1 Pita 1:1-25

  • Ahyebizalɛ (1, 2)

  • Awolɛ fofolɛ kɔ dahuu anyelazo nu (3-12)

  • Bɛyɛ nwuanzanwuanza kɛ ngakula mɔɔ yɛ tieyɛ (13-25)

1  Pita, Gyisɛse Kelaese ɛzoanvolɛ, ɛlɛkɛlɛ ahɔmaa nyɛvolɛ mɔɔ ɛde ɛkponde Pɔntɛse, Galeehyea, Kapadosea, Ehyea, yɛɛ Baetenea, bɛdabɛ mɔɔ bɛkpa bɛ  kɛ mɔɔ Nyamenle Selɛ ne nwunle ye ziele wɔ sunsum nu anwodelɛ nu la, amaa bɛayɛ tieyɛ na bɛakponde Gyisɛse Kelaese mogya ne wɔ bɛ nwo: Ɛlolɛ nee anzodwolɛ molozo ɛha bɛ.  Ayɛlɛyelɛ ɛha Nyamenle, yɛ Awulae Gyisɛse Kelaese ɔ Ze ne, ɔluakɛ ye anwunvɔnezelɛ kpole ne ati, yedwazo Gyisɛse Kelaese yevi mowuamra anu na ɔlua zo yemaa bɛwo yɛ fofolɛ na yɛnyia anyelazo mɔɔ wɔ ɛkɛ ne dahuu la,  amaa yɛanyia agyapadeɛ mɔɔ ɛmkpɔlɔ na evinli ɛnle nwo yɛɛ ɔmkpa la. Bɛva bɛzie anwuma lɔ bɛmaa bɛmɛ,  mɔɔ Nyamenle tumi ne dua diedi zo bɔ bɛ nwo bane maa ngoanelielɛ mɔɔ bɛbala ye ali wɔ mekɛ ne mɔɔ li awieleɛ la.  Ɛhye ati bɛlɛdi fɛlɛko kpole ɛdeɛ, noko kɛkala ɔhyia kɛ sɔnea ngakyile maa bɛ rɛle bɔ mekɛ ekyi,  amaa bɛ diedi ne mɔɔ bɛzɔ bɛnlea na ɔsonle bolɛ kpole ɔtɛla nvutuke mɔɔ bɛva senle bɛzɔ bɛnlea* noko ɔsɛkye la, ava ayɛlɛyelɛ, anyunlunyia nee enililɛ arɛlɛ bɛ wɔ mekɛ mɔɔ bɛbala Gyisɛse Kelaese ali la.  Bɛannwu ye ɛlɛ noko bɛkulo ye. Kɛkala bɛnnwu ye noko bɛdie ye bɛdi na bɛfa anyelielɛ mɔɔ bɛngola ye ka mɔɔ anyunlunyia wɔ nu la bɛdi fɛlɛko kpole,  wɔ mekɛ mɔɔ bɛ sa ɛha bɛ diedi nwo bodane ne mɔɔ le bɛ ngoanelielɛ la.* 10  Wɔ ngoanelielɛ ɛhye anwo, ngapezoma mɔɔ hanle ɛlolɛ ne mɔɔ le bɛ ɛdeɛ la anwo edwɛkɛ dole ɛkɛ la bɔle mɔdenle yɛle nvedenvedenu nee neɛnleanu kpalɛ. 11  Bɛhɔle zo bɛnleɛnleanle nu kɛ bɛkɛnwu mekɛ anzɛɛ ɛlobɔ holɛ ko mɔɔ sunsum ne mɔɔ wɔ bɛ nu la ɛlɛkile wɔ Kelaese anwo wɔ mekɛ mɔɔ ɔlile amaneɛ mɔɔ Kelaese banwu ye nee anyunlunyia mɔɔ bali ɔ nzi ara la anwo daselɛ la. 12  Bɛyele bɛhilele bɛ kɛ ninyɛne ɛhye mɔ ɛnle bɛ ɛdeɛ, emomu bɛmɛ mɔɔ bɛha ninyɛne ɛhye mɔ bɛhile bɛ la a bɛlɛfa bɛazonle bɛ a, ɔlua menli mɔɔ luale sunsum nwuanzanwuanza ne mɔɔ bɛzoanle ye bɛvile anwuma la moalɛ zo bɔle edwɛkpa ne nolo hilele bɛ la anwo azo. Ninyɛne ɛhye mɔ a anwumabɔvolɛma anye ɛbolo kɛ bɛkɛde ɔ bo a. 13  Ɔti bɛziezie bɛ adwenle bɛmaa gyima kpole; bɛmaa bɛ nye ɛla ɛkɛ; bɛva bɛ nye bɛdo ɛlolɛ ne mɔɔ bɛ sa baha ye wɔ mekɛ mɔɔ bɛbala Gyisɛse Kelaese ali la azo. 14  Bɛle ngakula mɔɔ bɛyɛ tieyɛ, bɛmmadi atiakunluwɔzo mɔɔ ɛnee bɛlɛ ye wɔ mekɛ mɔɔ ɛnee bɛnze ɛhwee la anzi, 15  na kɛ mɔɔ Nwuanzanwuanzanli ne mɔɔ vɛlɛle bɛ la de la, bɛdabɛ noko bɛyɛ nwuanzanwuanza wɔ bɛ nyɛleɛ muala anu, 16  ɔluakɛ bɛhɛlɛ kɛ: “Bɛyɛ nwuanzanwuanza, ɔluakɛ mele nwuanzanwuanza.” 17  Na saa bɛlɛfɛlɛ Selɛ ne mɔɔ ɔnnea sonla nyunlu na ɔbua ndɛne kɛ mɔɔ awie biala gyima de la a, bɛva ɛzulolɛ bɛbɔ bɛ ɛbɛla wɔ mekɛ mɔɔ bɛle nyɛvolɛ la. 18  Na bɛze kɛ tɛ ninyɛne mɔɔ sɛkye, mɔɔ le kɛ dwɛtɛ fufule anzɛɛ nvutuke la a bɛvale bɛliele* bɛ bɛvile bɛ ɛbɛlabɔlɛ mgbane ne mɔɔ bɛ nlenyia mɔ vale gyakyile bɛ la anu a. 19  Emomu, ɔlua mogya mɔɔ sonle bolɛ kɛ boaneralɛ mɔɔ dɛne nee ngehanleɛ ɛnle ɔ nwo, Kelaese ɛdeɛ ne la azo. 20  Nɔhalɛ nu, ɛnee bɛze ye kolaa na bɛabɔ ewiade, noko bɛdabɛ ti bɛlale ye ali wɔ mekɛ ne awieleɛ. 21  Ɔlua ɔ nwo zo bɛlie Nyamenle mɔɔ dwazole ye vile mowuamra anu na ɔwulale ye anyunlunyia la bɛli, amaa bɛ diedi nee bɛ anyelazo adɛnla Nyamenle anu. 22  Kɛkala mɔɔ bɛdie nɔhalɛ ne na ɔlua zo bɛde bɛ nwo* na bɛnyia nɔhalɛ mediema ɛlɔlɛ la, bɛvi ahonle nu bɛhulo bɛ nwo ngoko kpalɛ. 23  Ɔluakɛ bɛwo bɛ fofolɛ, tɛ ma mɔɔ kpɔlɔ la anu, emomu ma mɔɔ ɛmkpɔlɔ* la anu, ɔlua tease Nyamenle ne mɔɔ ɔwɔ ɛkɛ ne dahuu la edwɛkɛ zo. 24  Na “menli kɔsɔɔti le kɛ ndile, yɛɛ bɛ anyunlunyia le kɛ ɛbɔ nu felawɔse; ndile ne nwoso na felawɔse ne kpolo, 25  noko Gyihova* edwɛkɛ ne wɔ ɛkɛ ne dahuu.” Na “edwɛkɛ” ɛhye a le edwɛkpa ne mɔɔ bɛbɔ ye nolo bɛhile bɛ la.

Ɔ Bo Edwɛkɛ

Anzɛɛ “bɛdu nuhua evinli.”
Anzɛɛ “bɛ ɛkɛla ngoanelielɛ la.”
Giliki aneɛ nu, “bɛkpɔnenle.”
Anzɛɛ “bɛ ɛkɛla nwo.”
Ɛhye kile, ma mɔɔ kola fifi, anzɛɛ kola so.
Nea Edwɛkɛbohilelɛ.