2 Timote 4:1-22

  • “Yɛ wɔ ɛzonlenlɛ gyima ne kpalɛ” (1-5)

    • Ka edwɛkɛ ne ndɛndɛ (2)

  • “Meho konle kpalɛ ne” (6-8)

  • Bɛtianwo edwɛkɛ (9-18)

  • Ahyebizalɛ mɔɔ li awieleɛ (19-22)

4  Meka meahile wɔ wɔ Nyamenle nee Kelaese Gyisɛse, ahenle mɔɔ ɔbabua anyewɔzoamra nee mowuamra ndɛne, ɔlua ɔ nwo mɔɔ ɔbala ye ali nee ye Belemgbunlililɛ ne azo la anyunlu kɛ:  Ka edwɛkɛ ne; yele ɛ nwo yɛ ye ndɛndɛ wɔ mekɛ kpalɛ nee mekɛ ɛtane nu, twi bɛ nyunlu, bɔ bɛ kɔkɔ ɛsesebɛ, tu bɛ folɛ, wɔ abotane nee ngilehilelɛ kpalɛ muala anu.  Ɔluakɛ mekɛ bie bara mɔɔ bɛnrɛdie ngilehilelɛ kpalɛ ne* a, emomu bɛbali bɛdabɛ bɛ atiakunluwɔzo nzi, na bɛaboɔboa kilehilevolɛma anloa bɛamaa bɛ nwo bɛamaa bɛahoto bɛ nzo nu.*  Bɛbaduodua bɛ nzo wɔ nɔhalɛ ne anwo na bɛadie adalɛ edwɛkɛ.  Noko wɔmɔ, maa ɛ nye ɛla ɛkɛ wɔ debie biala anu, gyinla ngyegyelɛ nloa, yɛ edwɛkpakavolɛ gyima ne,* yɛ wɔ ɛzonlenlɛ gyima ne kpalɛ.  Na bɛlɛwola me bɛagua kɛ nza mɔɔ bɛfa bɛabɔ afɔle la, yɛɛ me ɛhɔlɛ mekɛ ne ɛbikye.  Meho konle kpalɛ ne, mezu ɛnriandilɛ ne mewie, mezɔ diedi ne anu.  Ɔvi mekɛ ɛhye mɔɔ kɔ la, mɔɔ wɔ ɛkɛ maa me la a le tenleneyɛlɛ abotile ne mɔɔ Awulae mɔɔ bua ndɛne tenlene bava amaa me kɛ ahatualɛ wɔ kenle zɔhane la, noko tɛ me ngome ɔ, emomu bɛdabɛ mɔɔ bɛkulo ɔ nwo mɔɔ ɔbala ye ali la amuala noko.  Bɔ mɔdenle bɛla me nwo ɛke ndɛndɛ. 10  Ɔluakɛ Dimase ɛhulo kɛkala ewiade ye* la ati, yekpo me na yehɔ Tɛsalonaeka, Kelɛsɛnze ɛhɔ Galeehyea, Taetɛse ɛhɔ Dalemeehyea. 11  Yeha Luku angomekye ala wɔ me nwo ɛke. Ɛ nee Maake ɛrɛla, ɔluakɛ ɔboa me wɔ ɛzonlenlɛ gyima ne anu. 12  Na mezoa Tekekɛse wɔ Ɛfɛsɛse. 13  Saa ɛlɛba a, fa ɛyɛlɛ tɛladeɛ ne mɔɔ mengyakyile ye wɔ Kaapɛse anwo ɛkɛ ne wɔ Tulowase la bɛla, yɛɛ nwomamobɔleɛ ne, titili nane nwoma mbuluku mralɛ ne mɔ. 14  Alɛzanda mɔɔ le kɔbele dwinvolɛ la yɛle me ɛtane kpole. Gyihova* badua ye kakɛ wɔ ye nyɛleɛ ne anwo. 15  Ɛdawɔ noko nea ɛ nwo boɛ wɔ ɔ nwo ɔluakɛ ɔdua adenle biala azo ɔtia yɛ edwɛkɛ ne. 16  Wɔ me edwɛkɛlilɛ ne mɔɔ limoa mɔɔ meka bie mealie me nwo la anu awie biala angyinla me nzi, bɛ muala bɛkpole me—mesɛlɛ kɛ Nyamenle ɛva ɛhyɛ bɛ. 17  Noko Awulae gyinlanle me nzi na ɔmaanle me tumi, amaa ɔlua me nwo zo bɛabɔ edwɛkpa ne nolo bɔkɔɔ na maanle maanle ne amuala ade; na bɛliele me bɛvile awenade ne anloa anu. 18  Awulae balie me avi munzule muala anu na yealie me ngoane yeahɔ ye anwuma Belemgbunlililɛ ne anu. Anyunlunyia ɛha ye dahuu. Amen. 19  Mebiza Pelesela nee Akoyela nee Onɛsefɔlɛse sua nu amra. 20  Yilasetɛse hale Kɔlente, yɛɛ mengyakyile Tulofemɛse wɔ Maelitɛse ɔluakɛ ɛnee ɔnde kpɔkɛ. 21  Bɔ mɔdenle bɛla kolaa na fɔsɛlɛ ne ara. Yubulɛse biza wɔ, ɔ nee Pudɛnse nee Laenɛse nee Kolɔdea yɛɛ mediema ne mɔ amuala. 22  Awulae nee sunsum ne mɔɔ ɛda ye ali la ɛdɛnla. Ye ɛlolɛ ɛha bɛ.

Ɔ Bo Edwɛkɛ

Anzɛɛ “mɔɔ nvasoɛ wɔ zo la.”
Anzɛɛ “bɛamaa bɛaha mɔɔ bɛkulo kɛ bɛte la.”
Anzɛɛ “kɔ zo ka edwɛkpa ne.”
Anzɛɛ “mekɛ ɛhye.” Nea Edwɛkɛbohilelɛ.
Nea Edwɛkɛbohilelɛ.