2 Timote 2:1-26

  • Fa edwɛkɛ ne wula mrenyia nɔhavoma asa nu (1-7)

  • Nwu edwɛkpa ne anwo amaneɛ (8-13)

  • Kilehile Nyamenle edwɛkɛ ne kpalɛ (14-19)

  • Nriandi mgbavolɛ nu atiakunluwɔzo (20-22)

  • Kɛzi bɛ nee dwazotiama di la (23-26)

2  Yemɔti, me ra, kɔ zo nyia tumi wɔ ɛlolɛ ne mɔɔ wɔ Kelaese Gyisɛse anu la anu;  na mɔɔ ɛdele ɛvile me ɛkɛ mɔɔ menli dɔɔnwo di nwolɛ daselɛ la, fa ɛhye mɔ wula mrenyia nɔhavoma asa anu, amaa bɛdabɛ noko bɛafɛta kɛ bɛkilehile awie mɔ.  Ɛdawɔ noko nwu amaneɛ ne bie kɛ ɛle Kelaese Gyisɛse sogyanli kpalɛ.  Awie biala mɔɔ ɛlɛyɛ sogya gyima la ɛnva ɔ nwo ɛnwulowula gualilɛ nu* amaa yeazɔ ahenle mɔɔ vale ye kɛ sogyanli la anye.  Na awie mɔɔ su ɛnriandilɛ* bɔbɔ la, bɛmmaa ye abotile kyesɛ ɔdi nwolɛ mɛla ne mɔ azo.  Ɛyazonlɛnli mɔɔ yɛ gyima ɛsesebɛ la a ɔwɔ kɛ dimoa di ye ɛya nu ma ne bie a.  Dwenle mɔɔ melɛka la anwo dahuu; Awulae bamaa wɔade ninyɛne kɔsɔɔti abo.  Kakye kɛ bɛdwazole Gyisɛse Kelaese bɛvile mowuamra anu, na ɛnee ɔle Devidi ara kɛ mɔɔ edwɛkpa ne mɔɔ meka la de la,  yemɔ anwo a melɛnwu amaneɛ na mela efiade kɛ ɛtanevolɛ la a. Noko bɛngola bɛnkyekye Nyamenle edwɛkɛ ne. 10  Ɛhye ati mekɔ zo mesi abotane wɔ debie biala anu wɔ bɛdabɛ mɔɔ bɛkpa bɛ la ati, amaa bɛdabɛ noko bɛalua Kelaese Gyisɛse anwo zo bɛanyia ngoane nee dahuu anyunlunyia. 11  Edwɛkɛ ɛhye le nɔhalɛ: Saa yɛ nee ye wule a, ɛnee yɛ nee ye badɛnla ngoane nu; 12  saa yɛkɔ zo yɛsi abotane a, yɛ nee ye bali belemgbunli; saa yɛkpo ye a, ɔdaye noko ɔbakpo yɛ; 13  saa yɛnli nɔhalɛ a, yemɔ ɔdi nɔhalɛ, ɔluakɛ ɔngola ɔmkpo ɔ nwo. 14  Kɔ zo kakye bɛ ɛhye mɔ, na kilehile bɛ* wɔ Nyamenle anyunlu kɛ bɛmmadi edwɛkɛ agbɔkɛ nwo butule, ɔle debie mɔɔ nvasoɛ biala ɛnle zo na ɔsɛkye* menli mɔɔ tie la adwenle. 15  Bɔ mɔdenle ɛsesebɛ fa ɛ nwo maa Nyamenle kɛ awie mɔɔ fɛta, gyimayɛvolɛ mɔɔ ɛnze ɛhwee nwo nyiane, na ɔkilehile nɔhalɛ edwɛkɛ ne kpalɛ la. 16  Na kpo edwɛkɛ mgbane mgbane mɔɔ ɔmmaa bɛmbu debie nwuanzanwuanza la, ɔluakɛ ɔbamaa bɛahɔ bɛ nyunlu wɔ ɛtaneyɛlɛ nu, 17  na bɛ edwɛkɛ ne badɛlɛ kɛ hanlɛ mɔɔ ɛdidi nwonane ne abo la. Haemɛneeyɛse nee Faelitɛse boka bɛ nwo. 18  Menli ɛhye mɔ ɛhwe bɛ nwo ɛvi nɔhalɛ ne anwo, bɛka kɛ ewudwazo ne ɛra dɛbadɛba, na bɛlɛsɛkye bie mɔ diedi. 19  Noko, Nyamenle adiabo ne gyi kpundii, na bɛhɛlɛ nwolɛ kɛ, “Gyihova* ze bɛdabɛ mɔɔ bɛle ye ɛdeɛ la,” yɛɛ, “Bɛmaa awie biala mɔɔ bɔ Gyihova* duma la ɛhwe ɔ nwo ɛvi ninyɛndane nwo.” 20  Wɔ sua kpole biala anu, tɛ mbuakɛ mɔɔ bɛvale nvutuke anzɛɛ dwɛtɛ fufule ngome a bɛyɛle la a wɔ nu a, emomu baka nee ndɛtɛlɛ ɛdeɛ noko wɔ nu, bie mɔ anwo hyia yɛɛ bie mɔ noko anwo ɛngyia. 21  Ɔti saa awie twe ɔ nwo fi mɔɔ anwo ɛngyia la anwo a, ɔbayɛ debie* mɔɔ anwo hyia, mɔɔ bɛde nwo, nwolɛ ɛra nvasoɛ ɛmaa ɔ menle, na bɛziezie ye bɛmaa gyima kpalɛ biala la. 22  Yemɔti nriandi mgbavolɛ nu atiakunluwɔzo, na ɛ nee bɛdabɛ mɔɔ bɛfa ahonle mɔɔ anu te bɛfɛlɛ Awulae la ɛli tenleneyɛlɛ, diedi, ɛlɔlɛ, nee anzodwolɛ nzi. 23  Bieko, kpo ngoaseasɛm nee edwɛkɛ mgbane mgbane nwo kpolerazulɛ, ɔluakɛ ɛze kɛ ɔfa butulelilɛ ɔba. 24  Na ɔnle kɛ Awulae akɛlɛ ko, ɔwɔ kɛ ɔyɛ bɛtɛɛ* ɔmaa menli kɔsɔɔti, ɔkola ɔkilehile, na ɔkomo ɔ nwo zo wɔ mekɛ mɔɔ bɛkɛyɛ ye ɛtane la, 25  ɔfa bɛtɛɛyɛlɛ ɔkilehile atuadelɛma. Bie a Nyamenle kɛmaa bɛkɛnlu bɛ nwo* na bɛkɛnyia nɔhalɛ ne anwo nɔhalɛ ndelebɛbo, 26  amaa bɛ nye ara bɛ nwo zo na bɛavi Abɔnsam ɛhane ne mɔɔ yehye bɛ wɔ nu kɛ bɛyɛ ye ɛhulolɛdeɛ la anu.

Ɔ Bo Edwɛkɛ

Anzɛɛ ɔkola ɔkile, “ninyɛne mɔɔ bɛyɛ ye alehyenlɛ biala la anu.”
Giliki aneɛ nu, “di nwɔhoa ngakyile.”
Giliki aneɛ nu, “di bɛ daselɛ bɔkɔɔ.”
Anzɛɛ “ɔkakyi.”
Nea Edwɛkɛbohilelɛ.
Nea Edwɛkɛbohilelɛ.
Anzɛɛ “buakɛ.”
Anzɛɛ “atiakunlukɛnlɛma.”
Anzɛɛ “bɛkɛhakyi bɛ adwenle.”