2 Kɔlentema 3:1-18

  • Nganvolɛ ngɛlata (1-3)

  • Ngyekyeleɛ fofolɛ ne sonvolɛma (4-6)

  • Ngyekyeleɛ fofolɛ ne lɛ anyunlunyia kpole (7-18)

3  Yɛlɛbɔ ɔ bo yɛahanvo yɛ nwo bieko ɔ? Anzɛɛ ɔhyia kɛ yɛfa nganvolɛ ngɛlata yɛbɛlɛ bɛ anzɛɛ yɛdie bie yɛfi bɛ ɛkɛ ne, kɛ mɔɔ bie mɔ yɛ la ɔ?  Bɛdabɛ a bɛle yɛ kɛlata mɔɔ bɛhɛlɛ ye wɔ yɛ ahonle zo mɔɔ menli kɔsɔɔti ɛnwu ye na bɛkenga a.  Ɔluakɛ ɔda ali kɛ bɛle Kelaese kɛlata mɔɔ yɛhɛlɛ kɛ azonvolɛ a, tɛ ɛnke a yɛvale yɛhɛlɛle a, emomu tease Nyamenle ne sunsum a yɛvale yɛhɛlɛle a, yɛangɛlɛ ye wɔ awolɛ ndɛbandɛba zo emomu ahonle mɔɔ le kɛ awolɛ ndɛbandɛba mɔɔ bɛva nwonane bɛyɛ la azo.  Yɛlɛ anwodozo ɛhye wɔ Nyamenle anu ɔlua Kelaese anwo zo.  Yɛnga kɛ yɛdayɛ mumua ne a yɛfɛta kɛ yɛyɛ gyima ɛhye a, emomu Nyamenle a ɛmaa yɛfɛta a,  yemɔ a yemaa yɛfɛta bɔkɔɔ kɛ ngyekyeleɛ fofolɛ bie anwo sonvolɛma a, ɔnvi mɛla ne mɔɔ bɛhɛlɛ la, emomu ɔvi sunsum ne; ɔluakɛ mɛla ne mɔɔ bɛhɛlɛ la fa ewule fɔlɛbualɛ ba, na sunsum ne maa ngoane.  Na saa mɛla ne mɔɔ fa ewule ba mɔɔ bɛhɛlɛle ye wɔ awolɛ zo la vale anyunlunyia zɛhae rale na Yizilayɛma angola annea Mosisi anyunlu ɔlua anyunlunyia ne mɔɔ wɔ ɔ nyunlu, anyunlunyia mɔɔ ɛnee bapɛ nu la ati a,  ɛnee kɛ ɔkɛyɛ mɔɔ sunsum ne mɔɔ bɛfa bɛmaa la ɛnrɛnyia anyunlunyia kpole ɛnrɛdɛla ɛhye ɛ?  Na saa mɛla ne mɔɔ fa fɔlɛbualɛ ba la lɛ anyunlunyia a, ɛnee mɔɔ fa tenleneyɛlɛ ba la lɛ anyunlunyia kpole mɔɔ bo zolɛ a! 10  Nɔhalɛ nu, mɔɔ bɛwulale ye anyunlunyia bɔbɔ la, bɛye ye anyunlunyia ne, ɔlua anyunlunyia ne mɔɔ bo zo la ati. 11  Na saa mɔɔ ɛnee ɛlɛpɛ nu la rale anyunlunyia nu a, ɛnee nea kɛzi mɔɔ badɛnla ɛkɛ ne dahuu la anyunlunyia ne bayɛ kpole a! 12  Kɛmɔ yɛlɛ anyelazo ɛhye la ati, yɛtendɛ akɛnrasesebɛ zo, 13  na yɛnyɛ kɛ Mosisi wɔ mekɛ mɔɔ ɔvale debie ɔhedale ɔ nyunlu amaa Yizilayɛma annwu mɔɔ bɛbaye bɛavi ɛkɛ ne la awieleɛ la. 14  Emomu bɛ adwenle angola ande ɔ bo. Badwu ɛnɛ, bɛ adwenle ne azo ɛheda kɛ asɛɛ bɛva debie bɛheda zo la, na bɛngola bɛnde ngyekyeleɛ dɛba ne abo, Kelaese angome a bahola aye deɛ ɛhye avi ɛkɛ a. 15  Nɔhalɛ nu, badwu ɛnɛ, mekɛ biala mɔɔ bɛkɛgenga Mosisi edwɛkɛ ne la, ɛnee ɔle kɛ debie tɛkeda bɛ ahonle ne mɔ azo la. 16  Noko saa awie kakyi ba Gyihova* ɛkɛ a, ɛnee bɛye mɔɔ heda ɔ nyunlu la. 17  Na Gyihova* a le Sunsum ne a, na ɛleka mɔɔ Gyihova* sunsum ne wɔ la, fanwodi wɔ ɛkɛ. 18  Na mekɛ mɔɔ yɛ muala yɛfa yɛ nyunlu mɔɔ yɛtɛkedale la yɛda Gyihova* anyunlunyia ali kɛ neanleɛ la, bɛkakyi yɛ bɛkɔ ye ɛsaso ko ne ala anu ɔvi anyunlunyia nu ɔkɔ anyunlunyia nu, kɛ mɔɔ Gyihova* mɔɔ le Sunsum ne* yɛ ye pɛpɛɛpɛ la.

Ɔ Bo Edwɛkɛ

Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Anzɛɛ ɔkola ɔkile, “Gyihova sunsum ne.”