Ɛfɛsɛsema 6:1-24

  • Ngakula nee awovolɛ folɛdulɛ (1-4)

  • Ngɛkɛlɛ nee menlenlɛma folɛdulɛ (5-9)

  • Nyamenle konle tɛladeɛ ne amuala (10-20)

  • Ahyebizalɛ mɔɔ li awieleɛ (21-24)

6  Ngakula, bɛdie bɛ awovolɛ wɔ Awulae anu, ɔluakɛ ɛhye a le kpalɛ a.  “Di wɔ papa nee wɔ mame eni” a le mɛla mɔɔ limoa mɔɔ ɛwɔkɛ wɔ nwo a:  “Na yeawie wɔ boɛ* na wɔahyɛ azɛlɛ ye azo.”  Selɛma, bɛmmaka bɛ mra ɛya, emomu bɛhɔ zo bɛva Gyihova* folɛdulɛ* nee ye ngilehilelɛ bɛtete bɛ.  Ngɛkɛlɛ, bɛvi bɛ ahonle nu bɛva ɛzulolɛ nee anwowozolɛ bɛdie bɛ menle mɔ mɔɔ bɛwɔ azɛlɛ ye azo la kɛ asɛɛ bɛlɛyɛ bɛamaa Kelaese la,  tɛ mekɛ mɔɔ menli ɛlɛnea bɛ la angome, kɛ bɛyɛ bɛazɔ menli nye ala,* emomu kɛ Kelaese ngɛkɛlɛ mɔɔ bɛfi ɛkɛla* muala anu bɛyɛ Nyamenle ɛhulolɛdeɛ la.  Bɛva adwenle kpalɛ bɛzonle, kɛ asɛɛ bɛyɛ bɛamaa Gyihova* na tɛ menli ɔ,  ɔluakɛ bɛze kɛ debie kpalɛ biala mɔɔ awie bayɛ la, saa akɛlɛ o, saa dehelɛ o, ɔbanyia nwolɛ ahatualɛ yeavi Gyihova* ɛkɛ.  Bieko, bɛmɛ menlenlɛma noko, bɛhɔ zo bɛyɛ zɔhane ala bɛmaa bɛ, bɛmmanwunlonwunla bɛ, ɔluakɛ bɛze kɛ bɛ nee bɛ ngɛkɛlɛ ne mɔ amuala bɛ Menle wɔ anwuma, na ɔnnea sonla nyunlu. 10  Mɔɔ li awieleɛ la, bɛhɔ zo bɛmaa bɛ nwo ɛyɛ se wɔ Awulae nee ye anwosesebɛ kpole ne anu. 11  Bɛwula Nyamenle konle tɛladeɛ ne mɔ amuala na bɛahola bɛagyinla kpundii bɛaho bɛatia Abɔnsam agyiba ne mɔ;* 12  ɔluakɛ tɛ nwonane nee mogya a yɛ nee bɛ ɛlɛko a, emomu yɛ nee arane ngakyile, tumililɛ, ewiade ɛhye awozinli nu tumivolɛma, nee sunsum ɛtane ɛlɔne mɔɔ bɛwɔ anwuma lɔ la a ɛlɛko a. 13  Zɔhane ati, bɛwula Nyamenle konle tɛladeɛ ne amuala, amaa bɛahola bɛaho wɔ kenle ɛtane ne, na saa bɛyɛ debie biala bɛwie a, bɛagyinla bɛ gyakɛ anu kpundii. 14  Yemɔti bɛgyinla kpundii, bɛva nɔhalɛ ne bɛyɛ bɛlɛte bɛhye bɛ nze, bɛwula tenleneyɛlɛ akɛnrazo enyinlike ne, 15  na bɛwula mgbɔlaboa bɛva bɛziezie bɛ nwo bɛbɔ anzodwolɛ edwɛkpa ne nolo. 16  Ɛhye mɔ amuala anzi, bɛva diedi enyinlike kpole ne mɔɔ bɛbava bɛanlua amumuyɛnli ne ɛda ne mɔ mɔɔ ɛlɛsɔ la amuala la. 17  Eza bɛlie ngoanelielɛ bulalɛ kyɛlɛ ne nee sunsum ne konle dadeɛ ne mɔɔ le Nyamenle edwɛkɛ ne la, 18  na bɛva asɔneyɛlɛ nee modolɛ muala bɛyɛ asɔne mekɛ biala wɔ sunsum nu. Zɔhane ati bɛyɛ bɛ nye gyɛlɛmgbɛɛnye, na bɛzɛlɛ ɛsesebɛ dahuu bɛmaa nwuanzanwuanzama ne mɔ. 19  Bɛyɛ asɔne bɛmaa medame noko, amaa saa mebuke me nloa kɛ metendɛ a meanyia edwɛkɛ meaha, na meava akɛnrasesebɛ meabɔ edwɛkpa ne mɔɔ fale fealeranu edwɛkɛ nwuanzanwuanza ne anwo la nolo, 20  yemɔ a mele nwolɛ agyakɛnugyinlavolɛ mɔɔ bɛgua me kyeenyi la, amaa saa ɔwɔ kɛ metendɛ a, meava akɛnrasesebɛ meaha ye kɛ mɔɔ ɔfɛta la. 21  Tekekɛse mɔɔ le adiema kulovolɛ nee Awulae sonvolɛ mɔɔ di nɔhalɛ la bamaa bɛanwu mɔɔ melɛyɛ nee kɛzi me nwo de la. 22  Melɛsoa ye bɛ nwo lɔ wɔ ɛhye ati, amaa bɛanwu kɛzi yɛ nwo de la na yeamaa bɛ ahonle adɔ bɛ azule nu. 23  Mediema, Nyamenle Selɛ ne nee Awulae Gyisɛse Kelaese ɛmaa bɛ anzodwolɛ nee ɛlɔlɛ nee diedi. 24  Ɛlolɛ ɛha bɛdabɛ mɔɔ yɛ Awulae Gyisɛse Kelaese anwo ɛlɔlɛ mɔɔ bɛlɛ la ɛnzɛkye ɛlɛ la amuala.

Ɔ Bo Edwɛkɛ

Anzɛɛ “amaa wɔayɛ kpalɛ.”
Nea Edwɛkɛbohilelɛ.
Anzɛɛ “adehilelɛ.”
Giliki aneɛ nu, “tɛ ɛnyelɛ zo ɛzonlenlɛ.”
Nea Edwɛkɛbohilelɛ, “Ɛkɛla.”
Nea Edwɛkɛbohilelɛ.
Nea Edwɛkɛbohilelɛ.
Anzɛɛ “ye mɛlɛbɛla ne mɔ.”