Gyihova Alasevolɛ yɛ ngyehyɛleɛ bɛ nee menli sukoa Baebolo ne na bɛdua zo bɛbua bɛ kpuyia ngakyile mɔɔ le kɛ:

  • Nwane a le Nyamenle?

  • Asoo Nyamenle dwenle me nwo?

  • Kɛ ɔkɛyɛ na me agyalɛ ayɛ kpalɛ ɛ?

  • Kɛ ɔkɛyɛ na me nye alie wɔ ɛbɛlabɔlɛ nu ɛ?

Ɛbanwu yɛ Babolo ɛzukoalɛ ngyehyɛleɛ ne anwo kpuyia mɔɔ bɛta bɛbiza la anwo mualɛ wɔ ɔ bo ɛke.

Kɛzi bɛsukoa ye ɛ? Yɛkpa edwɛkɛ mɔɔ le kɛ “Nyamenle” anzɛɛ “agyalɛ” na yɛanlea Baebolo nu tɛkese bie mɔ mɔɔ fane nwolɛ la. Saa yɛfa tɛkese ne mɔ yɛtoto nwo a, ɔmaa yɛnwu mɔɔ Baebolo ne ka ye wɔ edwɛkɛ ne anwo la, yemɔti yɛmaa Baebolo mumua ne kilehile edwɛkɛ ne anu.

Duzu A Baebolo ne Kilehile Amgba A? buluku ne boa maa yɛte Baebolo ne abo. Buluku ɛhye kilehile ninyɛne dɔɔnwo anu na ɔmaa yɛnwu mɔɔ Baebolo ne ka ye wɔ Nyamenle, Gyisɛse nee yɛ kenlebie anwo la.

Bɛtua Baebolo ɛzukoalɛ ne anwo ezukoa ɔ? Bɛndua ezukoa biala yɛɛ bɛndɔne mbuluku mɔɔ bɛfa bɛsukoa la.

Kɛzi debiezukoalɛ ne tendenle de ɛ? Bie mɔ kpa dɔnehwele kɛyɛ ko dapɛne biala na bɛ nee yɛ sukoa debie. Noko awie ko biala kola kile mekɛ tendenle mɔɔ ɔkulo kɛ bɛ nee ye sukoa la. Wɔ ngyehyɛleɛ ne a bahile a.

Saa mekulo kɛ bɛ nee me sukoa Baebolo ne a, duzu a bɛbayɛ a? Saa ɛkile kɛ bɛ nee wɔ ɛrazukoa Baebolo ne a, Gyihova Alasevolɛ ne mɔ anu ko bara wɔ ɛkɛ wɔ mekɛ nee ɛleka mɔɔ ɔle kpalɛ ɔmaa wɔ la. Ɔbava mekɛ ekyi yeahile wɔ kɛzi yɛ nee menli sukoa debie la. Saa ɛkulo a, bɛbahola bɛadoa zo.

Saa meka kɛ bɛ nee me ɛrazukoa a, ɔwɔ kɛ meyɛ Gyihovanli ɔ? Kyɛkyɛ. Gyihova Alasevolɛ anye die nwo kɛ bɛbahilehile menli Baebolo ne, noko yɛntinlitinli awie mɔ anwo zo kɛ bɛraboka yɛ ɛzonlenlɛ ne anwo. Emomu, yɛfi ɛbulɛ nu yɛkile menli edwɛkɛ mɔɔ Baebolo ne ka la, ɔluakɛ yɛze kɛ awie ko biala lɛ adenle kpa kɛ ɔbalie yeali anzɛɛ ɔnrɛlie ɔnrɛli.—1 Pita 3:15, 16.