2 Tɛsalonaekama 1:1-12

  • Ahyebizalɛ (1, 2)

  • Tɛsalonaekama diedi ɛlɛnyi (3-5)

  • Anzosesebɛma nzenralɛlilɛ (6-10)

  • Asɔneyɛlɛ maa asafo ne (11, 12)

1  Pɔɔlo, Seleveenɛse,* nee Timote ɛlɛkɛlɛ ahɔmaa Tɛsalonaekama asafo ne mɔɔ wɔ yɛ Ze Nyamenle ne nee Awulae Gyisɛse Kelaese anu la:  Nyamenle Selɛ ne nee Awulae Gyisɛse Kelaese ɛlo bɛ na ɔmaa bɛ anzodwolɛ.  Mediema, ɔwɔ kɛ bɛdabɛ ti yɛyɛ Nyamenle mo dahuu. Ɛhye fɛta, ɔluakɛ bɛ diedi ɛlɛnyi ayɛ kpole yɛɛ bɛ ɛlɔlɛ mɔɔ bɛ nuhua ko biala lɛ ye wɔ ɔ gɔnwo anwo la ɛlɛyɛ kpole.  Zɔhane ati yɛfa bɛ yɛtu yɛ nwo wɔ Nyamenle asafo ne mɔ anu ɔlua bɛ abotane* nee diedi mɔɔ bɛfa bɛgyinla bɛ kpɔdekpɔdeyɛlɛ nee bɛ anwongyelelɛ* muala anu la ati.  Ɛhye kile kɛ Nyamenle ndɛnebualɛ le fɔɔnwo, na ɛhye ati bɛbu bɛ kɛ bɛfɛta kɛ bɛnyia Nyamenle Belemgbunlililɛ ne mɔɔ yemɔti bɛlɛnwu amaneɛ la.  Ɛhye ati ɔle kpalɛ wɔ Nyamenle anyunlu kɛ ɔbava amaneɛnwunlɛ yeadua bɛdabɛ mɔɔ bɛlɛmaa bɛanwu amaneɛ la kakɛ.  Noko bɛdabɛ mɔɔ bɛlɛnwu amaneɛ la, bɛ nwo badɔ bɛ wɔ mekɛ mɔɔ bɛbaye Awulae Gyisɛse nee ye anwumabɔvolɛma mɔɔ bɛlɛ tumi la bɛavi anwuma bɛahile  wɔ sendɔlɔra nu la, na ɔbali bɛdabɛ mɔɔ bɛnze Nyamenle nee bɛdabɛ mɔɔ bɛndie yɛ Awulae Gyisɛse anwo edwɛkpa ne la nzenralɛ.  Bɛbava dahuu ɛzɛkyelɛ bɛahwe bɛdabɛ mɔɔ bɛle zɛhae la anzo na bɛbavi Awulae anyunlu nee ye anyunlunyia tumi kpole ne anwo, 10  mekɛ zɔhane ɔbara na bawula ɔdaye nee ye nwuanzanwuanzama ne mɔ anyunlunyia na kenle zɔhane bɛdabɛ mɔɔ bɛnyianle diedi la anye balie ɔ nwo ɔluakɛ bɛliele daselɛ ne mɔɔ yɛlile la bɛlile. 11  Ɛhye ati dahuu yɛyɛ asɔne yɛmaa bɛ kɛ yɛ Nyamenle ne ɛbu bɛ kɛ bɛfɛta ye ɛvɛlɛlɛ ne, na ɔva ye tumi ne ɔyɛ kpalɛ biala mɔɔ sɔ ɔ nye la nee diedi gyima biala ɔwie. 12  Ɛhye bamaa bɛawula yɛ Awulae Gyisɛse duma ne anyunlunyia wɔ bɛ nyunlu na bɛ nee ye ayɛ ko, kɛ mɔɔ yɛ Nyamenle ne nee Awulae Gyisɛse Kelaese ɛlolɛ ne de la.

Ɔ Bo Edwɛkɛ

Eza bɛfɛlɛ ye Saelase.
Anzɛɛ “bɛ kpundiigyinlalɛ.”
Anzɛɛ “bɛ amaneɛnwunlɛ.”