Wulu kɔ nuhua edwɛkɛ ne azo

Gyihova Alasevolɛ

Kpa aneɛ Nzema

Duzu Ati A Gyihova Alasevolɛ Sia Kɔ Menli Mɔɔ Ɛlimoa Ɛha Kɛ “Me Nye Ɛnlie Nwo” La Ɛkɛ A?

Duzu Ati A Gyihova Alasevolɛ Sia Kɔ Menli Mɔɔ Ɛlimoa Ɛha Kɛ “Me Nye Ɛnlie Nwo” La Ɛkɛ A?

Ɛlɔlɛ mɔɔ Gyihova Alasevolɛ lɛ maa Nyamenle nee bɛ gɔnwo mɔ la ka bɛ maa bɛka Baebolo nu edwɛkɛ bɛkile menli kɔsɔɔti, bɔbɔ menli mɔɔ ɛlimoa ɛha kɛ “me nye ɛnlie nwo” la. (Mateyu 22:37-39) Ɛlɔlɛ mɔɔ yɛlɛ yɛmaa Nyamenle la ka yɛ maa yɛdi ɔ Ra ne mɛla mɔɔ se “yɛli ɔ nwo daselɛ bɔkɔɔ” la azo. (Gyima ne 10:42; 1 Dwɔn 5:3) Amaa yɛayɛ ɛhye la, yɛka Nyamenle edwɛkɛ ne yɛkile menli fane dɔɔnwo kɛ mɔɔ tete ngapezoma ne yɛle la. (Gyɛlɛmaya 25:4) Kɛmɔ yɛkulo yɛ gɔnwo mɔ la ati, yɛbɔ mɔdenle yɛka “Belemgbunlililɛ ne anwo edwɛkpa” mɔɔ maa ngoane la yɛkile awie biala, bɔbɔ menli mɔɔ mɔlebɛbo ne ɛnee bɛ nye ɛnlie nwo la.​—Mateyu 24:14.

Fane dɔɔnwo ne ala yɛnwu kɛ wɔ awuke mɔɔ bɛandie yɛ bɔbɔ la nu, saa yɛsia yɛkɔ ɛkɛ ne bieko a bɛtie yɛ. Suzu ninyɛne nsa ɛhye mɔ anwo:

  • Menli di tutɛnla.

  • Menli gyɛne mɔɔ wɔ sua nu ɛkɛ ne la anye die yɛ edwɛkɛ ne anwo.

  • Menli kakyi. Ninyɛne mɔɔ ɛlɛsisi ewiade anzɛɛ menli ɛbɛlabɔlɛ nu la maa bɛnwu “bɛ sunsum nu ngyianlɛ” na bɛ nye die Baebolo nu edwɛkɛ ne anwo. (Mateyu 5:3) Menli mɔɔ dwazo tia yɛ bɔbɔ la adwenle kola kakyi kɛ mɔɔ ɔdole ɛzoanvolɛ Pɔɔlo la.​—1 Timote 1:​13.

Noko akee yɛnva yɛ edwɛkɛ ne yɛtinlitinli awie mɔ anwo zo. (1 Pita 3:​15) Yɛdie yɛdi kɛ saa ɔba ye ɛzonlenlɛ nwo a, awie biala lɛ adenle si ɔ ti anwo kpɔkɛ.​—Mɛla ne 30:19, 20.