1 Kɔlentema 11:1-34

  • “Bɛzukoa me” (1)

  • Tileyɛlɛ nee bɛ ti zo ɛhedalɛ (2-16)

  • Awulae Nɔsolɛ Aleɛlilɛ ne (17-34)

11  Bɛzukoa me, kɛ mɔɔ medame noko mesukoa Kelaese la.  Mekanvo bɛ ɔluakɛ wɔ ninyɛne kɔsɔɔti anu bɛkakye me yɛɛ bɛdi ngilehilelɛ ne mɔ azo pɛpɛɛpɛ kɛ mɔɔ menvale memaanle bɛ la.  Noko, mekulo kɛ bɛnwu ye kɛ nrenyia biala ati a le Kelaese; raalɛ noko ati a le nrenyia; yɛɛ Kelaese noko ati a le Nyamenle.  Nrenyia biala mɔɔ ɛlɛyɛ asɔne anzɛɛ ɛlɛka ngapezo mɔɔ ɔkɛheda ɔ ti zo la gua ɔ ti ne* anyunlu aze;  na raalɛ biala mɔɔ ɛlɛyɛ asɔne anzɛɛ ɛlɛka ngapezo mɔɔ yeangeda ɔ ti zo la gua ɔ ti ne* anyunlu aze, ɔluakɛ ɔle kɛ raalɛ mɔɔ yekpa ɔ ti ala la.  Na saa raalɛ angeda ɔ ti zo a, ɛnee ɔwɔ kɛ ɔpepɛ ye enrinli ne; na saa ɔle anyiemgba ɔmaa raalɛ kɛ ɔkɛpepɛ ye enrinli anzɛɛ ɔkɛkpa ɔ ti a, ɛnee noko ɔwɔ kɛ ɔkeda zo.  Na ɔnle kɛ nrenyia keda ɔ ti zo ɔluakɛ ɔle Nyamenle ɛsaso nee ye anyunlunyia, noko raalɛ le nrenyia anyunlunyia.  Ɔluakɛ nrenyia ɛnvi raalɛ nu a rale a, emomu raalɛ a vi nrenyia nu rale a.  Eza tɛ raalɛ ti a bɛbɔle nrenyia a, emomu nrenyia ti a bɛbɔle raalɛ a. 10  Ɛhye ati a ɔwɔ kɛ raalɛ nyia tumi nwo sɛkɛlɛneɛ wɔ ɔ ti zo la, ɔlua anwumabɔvolɛ ne mɔ ati. 11  Noko akee, wɔ Awulae anu, nrenyia ɛngɔ ɛngyakyi raalɛ, yɛɛ raalɛ ɛngɔ ɛngyakyi nrenyia. 12  Na kɛ mɔɔ raalɛ vi nrenyia nu la, zɔhane ala noko a nrenyia dua raalɛ nwo zo ba a; noko ninyɛne ne amuala vi Nyamenle. 13  Bɛdabɛ bɛbua: Asoo ɔle kpalɛ kɛ raalɛ kɛzɛlɛ Nyamenle wɔ mekɛ mɔɔ ɔtɛkedale ɔ ti zo la ɔ? 14  Asoo kɛzi bɛbɔle sonla la ɛngile kɛ enrinli ndendenle gua nrenyia nyunlu aze, 15  na saa raalɛ lɛ enrinli ndendenle a, ɔwula ye anyunlunyia ɔ? Ɔluakɛ bɛva ye enrinli ne bɛmaa ye kɛ ɔva ɔheda ɔ ti zo. 16  Noko saa awie kulo kɛ ɔsu ɛhye anwo kpolera a, yɛdayɛ anzɛɛ Nyamenle asafo ne mɔ ɛnlɛ debie gyɛne bieko kɛ ɛhye ala. 17  Noko mekɛ mɔɔ melɛfa adehilelɛ ɛhye mɔ meamaa bɛ la menrɛhanvo bɛ, ɔluakɛ bɛ nyianu ne mɔ ɛmboa bɛ, emomu ɔmaa bɛdi nyane. 18  Mɔɔ limoa bɔkɔɔ la, mede kɛ saa bɛyia nu kɛ asafo a mgbakyemgbakyenu wɔ bɛ avinli; na medie ɛhye foa ko bie medi. 19  Kɛ ɔkɛyɛ biala la ɔwɔ kɛ eku ngakyile ba bɛ avinli, amaa bɛdabɛ mɔɔ Nyamenle die bɛ to nu la ala ali kpalɛ. 20  Saa bɛyia nu wɔ ɛleka ko a, bɛngola bɛnli Awulae Nɔsolɛ Aleɛ ne kpalɛ. 21  Ɔluakɛ saa mekɛ dwu kɛ bɛlɛdi a, bɛ nuhua biala dimoa di ye nɔsolɛ aleɛ, yemɔti mɔɔ ɛhɔne ɛlɛku bie la ɛnee bie noko ɛbo. 22  Bɛnlɛ azua mɔɔ bɛdi na bɛno wɔ nu ɔ? Anzɛɛ bɛmbu Nyamenle asafo ne na bɛmaa bɛdabɛ mɔɔ bɛnlɛ bie la anyunlu gua aze ɔ? Duzu edwɛkɛ a menga mengile bɛ a? Menganvo bɛ ɔ? Menrɛhanvo bɛ wɔ ɛhye anwo. 23  Mɔɔ menyianle ye menvile Awulae ɛkɛ ne la, yemɔ ala a medame noko meva memaa bɛ a, kɛ Awulae Gyisɛse, nɔe ne mɔɔ bɛbaye ye bɛamaa la ɔvale paano, 24  na mɔɔ ɔlale ase ɔwiele la, ɔbubule nu na ɔhanle kɛ: “Ɛhye gyi ɛkɛ ne maa me sonlabaka ne mɔɔ bɛdabɛ ti bɛbava bɛamaa la. Bɛhɔ zo bɛyɛ ɛhye bɛva bɛhakye me.” 25  Zɔhane ala a ɔyɛle kanrɛlɛ ne wɔ mekɛ mɔɔ bɛlile nɔsolɛ aleɛ ne bɛwiele la a, na ɔhanle kɛ: “Kanrɛlɛ ɛhye gyi ɛkɛ ne maa ngyekyeleɛ fofolɛ ne mɔɔ bɛbalua me mogya ne azo bɛayɛ la. Mekɛ biala mɔɔ bɛkɛnlo nu la, bɛyɛ ye zɔhane bɛva bɛhakye me.” 26  Na mekɛ biala mɔɔ bɛkɛli paano ɛhye na bɛkɛnlo kanrɛlɛ ɛhye anu la, ɛnee bɛlɛbɔ Awulae ewule ne nolo kɔkpula kɛ ɔkɛra. 27  Zɔhane ati awie biala mɔɔ kɛli paano ne anzɛɛ kɛnlo Awulae kanrɛlɛ ne anu wɔ adenle mɔɔ ɛnfɛta la anu la kɛli Awulae sonlabaka ne nee ye mogya ne anwo fɔlɛ. 28  Mɔɔ limoa la, maa ahenle ɛnleɛnlea ɔ nwo nu ɔva ɔzɔ ɔ nwo ɔnlea kolaa na yeali paano ne na yeanlo kanrɛlɛ ne anu. 29  Ɔluakɛ awie biala mɔɔ di na ɔno na ɔnze mɔɔ sonlabaka ne kile la, di no fa ndɛnebualɛ ba ɔ nwo zo. 30  Ɛhye ati a bɛ nuhua dɔɔnwo ɛyɛ bɛtɛɛ na bɛ nwo ɛtoto bɛ, na bie mɔ ɛwu* la. 31  Na saa yɛkola yɛnwu kɛzi yɛdayɛ mumua ne yɛde la a, bɛnrɛbua yɛ ndɛne. 32  Noko saa bɛbua yɛ ndɛne a, ɛnee Gyihova* ɛhwe yɛ nzo amaa bɛambua yɛ fɔlɛ bɛamboka ewiade ne anwo. 33  Zɔhane ati, me mediema, saa bɛyia nu kɛ bɛdi a, anrɛɛ bɛhendɛ bɛ nwo. 34  Saa ɛhɔne ɛlɛku awie a, ɔli debie wɔ sua nu amaa bɛyia nu a bɛannyia ndɛnebualɛ. Na edwɛkɛ mɔɔ ɛha la ɛdeɛ, meba lɔ a, mebanlea meali.

Ɔ Bo Edwɛkɛ

Anzɛɛ “Kelaese.”
Anzɛɛ “ɔ hu.”
Ɔda ali kɛ ɛhye kile sunum nu ewule.
Nea Edwɛkɛbohilelɛ.