1 Kɔlentema 10:1-33

  • Yizilayɛ tetedwɛkɛ le kɔkɔbɔlɛ (1-13)

  • Awozonlezonlenlɛ nwo kɔkɔbɔlɛ (14-22)

    • Gyihova ɛkponle, sunsum ɛtane ɛkponle (21)

  • Fanwodi nee awie mɔ anwo ɛzuzulɛ (23-33)

    • “Bɛyɛ ɔ muala bɛwula Nyamenle anyunlunyia” (31)

10  Mediema, akee mekulo kɛ bɛnwu kɛ yɛ nlenyia mɔ kɔsɔɔti luale amungu ne abo yɛɛ bɛluale nyevile ne anu  na bɛzɔnenle bɛ muala kɛ Mosisi ɛdoavolɛma wɔ amungu ne nee nyevile ne anu,  na bɛ muala bɛlile sunsum nu aleɛ ko ne ala  na bɛ muala bɛnlonle sunsum nu nzule ko ne ala. Ɔluakɛ bɛnlonle ye wɔ sunsum nu bodane ne mɔɔ lile bɛ nzi la anu, ɛnee zɔhane bodane ne a le Kelaese.  Noko Nyamenle anye anlie bɛ nuhua dɔɔnwo anwo, na bɛtotɔle fienemgbole ne anu.  Ninyɛne ɛhye mɔ yɛle neazo maanle yɛ, amaa yɛ ti akunlu amba ninyɛndane ɛyɛlɛ zo, kɛ mɔɔ bɛ bie mɔ yɛle la.  Bɛmmasonle awozonle kɛ mɔɔ bɛ nuhua bie mɔ yɛle la; bɛhɛlɛ kɛ: “Menli ne dɛnlanle aze lile na bɛnlonle. Na bɛdwazole bɛliele bɛ nye.”  Bɛmmamaa yɛbɔ adwɔmane ɛbɛla* kɛ mɔɔ bɛ bie mɔ bɔle adwɔmane ɛbɛla,* na bɛ nuhua 23,000 wule kenle ko la.  Bɛmmamaa yɛsɔ Gyihova* yɛnea kɛ mɔɔ bɛ bie mɔ zɔle ye nleanle na nwɔlɛ kekale bɛ hunle bɛ la. 10  Eza bɛmmatendɛ bɛ nzo abo, kɛ mɔɔ bɛ bie mɔ dendɛle bɛ nzo abo na sɛkyevolɛ ne zɛkyele bɛ la. 11  Ninyɛne ɛhye mɔ dole bɛ kɛ neazo, na bɛhɛlɛ kɛ bɛfa bɛabɔ yɛdayɛ mɔɔ yɛwɔ ewiade ɛhye awieleɛ mekɛ ne anu la kɔkɔ. 12  Ɔti mɔɔ dwenle kɛ ɔgyi ɛkɛ la ɛnlea boɛ na yeandɔ aze. 13  Sɔnea biala ɛtɛtole bɛ kyesɛ mɔɔ to awie biala la ala. Noko Nyamenle le nɔhavo, na ɔnrɛmaa bɛnrɛzɔ bɛ bɛnrɛnlea bɛnrɛdɛla mɔɔ bɛkɛhola la, na saa sɔnea ba a, ɔbamaa adenle ala nwolɛ amaa bɛahola bɛagyinla ɔ nloa. 14  Ɛhye ati, me kulovolɛma, bɛnriandi awozonle ɛzonlenlɛ. 15  Melɛtendɛ meahile bɛ kɛ bɛle nrɛlɛbɛvolɛma; bɛdabɛ bɛbua mɔɔ melɛka la anwo ndɛne. 16  Nyilalɛ kanrɛlɛ ne mɔɔ yɛyila zolɛ la, yɛnnyia Kelaese mogya ne azo nvasoɛ ɔ? Paano ne mɔɔ yɛbubu nu la, yɛnnyia Kelaese sonlabaka ne azo nvasoɛ ɔ? 17  Kɛmɔ paano ne mɔɔ yɛbubu la le ko la ati, saa yɛle dɔɔnwo bɔbɔ a yɛle sonlabaka ko, ɔluakɛ yɛ muala yɛdi paano ko ne ala. 18  Bɛnlea nwonane afoa nu Yizilayɛma: Bɛdabɛ mɔɔ bɛdi afɔlebɔlɛ ne bie la ɛnlɛ kyɛfoa wɔ afɔlemokyea ne anu ɔ? 19  Ɛnee duzu a mekpondɛ meaha a? Mɔɔ bɛva bɛbɔ afɔle bɛmaa bozonle la le debie, anzɛɛ bozonle le debie ɔ? 20  Kyɛkyɛ; mɔɔ melɛka la a le kɛ, mɔɔ maanle maanle ne fa bɔ afɔle la, bɛfa bɛbɔ afɔle bɛmaa sunsum ɛtane; bɛmbɔ bɛmmaa Nyamenle, na memkpondɛ kɛ bɛ nee sunsum ɛtane nyia debie yɛ. 21  Bɛnrɛhola bɛnrɛnlo Gyihova* kanrɛlɛ nu na bɛanlo sunsum ɛtane kanrɛlɛ nu; bɛnrɛhola bɛnrɛli aleɛ wɔ “Gyihova* ɛkponle zo” na eza bɛali aleɛ wɔ sunsum ɛtane ɛkponle zo. 22  Anzɛɛ ‘yɛkulo kɛ yɛka Gyihova* ɛya ɔ’? Asoo yɛ nwo yɛ se tɛla ye ɔ? 23  Debie biala anwo adenle wɔ ɛkɛ, noko tɛ ɔ muala a nvasoɛ wɔ zo a. Debie biala anwo adenle wɔ ɛkɛ, noko tɛ ɔ muala a maa ngɔzo a. 24  Awie biala mmakpondɛ ɔ ngome ye boɛyɛlɛ, ɔkpondɛ awie mɔ ɛdeɛ noko. 25  Bɛli nane biala mɔɔ bɛtɔne ye wɔ gua nu la, bɛ adwenle ne ati, bɛmmabizebiza nwolɛ edwɛkɛ, 26  ɔluakɛ “azɛlɛ ye nee nuhua debie biala le Gyihova* ɛdeɛ.” 27  Saa awie mɔɔ ɛnle diedinli la to ɛsalɛ fɛlɛ bɛ na bɛkulo kɛ bɛkɔ a, bɛli debie biala mɔɔ ɔkɛva ɔkɛzie bɛ nyunlu la, bɛ adwenle ne ati, bɛmmabizebiza nwolɛ edwɛkɛ. 28  Noko saa awie ka kile bɛ kɛ, “Ɛhye le debie mɔɔ bɛva bɛbɔ afɔle a,” bɛmmadi amaa yeangyegye awie biala adwenle. 29  Tɛ wɔ adwenle ɛdeɛ ne a melɛka a, emomu ahenle ɛdeɛ ne. Na kɛmɔti a ɔwɔ kɛ awie adwenle bua fanwodi mɔɔ melɛ la anwo ndɛne ɛ? 30  Saa medi debie na meda ase wɔ nwolɛ a, kɛmɔti a ɔwɔ kɛ bɛtendɛ bɛtia aleɛ mɔɔ medi a meda ase wɔ nwolɛ la ɛ? 31  Yemɔti, saa bɛlɛdi o, bɛlɛno o, anzɛɛ bɛlɛyɛ debie gyɛne biala o, bɛyɛ ɔ muala bɛwula Nyamenle anyunlunyia. 32  Bɛmmayɛ debie biala bɛtenda Dwuuma nee Gilikima yɛɛ Nyamenle asafo ne agyakɛ anu, 33  kɛ mɔɔ melɛbɔ mɔdenle meazɔ menli kɔsɔɔti anye wɔ debie biala anu la, memkpondɛ me ngome me kpalɛyɛlɛ, emomu menli dɔɔnwo ɛdeɛ, amaa bɛalie bɛ ngoane.

Ɔ Bo Edwɛkɛ

Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.