Wulu kɔ nuhua edwɛkɛ ne azo

Asoo Gyihova Alasevolɛ Le Ɛzonlenlɛ Fofolɛ Anzɛɛ Ɛzonlenlɛ Mɔɔ Anwo Yɛ Ɛzulolɛ?

Asoo Gyihova Alasevolɛ Le Ɛzonlenlɛ Fofolɛ Anzɛɛ Ɛzonlenlɛ Mɔɔ Anwo Yɛ Ɛzulolɛ?

Kyɛkyɛ, Gyihova Alasevolɛ anwo ɛnyɛ ɛzulolɛ yɛɛ bɛnle ɛzonlenlɛ fofolɛ. Emomu, yɛle Keleseɛnema mɔɔ ɛlɛbɔ mɔdenle ali Gyisɛse neazo ne anzi na yɛava ye ngilehilelɛ ne yɛabɔ ɛbɛla.

Kɛzi menli bu yɛ ɛ?

Menli dɔɔnwo lɛ adwenle ngakyile wɔ yɛ ɛzonlenlɛ ne anwo. Noko suzu adwenle nwiɔ mɔɔ menli dɔɔnwo lɛ wɔ yɛ nwo nee deɛmɔti zɛhae adwenle ne ɛnle nɔhalɛ la anwo.

  • Menli bie mɔ suzu kɛ yɛle ɛzonlenlɛ fofolɛ. Gyihova Alasevolɛ ɛnle ɛzonlenlɛ fofolɛ. Emomu, yɛbɔ mɔdenle kɛ yɛmaa yɛ ɛzonlenlɛ ne nee ɛvoyia ne mɔɔ lumua la anu Keleseɛnema ne neazo nee bɛ ngilehilelɛ nwo kɛlɛtokɛ mɔɔ wɔ Baebolo ne anu la ayɛ ko. (2 Temɔte 3:​16, 17) Yɛdie yɛdi kɛ Buluku Nwuanzanwuanza ne a ɔwɔ kɛ kile ɛzonlenlɛ mɔɔ le fofolɛ a.

  • Bie mɔ dwenle kɛ yɛlɛ sonla mɔɔ gyi yɛ ti na yɛ nwo yɛ ɛzulolɛ. Gyihova Alasevolɛ ɛnlɛ dasanli mɔɔ gyi yɛ ti a. Emomu, yɛdi edwɛkɛ mɔɔ Gyisɛse hanle hilele ye ɛdoavolɛma la azo: “Bɛ Menle kokye; yemɔ a le Kelaese ne.”​—Mateyu 23:10.