Wulu kɔ nuhua edwɛkɛ ne azo

Duzu Ati A Bɛnvɛlɛ Ɛleka Mɔɔ Bɛyia La Asɔne Ɛ?

Duzu Ati A Bɛnvɛlɛ Ɛleka Mɔɔ Bɛyia La Asɔne Ɛ?

Wɔ Baebolo ne anu, Giliki edwɛkɛkpɔkɛ mɔɔ bɛhile ɔ bo kɛ “asɔne” la gyi ɛkɛ ne maa ekpunli mɔɔ sonle Nyamenle, tɛ sua.

Yɛ neazo ɛhye nzonlɛ: Mekɛ mɔɔ ɛzoanvolɛ Pɔɔlo hɛlɛle Keleseɛnema mɔɔ bɛwɔ Wulomu la, ɔhanle kɛ ɔbiza Akoyela nee ɔ ye Pelesela na akee ɔvale ɔbokale nwo kɛ: “Mebiza asɔnema mɔɔ dahuu yia nu bɛ sua nu ɛkɛ yɛ nzɛlɛlɛ la noko ahye.” (Wulomuma 16:5) Tɛ sua ne a ɛnee Pɔɔlo ɛlɛbiza ye ahye a. Ɛnee ɔlɛbiza menli ne anzɛɛ asafo ne mɔɔ yia sua nu ɛkɛ ne la ahye. *

Yemɔti kɛ anrɛɛ yɛbavɛlɛ ɛleka mɔɔ yɛyia la asɔne la, yɛfɛlɛ ye “Belemgbunlililɛ Asalo.”

Duzu ati a bɛfɛlɛ ye “Gyihova Alasevolɛ Belemgbunlililɛ Asalo” ɛ?

Duma ɛhye fɛta ɔluakɛ:

  • Sua ne le asalo, anzɛɛ ɛleka mɔɔ yɛyia.

  • Yɛyia nu yɛsonle Gyihova, Nyamenle ne mɔɔ manle bɛhɛlɛle Baebolo ne la, yɛɛ yɛdi ɔ nwo daselɛ.​—Edwɛndolɛ 83:18; Ayezaya 43:12, New World Translation.

  • Eza yɛyia ɛkɛ ne yɛsukoa Nyamenle Belemgbunlililɛ ne mɔɔ Gyisɛse hanle nwolɛ edwɛkɛ la anwo debie.​—Mateyu 6:9, 10; 24:14; Luku 4:43.

Ɛbahola wɔahɔ Belemgbunlililɛ Asalo mɔɔ bikye wɔ la anu na wɔahɔnlea kɛzi Gyihova Alasevolɛ yɛ bɛ debiezukoalɛ ne la.

^ ɛden. 3 Bɛvale edwɛkɛkpɔkɛ ko ne ala bɛlile gyima wɔ 1 Kɔlentema 16:19; Kɔlɔsaema 4:15 yɛɛ Faelimɔn 2.