a.” 39  Samɛleama dɔɔnwo mɔɔ vi sua ne azo la liele raalɛ ne mɔɔ lile daselɛ ne la edwɛkɛ ne lile, ɔluakɛ ɔhanle kɛ: “Yeha debie biala mɔɔ meyɛ la yehile me.” 40  Yemɔti mɔɔ Samɛleama ne rale ɔ nwo ɛkɛ la, bɛzɛlɛle ye kɛ ɔ nee bɛ ɛdɛnla, na ɔdɛnlanle bɛ nwo ɛkɛ ne kenle nwiɔ. 41  Ɔlua zo, menli dɔɔnwo liele ye lile ɔlua mɔɔ ɔhanle la ati, 42  na bɛzele raalɛ ne kɛ: “Tɛ mɔɔ ɛhanle la ati a yɛlie yɛli a; ɔluakɛ yɛdayɛ mumua ne yɛde na yɛnwu kɛ nrenyia ɛhye le ewiade ne ngoanedievolɛ amgba.” 43  Kenle nwiɔ ne anzi, ɔvile ɛkɛ ɔhɔle Galeli. 44  Noko Gyisɛse mumua ne lile daselɛ kɛ bɛnli ngapezonli eni wɔ ye sua zo. 45  Ɔti mekɛ mɔɔ ɔdwule Galeli la, Galelima ne liele ye, ɔluakɛ bɛnwunle ninyɛne mɔɔ ɔyɛle ye wɔ Gyɛlusalɛm wɔ ɛvoyialilɛ ne abo la kɔsɔɔti, ɔluakɛ bɛdabɛ noko bɛhɔle ɛvoyialilɛ ne bie. 46  Akee ɔrale Kana mɔɔ wɔ Galeli, ɛleka mɔɔ ɔmaanle nzule ne hakyile nza la bieko. Ɛnee belemgbunli ne sonvolɛ bie ara nrenyia ɛnde kpɔkɛ wɔ Kapɛnayɛm. 47  Mekɛ mɔɔ nrenyia ɛhye dele kɛ Gyisɛse vi Dwudiya ɛra Galeli la, ɔhɔle ye ɛkɛ ɔhɔzɛlɛle ye kɛ ɔrayɛ ɔ ra nrenyia ne ayile ɔluakɛ ɔkpondɛ yeawu. 48  Noko Gyisɛse zele ye kɛ: “Saa bɛannwu sɛkɛlɛneɛ nee nwanwane ninyɛne a, bɛnrɛlie bɛnrɛli.” 49  Belemgbunli sonvolɛ ne zele ye kɛ: “Awulae, maa yɛhɔ na me ra ne kɛwu.” 50  Gyisɛse zele ye kɛ: “Kɔ; ɛ ra ne ɛde kpɔkɛ.” Nrenyia ne liele edwɛkɛ ne mɔɔ Gyisɛse hanle hilele ye la lile, na ɔhɔle. 51  Na mekɛ mɔɔ ɔlua adenle zo ɔlɛkɔ la, ye ngɛkɛlɛ ne mɔ yiale ye na bɛhanle kɛ ɔ ra nrenyia ne ɛde kpɔkɛ.* 52  Yemɔti ɔbizale bɛ mekɛ mɔɔ ɔdele kpɔkɛ la. Bɛbuale ye kɛ: “Ebunlu ne gyakyile anoma kɛyɛ ewiazo dɔne ko.”* 53  Akee selɛ ne nwunle kɛ mekɛ zɔhane anu ala yɛɛ Gyisɛse hanle kɛ: “Ɛ ra ne ɛde kpɔkɛ a.” Yemɔti ɔ nee ye sua nu amra kɔsɔɔti liele lile. 54  Ɛhye a le nwanwane debie mɔɔ tɔ zo nwiɔ mɔɔ Gyisɛse yɛle wɔ mekɛ mɔɔ ɔvi Dwudiya ɔrale Galeli la a.

Ɔ Bo Edwɛkɛ

Giliki aneɛ nu, “Gyisɛse ɛlɛnyia.”
Giliki aneɛ nu, dɔnehwele kɛyɛ nsia ne azo.
Anzɛɛ “ɛlɛte kpɔkɛ.”
Giliki aneɛ nu, dɔnehwele kɛyɛ nsuu ne azo.