Dwɔn 10:1-42

  • Mboaneneavolɛ nee mboane ne (1-21)

    • Gyisɛse le mboaneneavolɛ kpalɛ (11-15)

    • “Melɛ mboane gyɛne” (16)

  • Dwuuma yia Gyisɛse wɔ Azoyilalɛ Ɛvoyia bo (22-39)

    • Dwuuma dɔɔnwo anlie anli (24-26)

    • ‘Me mboane tie me ne’ (27)

    • Ralɛ ne nee Selɛ ne le ko (30, 38)

  • Menli dɔɔnwo nyia diedi wɔ Dwɔdan ne anzi (40-42)

10  “Meka nɔhalɛ ne meahile bɛ, mɔɔ ɛnlua anlenkɛ ne anu ɛnwolo mboane tunli ne anu, na ɔdua ɛleka gyɛne ɔfo la le awule na ɔsɛkye debie.  Na mɔɔ fa adenle ne anu wolo la, yemɔ a ɔle mboane ne neavolɛ a.  Anlenkɛ sinzavolɛ ne buke ye, na mboane ne tie ɔ ne. Ɔfa ye mboane ne aluma ɔfɛlɛ bɛ na ɔfa bɛ ɔfinde.  Saa ɔfa ye ɛdeɛ ne kɔsɔɔti ɔfinde a, ɔdi bɛ nyunlu na mboane ne toa ye ɔluakɛ bɛze ɔ ne.  Bɛnrɛdoa ɛyɛvolɛ ɛlɛ, emomu bɛbanriandi bɛavi ɔ nwo ɛkɛ, ɔboalekɛ bɛnze nyɛvolɛ ne.”  Gyisɛse bule ɛrɛlɛ ɛhye hilele bɛ, noko bɛande mɔɔ ɛnee ɔlɛka yeahile bɛ la abo.  Yemɔti Gyisɛse hanle ye bieko kɛ: “Meka nɔhalɛ ne meahile bɛ, mame a mele mboane ne anlenkɛ ne a.  Bɛdabɛ mɔɔ bɛva me duma bɛra la kɔsɔɔti le nwule yɛɛ bɛsɛkye debie; noko mboane ne andie bɛ.  Mame a mele anlenkɛ ne a, awie biala mɔɔ kɛlua me nwo zo kɛwolo nu la bɛbalie ye ngoane, na ahenle zɔhane bawolo nu na yeavinde na yeanyia adidileka. 10  Awule ɛmba kyesɛ ɔbawua na yeahu na yeazɛkye debie. Mera amaa bɛanyia ngoane na bɛanyia ye molozo. 11  Mame a mele mboaneneavolɛ kpalɛ ne a; mboaneneavolɛ kpalɛ ne fa ye ngoane* bɔ afɔle maa mboane ne. 12  Awie mɔɔ bɛkɛbɔ ye ɛkpa, mɔɔ ɔnle mboaneneavolɛ na mboane ne ɛnle ye ɛdeɛ la, saa ɔnwu kɛ bedi ɛlɛba a, ɔgyakyi mboane ne ɛkɛ ne ɔnriandi—bedi ne bakye bɛ na ɔbɔ bɛ asande— 13  ɔboalekɛ bɛbɔ ye ɛkpa yɛɛ ɔndwenle mboane ne anwo. 14  Mame a mele mboaneneavolɛ kpalɛ ne a. Meze me mboane ne yɛɛ me mboane ne ze me, 15  kɛ mɔɔ Selɛ ne ze me na meze Selɛ ne la; na mefa me ngoane* mebɔ afɔle memaa mboane ne. 16  “Melɛ mboane gyɛne mɔɔ bɛnle tunli ɛhye anu a; ɔwɔ kɛ mefa bɛdabɛ noko meba, na bɛbadie me ne na bɛayɛ mboane ekpunli ko, bɛanyia neavolɛ ko. 17  Ɛhye ati a Selɛ ne kulo me la, ɔluakɛ mefa me ngoane* mebɔ afɔle amaa meanyia ye bieko. 18  Awie biala ɛngola ɛnlie ɛnvi me sa nu, medame mumua ne a mefa mebɔ afɔle a. Melɛ tumi mefa mebɔ afɔle, yɛɛ melɛ tumi mefa ye bieko. Menyianle mɛla ɛhye menvile me Ze ɛkɛ.” 19  Edwɛkɛ ɛhye noko maanle Dwuuma ne anu hyɛle nwiɔ. 20  Bɛ nuhua dɔɔnwo hanle kɛ: “Sunsum ɛtane wɔ ɔ nwo yɛɛ yebɔ ɛlane. Duzu ati a bɛtie ye ɛ?” 21  Bie mɔ noko hanle kɛ: “Awie mɔɔ sunsum ɛtane wɔ ɔ nwo la ɛnga edwɛkɛ zɛhae. Asoo sunsum ɛtane kɛhola kɛbuke menli mɔɔ anye ɛzi la anye?” 22  Zɔhane mekɛ ne, ɛnee bɛlɛdi Azoyilalɛ Ɛvoyia ne wɔ Gyɛlusalɛm. Ɛnee ɔle ɛyɛlɛ mekɛ, 23  na ɛnee Gyisɛse lua ɛzonlenlɛ sua ne ɛleka mɔɔ bɛfɛlɛ ye Sɔlɔmɔn abenlana ne la. 24  Akee Dwuuma ne bɔle yiale ye na bɛbizale ye kɛ: “Ɛmaa yɛahendɛ yɛahɔdwu kenlenzu? Saa ɛdawɔ a ɛle Kelaese ne a, ka ye wienyi kile yɛ.” 25  Gyisɛse buale bɛ kɛ: “Meha mehile bɛ, noko bɛnlie bɛnli. Gyima mɔɔ melɛyɛ ye wɔ me Ze duma nu la, yemɔ a di me nwo daselɛ a. 26  Noko bɛnlie bɛnli ɔluakɛ bɛnle me mboane. 27  Me mboane ne tie me ne, meze bɛ yɛɛ bɛtoa me. 28  Memaa bɛ dahuu ngoane, na bɛnrɛzɛkye bɛ ɛlɛ yɛɛ awie biala ɛnrɛhola ɛnrɛlie bɛ ɛnrɛvi me sa nu. 29  Mɔɔ me Ze ɛva ɛmaa me la sonle bolɛ tɛla debie gyɛne biala, na awie biala ɛnrɛhola ɛnrɛlie bɛ ɛnrɛvi Selɛ ne asa nu. 30  Me nee Selɛ ne le ko.”* 31  Dwuuma ne eza sesale awolɛ kɛ bɛtoto bɛazi ye. 32  Gyisɛse buale bɛ kɛ: “Menyɛle gyima kpalɛ dɔɔnwo mɔɔ vi Selɛ ne ɛkɛ la mengilele bɛ. Gyima ɛhye mɔ anu boni ati a bɛkulo kɛ bɛsi me nwolɛ awolɛ a?” 33  Dwuuma ne buale ye kɛ: “Tɛ gyima kpalɛ bie ati a yɛkulo kɛ yɛsi wɔ awolɛ a, emomu ɛka munzule edwɛkɛ; ɔluakɛ ɛle sonla, noko ɛyɛ ɛ nwo kɛ ɛle nyamenle.” 34  Gyisɛse buale bɛ kɛ: “Asoo bɛtɛkɛlɛle ye wɔ bɛ Mɛla ne anu kɛ, ‘Menganle kɛ: “Bɛle nyamenle ɔ”’?* 35  Saa ɔvɛlɛle bɛdabɛ mɔɔ Nyamenle edwɛkɛ ne buale bɛ fɔlɛ la “nyamenle”—na bɛngola bɛngakyi ngɛlɛlera ne a— 36  ɛnee duzu ati a bɛka bɛkile medame mɔɔ Selɛ ne ɛde me nwo na yezoa me wɔ ewiade la kɛ, ‘Meka munzule edwɛkɛ,’ ɔluakɛ meha kɛ, ‘Mele Nyamenle Ara’ la ati ɛ? 37  Saa menyɛ me Ze gyima a, bɛmmadie me bɛdi. 38  Noko saa meyɛ na bɛnlie me bɛnli bɔbɔ a, bɛlie gyima mɔɔ meyɛ la bɛli, amaa bɛanwu ye na bɛahɔ zo bɛalie bɛali kɛ Selɛ ne nee me le ko yɛɛ medame noko me nee Selɛ ne le ko.” 39  Yemɔti bɛbɔle mɔdenle bieko kɛ bɛkye ye, noko ɔvile ɛkɛ na bɛ sa anga ye. 40  Na ɔhɔpɛle Dwɔdan ne bieko ɔhɔle ɛleka mɔɔ Dwɔn limoale zɔnenle menli la, na ɔdɛnlanle ɛkɛ. 41  Na menli dɔɔnwo rale ɔ nwo ɛkɛ na bɛbɔle ɔ bo bɛhanle kɛ: “Dwɔn anyɛ nwanwane debie ko bɔbɔ, noko mɔɔ Dwɔn hanle ye wɔ nrenyia ɛhye anwo la kɔsɔɔti le nɔhalɛ.” 42  Na menli dɔɔnwo liele ye lile wɔ ɛkɛ.

Ɔ Bo Edwɛkɛ

Anzɛɛ “ɛkɛla.”
Anzɛɛ “ɛkɛla.”
Anzɛɛ “ɛkɛla.”
Anzɛɛ “koyɛlɛ wɔ me nee Selɛ ne avinli.”
Anzɛɛ “bɛle kɛ nyamenle la.”