2 Kɔlentema 8:1-24

  • Ndoboa maa Dwudiya Kilisienema (1-15)

  • Bɛsoa Taetɛse wɔ Kɔlente (16-24)

8  Mediema, akee yɛkpondɛ kɛ bɛnwu ɛlolɛ mɔɔ Nyamenle ɛva ɛlo Masidonea asafo ne mɔ la.  Bɛhɔle sɔnea kpole nu wɔ anwongyelelɛ nu la, bɛ anyelielɛ molozo nee bɛ ehyia kpole ne maanle bɛ anwonyia mɔɔ vi atiakunlukɛnlɛma nu la yɛle kpole.*  Na bɛyɛle mɔɔ bɛkɛhola la, ɛhɛe, medi daselɛ kɛ, bɛyɛle bɛmaanle ɔbole zolɛ,  bɛzɛlɛle yɛ ɛsesebɛ kɛ yɛmaa bɛ adenle yɛmaa bɛye ndoboa, na bɛnyia kyɛfoa wɔ moalɛ gyima ne mɔɔ bɛlɛfa bɛaboa nwuanzanwuanzama ne la anu.  Na bɛyɛle mɔɔ ɛnee yɛ nye ɛnla la, ɔluakɛ bɛluale Nyamenle ɛhulolɛdeɛ zo bɛlimoale bɛvale bɛ nwo bɛmaanle Awulae nee yɛdayɛ noko.  Yemɔti yɛzɛlɛle Taetɛse kɛ, kɛ mɔɔ ɔbɔle gyima ɛhye abo wɔ bɛ avinli la, ɔnlea ɔmaa bɛwie ndoboa ɛhye mɔɔ ɔvi bɛ ɛhulolɛ nu la.  Noko kɛ mɔɔ bɛbɔ mɔdenle wɔ debie biala anu, diedi nee ɛdendɛlɛ nee ndelebɛbo nee mɔdenlebɔlɛ kɔsɔɔti nee ɛlɔlɛ mɔɔ yɛlɛ yɛmaa bɛ anu la, bɛye ndoboa ɛhye bɛmaa ɔbo zo.  Menga ɛhye kɛ ɔle mɛla, emomu mekulo kɛ bɛnwu mɔdenle mɔɔ awie mɔ ɛbɔ na menwu kɛzi bɛ ɛlɔlɛ ne di munli la.  Na bɛze yɛ Awulae Gyisɛse Kelaese ɛlolɛ ne, kɛ ɛnee ɔle sukoavolɛ ɛdeɛ, noko bɛdabɛ ti ɔrayɛle ehyianli amaa bɛalua ye ehyia ne azo bɛayɛ sukoavolɛma. 10  Adwenle mɔɔ melɛ ye wɔ ɛhye anwo la a le kɛ: Ɛhye le kpalɛ maa bɛ, wɔ ɛvolɛ ne mɔɔ ɛraze ɛhɔ la anu, bɛbɔle ɔ bo kɛ bɛyɛ yɛɛ bɛnyianle ɛhulolɛ kɛ bɛkɛyɛ. 11  Ɔti bɛwie mɔɔ bɛbɔle ɔ bo la, amaa ɛhulolɛ mɔɔ bɛlɛ kɛ bɛyɛ la agyinla mɔɔ bɛbahola bɛayɛ la azo. 12  Na saa ɛhulolɛ ne wɔ ɛkɛ a, mɔɔ awie lɛ la a sɔ ɛnyelɛ a, na tɛ mɔɔ ɔnlɛ la ɔ. 13  Na mengulo kɛ ɔyɛ bɛtɛɛ ɔmaa bie mɔ na ɔyɛ se ɔmaa bɛmɛ; 14  emomu amaa debie biala ayɛ sɛsɛ la, ɛnɛ mɔɔ bɛlɛ ye dɔɔnwo la, bɛboa bɛdabɛ mɔɔ bɛnlɛ bie la, amaa mekɛ mɔɔ bɛdabɛ noko bɛkɛhyia la menli mɔɔ lɛ bie dɔɔnwo la aboa bɛ. Ɔba ye zɛhae a ɛnee moalɛ ne ɛyɛ sɛsɛ. 15  Bɛhɛlɛ kɛ: “Sonla mɔɔ lɛ dɔɔnwo la annyia ye molozo, yɛɛ sonla mɔɔ lɛ ekyi la angyia.” 16  Yɛyɛ Nyamenle mo kɛ Taetɛse dwenle bɛ nwo kpalɛ kɛ yɛdayɛ la, 17  ɔluakɛ yedie mɔɔ yɛhanle yɛhilele ye la, na kɛmɔ ɔkulo kɛ ɔyɛ mɔɔ yɛhanle la ati, ɔvi ye ɛhulolɛ nu ɔlɛba bɛ nwo lɔ. 18  Na yɛlɛsoa ye nee adiema ne mɔɔ edwɛkpa ne nolobɔlɛ ti ye ayɛlɛyelɛ ɛdɛlɛ asafo ne mɔ amuala anu la. 19  Tɛ yemɔ angome, eza asafo ne mɔ yele ye kɛ ɔ nee yɛ ɛhɔ na yɛva ahyɛlɛdeɛ ɛhye yɛhɔmaa yɛva yɛwula Awulae anyunlunyia na yɛhile kɛ yɛkulo kɛ yɛboa. 20  Wɔ ndoboa ɛhye mɔɔ yɛlɛfa yɛaboa la anu, yɛngulo kɛ awie kɛnyia yɛ nwo edwɛkɛ ɛtane kɛha. 21  Ɔluakɛ ‘yɛfa nɔhalɛlilɛ yɛyɛ debie biala wɔ Gyihova* nee menli nyunlu.’ 22  Bieko, eza yɛlɛsoa yɛ diema mɔɔ yɛzɔ ye yɛnlea fane dɔɔnwo na yɛnwu kɛ ɔbɔ mɔdenle wɔ ninyɛne dɔɔnwo anu, na kɛkala ɔlɛ bɛ nu anwodozo kpole la ati ye mɔdenlebɔlɛ ɛyɛ kpole la, yeaboka bɛ nwo. 23  Na saa bɛlɛ Taetɛse anwo edwɛkɛ a, ɔle me gɔnwo* mɔɔ me nee ye yɛ gyima boa bɛ a; anzɛɛ saa bɛlɛ yɛ mediema ne mɔ anwo edwɛkɛ a, bɛle asafo ne mɔ ɛzoanvolɛma nee Kelaese anyunlunyia. 24  Yemɔti bɛla bɛ ɛlɔlɛ ne ali bɛhile bɛ, na bɛmaa asafo ne mɔ ɛnwu deɛmɔti yɛvale bɛ yɛdule yɛ nwo la.

Ɔ Bo Edwɛkɛ

Anzɛɛ “bole zolɛ.”
Nea Edwɛkɛbohilelɛ.
Giliki aneɛ nu, “ɔ nee me lɛ kyɛfoa.”