Wulu kɔ nuhua edwɛkɛ ne azo

wulu kɔ menu ngyikyi ne azo

Gyihova Alasevolɛ

Nzema

Esiane Si A, Ɛlɔlɛ Maa Yɛboa

Esiane Si A, Ɛlɔlɛ Maa Yɛboa

Saa Gyihova Alasevolɛ nwu kɛ bɛ mediema diedima nee awie mɔ hyia debie a bɛboa bɛ. Bɛyɛ zɔ bɛfa bɛda ɛlɔlɛ, nɔhalɛ Keleseɛnema nzonlɛ ne ali.Dwɔn 13:35.

Edwɛkɛ mɔɔ doa zo la le moalɛ mɔɔ bɛvale bɛmanle wɔ siane 12 anu ɔradwule ɛvolɛ 2012 ne avinli la anu ekyi. Sunsum nu nee nganeɛdelɛ nu moalɛ ɛmboka nwo. Esiane Nwo Moalɛ Kɔmatii mɔɔ yɛ ɔfese ne mɔ kɛde la di ɛhye mɔ anwo gyima. Asafo mɔɔ bɛbikye ɛleka mɔɔ esiane ne kɛzi la noko boa.

Japan

Japan: Wɔ March 11, 2011, azɛlɛkpusulɛ bie mɔɔ manle nyevile dule rale sua zo na ɔzɛkyele menli dɔɔnwo ninyɛne la zile Japan sɔlɔ. Gyihova Alasevolɛ mɔɔ bɛwɔ ewiade amuala la vale ezukoa, bɛ nrɛlɛbɛ, nee ninyɛne hɔboale.

Brazil: Azuyilɛ nee azɛlɛ mɔɔ bu gua nu la manle menli dɔɔnwo wule. Yemɔti, Gyihova Alasevolɛ vale aleɛ tone 42, nzule adoba 20,000, adɛladeɛ tone 10, ninyɛne mɔɔ bɛfa bɛsiezie sua nu tone 5, nee nyile yɛɛ ninyɛne ngakyile hɔmanle bɛ.

Congo (Brazzaville): Mekɛ mɔɔ konle ninyɛne bie mɔɔ bɛva bɛziele la dele la, ɔbubule Gyihova Alasevolɛ 4 azua bɔkɔɔ yɛɛ ɔzɛkyele Alasevolɛ 28 azua. Bɛvale aleɛ nee adɛladeɛ bɛhɔmanle bɛ, na Alasevolɛ mɔɔ wɔ ɛkɛ la vale mbusua mɔɔ esiane ne dole bɛ la hɔle bɛ azua nu.

Congo (Kinshasa): Bɛhɔmanle bɛdabɛ mɔɔ ɛnee bɛ kunlu ɛlɛtu la ayile. Bɛvale adɛladeɛ bɛhɔmanle bɛdabɛ mɔɔ azuyilɛ vale bɛ ninyɛne la. Bɛvale nyile, ma mɔɔ bɛdua, nee adɛladeɛ tone dɔɔnwo bɛhɔmanle bɛdabɛ mɔɔ ɛnee bɛwɔ nriandivolɛma azokoɛleɛ ne la.

Venezuela: Ezule tɔ kpole ɔkakyi azuyilɛ, yɛɛ ɔmaa azɛlɛ bu kɔ nu. Esiane mekɛ nu moalɛ kɔmatiima boale Alasevolɛ 288. Bɛzile azua mɔɔ bo 50. Eza moalɛ kɔmatiima ɛlɛboa bɛdabɛ mɔɔ bɛ azua bikye Valencia Tandane ne mɔɔ ɔbahola yeayi yeava bɛ la.

Philippines

Philippines: Ahumuakyima manle azule yile maanle ne foa bie. Ɔfese ne vale aleɛ nee adɛladeɛ hɔmanle bɛ na Alasevolɛ mɔɔ bɛbikye ɛkɛ la boale manle bɛzieziele bɛ awuke ne mɔ anu wɔ mekɛ mɔɔ nzule ne sesanle la.

Canada: Mekɛ mɔɔ senle kpole bie dɔle ɛhoayelɛ nu wɔ Alberta la, Alasevolɛ mɔɔ bɛwɔ maanzinli ne anu la vale ninyɛne dɔɔnwo hɔmanle Slave Lake Asafo ne kɛ bɛva bɛboa. Ɛnee bɛngyia ezukoa ne amuala anwo yemɔti asafo ne vale mɔɔ bo foa ko la hɔboale ɛleka gyɛne mɔɔ esiane zile la.

Côte d’Ivoire: Bɛvale ninyɛne, nee nyile bɛhɔboale kolaa na konle ne azi, wɔ konle ne anu, yɛɛ konle ne anzi. Bɛmanle bie mɔ noko dabelɛ.

Fiji: Azuyilɛ zɛkyele Alasevolɛ mbusua 192 egyinli, ɛleka mɔɔ bɛnyia aleɛ nee ezukoa bɛfi la. Bɛvale aleɛ bɛhɔmanle bɛ.

Ghana: Bɛhɔmanle bɛdabɛ mɔɔ azuyilɛ zɛkyele bɛ ninyɛne wɔ aduduleɛ maanzinli ne anu la aleɛ, ma mɔɔ bɛbalua, na bɛyɛle bɛ azua boɛ.

United States: Ahumu bie zɛkyele Alasevolɛ 66 azua wɔ maanzinli nsa anu, na ɔbubule Alasevolɛ 12 azua. Ɔnva nwo kɛ ɛnee bɛbadua esiane mekɛ nu ezukoa bɛamaa suamenlema dɔɔnwo la, mediema manle bɛ ezukoa.

Argentina: Gyihova Alasevolɛ boale bɛdabɛ mɔɔ ɛnee bɛwɔ maanle ne nyiakɛ mɔɔ boka bie kpukele zɛkyele bɛ awuke la.

Mozambique: Bɛvale aleɛ bɛhɔmanle menli mɔɔ bo 1,000 mɔɔ ezule andɔ bɛ ɛkɛ la.

Nigeria: Bɛvale ezukoa bɛhɔboale Alasevolɛ 24 mɔɔ bɛbodale wɔ kale esiane nu la. Eza bɛhɔboale bɛdabɛ mɔɔ bɛzɛkyele bɛ azua wɔ konle nu wɔ manle ne sɔlɔ la.

Benin: Bɛvale nyile, adɛladeɛ, habutu, nzukpa, nee dabelɛ bɛmanle menli mɔɔ azuyilɛ vale bɛ ninyɛne la.

Dominican Republic

Dominican Republic: Mekɛ mɔɔ Ahumuakyima Irene ne zile la, asafo mɔɔ bɛbikye ɛkɛ la yɛle bɛ azua ne mɔ boɛ yɛɛ bɛmanle bɛ ninyɛne.

Ethiopia: Bɛvale ezukoa bɛhɔboale ɛleka nwiɔ mɔɔ ezule andɔ nee ɛleka ko mɔɔ azule yile la.

Kenya: Bɛvale ezukoa bɛhɔboale ɛleka mɔɔ ezule andɔ la.

Malawi: Bɛhɔboale bɛdabɛ mɔɔ ɛnee bɛwɔ Dzaleka nriandivolɛma azokoɛleɛ ne la.

Nepal: Azɛlɛ mɔɔ bu gua nu la zɛkyele Dasevolɛ bie sua. Bɛzile mekɛ ekyi nu sua bɛmanle ye yɛɛ asafo mɔɔ wɔ ɛkɛ la boale ye.

Papua New Guinea: Bɛyelale Alasevolɛ mɔtwɛ azua. Bɛyɛle ngyehyɛleɛ bɛzile bie bɛmanle bɛ.

Romania: Azuyilɛ zɛkyele Alasevolɛ bie mɔ azua. Bɛboale bɛ bɛmanle bɛzile bie.

Mali: Kɛmɔ ezule andɔ na bɛ aleɛ anyɛ boɛ la ati, Senegal amra hɔboale bɛ wɔ ezukoa nu.

Sierra Leone: France dɔketama mɔɔ bɛle Alasevolɛ la, vale nyile hɔboale Gyihova Alasevolɛ mɔɔ bɛde ɛleka mɔɔ konle ne zile la bie mɔ.

Thailand: Azuyilɛ ɛzɛkye ninyɛne wɔ maanzinli dɔɔnwo anu. Moalɛ ekpunli bie mɔ ɛyɛ azua 100 nee Belemgbunlililɛ Asalo 6 boɛ na bɛziezie nu.

Czech Republic: Mɔɔ azuyilɛ zɛkyele azua dɔɔnwo wɔ Czech Republic la, Alasevolɛ mɔɔ bɛwɔ Slovakia mɔɔ ɔbikye ɛkɛ la, vale ninyɛne hɔboale bɛ.

Sri Lanka: Asɛɛ bɛboa menli mɔɔ nyevile ɛzɛkye bɛ ninyɛne la bɛwie.

Sudan: Bɛvale aleɛ, adɛladeɛ, mgbɔlaboa, nee wolɔba mɔɔ bɛfa bɛtu sua zo la bɛhɔmanle Gyihova Alasevolɛ mɔɔ konle ɛmaa bɛdu bɛvi bɛ maanle nu la.

Tanzania: Azuyilɛ kpole bie vale mbusua 14 ninyɛne. Asafo mɔɔ bɛwɔ ɛkɛ la manle bɛ adɛladeɛ nee sua nu ninyɛne. Bɛzile sua ko.

Zimbabwe: Ezule ne mɔɔ andɔ la manle ɛhɔne kpole rale maanle ne ɛleka bie. Bɛvale aleɛ nee ezukoa bɛhɔmanle menli mɔɔ ɛnee hyia moalɛ la.

Burundi: Bɛva moalɛ mɔɔ ayileyɛlɛ boka nwo la bɛhɔmaa nriandivolɛma.