2 Kɔlentema 6:1-18

  • Bɛmmamaa Nyamenle ɛlolɛ ne yɛ mgbane (1, 2)

  • Pɔɔlo ɛzonlenlɛ gyima ne anwo edwɛkɛ (3-13)

  • Bɛ nee menli mɔɔ bɛnle diedima la mmatu (14-18)

6  Kɛ mɔɔ yɛ nee ye bɔ nu yɛ gyima la, yɛsɛlɛ bɛ noko kɛ bɛmmadie Nyamenle ɛlolɛ ne bɛmaa ye bodane ne yɛ mgbane.  Na ɔse: “Mekɛ mɔɔ fɛta la anu, mendiele wɔ, na ngoanelielɛ kenle ne, memboale wɔ.” Nea! Ɛnɛ le ɛlolɛ mekɛ. Nea! Ɛnɛ le ngoanelielɛ kenle.  Yɛndenda bɛ gyakɛ anu wɔ debie biala anu, amaa bɛanga yɛ ɛzonlenlɛ gyima ne anwo edwɛkɛ ɛtane;  na adenle biala anu yɛda yɛ nwo ali kɛ Nyamenle azonvolɛ, yɛgyinla sɔnea dɔɔnwo anu, anwongyelelɛ nu, ehyia nu, ngyegyelɛ nu,  ɛbolɛ nu, efiadelalɛ nu, basabasayɛlɛ nu, gyima ɛsesebɛyɛlɛ nu, nafelɛ ɛsololɛ nu, ɛhɔnehyelɛ nu;  anwodelɛ nu, nrɛlɛbɛ nu, abotane nu, atiakunlukɛnlɛma nu, sunsum nwuanzanwuanza nu, nɔhalɛ ɛlɔlɛ nu,  nɔhalɛ edwɛkɛ nu, Nyamenle tumi nu; ɔlua tenleneyɛlɛ akodeɛ mɔɔ wɔ yɛ sa fema* nee bɛne* nu la azo,  ɔlua anyunlunyia nee anyiemgba zo, bɛka yɛ nwo edwɛkɛ ɛtane nee kpalɛ. Bɛbu yɛ kɛ yɛbɔ adalɛ noko yɛka nɔhalɛ,  kɛ menli mɔɔ bɛnze yɛ noko bɛze yɛ, kɛ menli mɔɔ yɛlɛwu* noko nea! yɛde aze, kɛ bɛhwe yɛ nzo noko bɛtɛkunle yɛ, 10  bɛbu yɛ kɛ yɛlɛdi nyane noko yɛ nye die dahuu, kɛ menli mɔɔ yɛnlɛ bie noko yɛlɛmaa menli dɔɔnwo ayɛ sukoavolɛma, bɛbu yɛ kɛ yɛnlɛ bie noko yɛlɛ debie biala. 11  Kɔlentema, yɛha debie biala yɛhile bɛ, yɛɛ yɛbuke yɛ ahonle nu. 12  Yɛtɛsile ɛlɔlɛ mɔɔ yɛlɛ yɛmaa bɛ la anwo adenle, bɛmɛ a bɛzi ɛlɔlɛ mɔɔ bɛlɛ bɛmaa yɛ la anwo adenle a. 13  Melɛtendɛ meahile bɛ kɛ me mra—bɛdabɛ noko bɛyɛ zɔhane ala bɛmaa yɛ—bɛbuke bɛ ahonle nu.* 14  Bɛ nee menli mɔɔ bɛnle diedima la mmatu.* Na agɔnwolɛvalɛ boni a wɔ tenleneyɛlɛ nee amumuyɛyɛlɛ avinli a? Anzɛɛ kyɛfoa boni a wienyi nee awozinli lɛ a? 15  Bieko, ngitanwolilɛ boni a wɔ Kelaese nee Biliale* avinli a? Anzɛɛ kyɛfoa boni a diedinli* nee mɔɔ ɛnle diedinli la lɛ a? 16  Na koyɛlɛ boni a wɔ Nyamenle ɛzonlenlɛ sua nee awozonle avinli a? Ɔluakɛ yɛle tease Nyamenle ne ɛzonlenlɛ sua; kɛ mɔɔ Nyamenle ɛha la: “Me nee bɛ badɛnla na me nee bɛ alua, na meayɛ bɛ Nyamenle na bɛayɛ me menli.” 17  “‘Yemɔti bɛvi bɛ avinli na bɛhwe bɛ nwo,’ kɛ Gyihova* se la ɛne, ‘na bɛmmafa bɛ sa bɛka debie mɔɔ anwo ɛnde la’”; “‘na mebalie bɛ.’” 18  “‘Na mebayɛ bɛ ze, na bɛayɛ me mra mrenyia nee mraalɛ,’ kɛ Gyihova,* Tumivolɛ Bedevinli ne se la ɛne.”

Ɔ Bo Edwɛkɛ

Bie a yɛfa yɛko.
Bie a yɛfa yɛbɔ yɛ nwo bane.
Anzɛɛ “yɛfɛta ewule.”
Anzɛɛ “bɛdɛlɛ bɛ ɛlɔlɛ nu.”
Anzɛɛ “mmabɔ nu yɛ debie.”
Ɔvi Hibulu edwɛkɛkpɔkɛ mɔɔ kile “Mɔɔ Nvasoɛ Ɛnle Zo” la anu. Ɔfale Seetan anwo.
Anzɛɛ “sonla mɔɔ di nɔhalɛ la.”
Nea Edwɛkɛbohilelɛ.
Nea Edwɛkɛbohilelɛ.