Wulu kɔ nuhua edwɛkɛ ne azo

Bɛdie Ngyɛnu Bulu Ɛkpɔ Ko Ɔ?

Bɛdie Ngyɛnu Bulu Ɛkpɔ Ko Ɔ?

Kyɛkyɛ, Gyihova Alasevolɛ ɛndua ngyɛnu bulu ɛkpɔ ko; yɛfa ndoboa mɔɔ vi ahonle nu mɔɔ menli mɔɔ bɛngɛlɛ bɛ aluma ye la a yɛtua yɛ gyima ne anwo kakɛ a. Duzu a le ngyɛnu bulu ɛkpɔ ko, na duzu ati a Gyihova Alasevolɛ ɛndua a?

Ɛnee ngyɛnu bulu ɛkpɔ ko ngyehyɛleɛ ne boka Mɛla mɔɔ bɛvale bɛmanle Yizilayɛma la anwo. Noko akee, Baebolo ne ka ye wienyi kɛ Keleseɛnema ɛnle Mɛla ɛhye mɔɔ ‘ngyɛnu bulu ɛkpɔ ko’ ne boka nwo la abo.​—Hibuluma 7:​5, 18; Kɔlɔsaema 2:​13, 14.

Gyihova alasevolɛ ɛmpɛ bolɛ ɛmmaa awie biala yɛɛ bɛnlielie ezukoa, emomu bɛdi neazo mɔɔ alumua Keleseɛnema ne yɛle vale boale bɛ ɛzonlenlɛ gyima ne la anzi. Bɛdua ndenle nwiɔ azo: bɛndua bɛ kakɛ wɔ edwɛkɛhanlɛ gyima ne anwo yɛɛ bɛfi bɛ ahonle nu bɛye ndoboa.

Yɛdi adehilelɛ ɛhye mɔɔ Baebolo ne fa maa Keleseɛnema la azo: “Awie biala ɛva mɔɔ yezuzu nwo wɔ ye ahonle nu la ɛmaa. Ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ, ɔluakɛ Nyamenle kulo sonla mɔɔ te ɔ nyunlu kyɛ debie la.”​—2 Kɔlentema 9:7.