Wulu kɔ nuhua edwɛkɛ ne azo

Duzu Ati A Bɛnli Bolonyia A?

Duzu Ati A Bɛnli Bolonyia A?

Adwenle mɔɔ ɛndenrɛ

Adalɛ edwɛkɛ: Gyihova Alasevolɛ ɛnli Bolonyia ɔluakɛ bɛnlɛ diedi wɔ Gyisɛse anu.

Nɔhalɛ edwɛkɛ: Yɛle Keleseɛnema. Yɛdie yɛdi kɛ ɔlua Gyisɛse Kelaese anwo zo ala a yɛbanyia ngoane a.—Gyima ne 4:12.

Adalɛ edwɛkɛ: Bɛmaa mgbakyemgbakyenu ba mbusua nu ɔlua nuhua menli mɔɔ bɛkilehile bɛ kɛ bɛmmadi Bolonyia la azo.

Nɔhalɛ edwɛkɛ: Yɛdwenle mbusua nwo kpalɛ na yɛdua Baebolo ne azo yɛboa yɛmaa mbusua nwo yɛ se.

Adalɛ edwɛkɛ: “Bolonyia sunsum” ne mɔɔ maa bɛda ahunlunyele nee anzondwolɛ ali bɛkile menli la bɛnnyia ye.

Nɔhalɛ edwɛkɛ: Yɛbɔ mɔdenle kɛ yɛbala ahunlunyele ali, na yɛ nee menli adɛnla anzondwolɛ nu mekɛ biala. (Mrɛlɛbulɛ 11:25; Wulomuma 12:18) Kɛ neazo la, kɛzi yɛyɛ yɛ ayia ne mɔ nee edwɛkɛhanlɛ gyima ne la nee Gyisɛse adehilelɛ le ko: “Bɛnyia ye mgbane, yemɔti bɛva bɛmaa mgbane mɔɔ bɛnlie ɛhwee a.” (Mateyu 10:8.) Bieko, yɛtwe adwenle yɛsie Nyamenle Belemgbunlililɛ ne azo kɛ yemɔ a le anyelazo kokye mɔɔ bava anzondwolɛ ara azɛlɛ ye azo a.—Mateyu 10:7.

Duzu ati a Gyihova Alasevolɛ ɛnli Bolonyia a?

  • Gyisɛse hanle kɛ yɛhakye ye ewule ne, tɛ ye awolɛ kenle.—Luku 22:19, 20.

  • Gyisɛse ɛzoanvolɛ ne mɔ nee alumua ɛdoavolɛma ne mɔ anli Bolonyia. The New Catholic Encyclopedia ka kɛ “bɛvale Kelaese awolɛ ne anwo ɛvoyialilɛ ne bɛziele ɛkɛ wɔ ɛvolɛ 243 Y.M,” mekɛ mɔɔ ɛnee ɛzoanvolɛ mɔɔ li awieleɛ la ɛwu na ɛvolɛ dɔɔnwo ɛpɛ nu la.

  • Daselɛ biala ɛnle ɛkɛ mɔɔ kile kɛ bɛwole Gyisɛse wɔ December 25 a; ye awolɛ kenle nwo kɛlɛtokɛ ɛnle Baebolo ne anu.

  • Yɛdie yɛdi kɛ Nyamenle ɛnlie Bolonyia ɛlile ɛndo nu ɔluakɛ ye amaamuo nee ye nyɛleɛ ne vi awozonle ɛzonlenlɛ nu.—2 Kɔlentema 6:17.

Duzu ati a bɛmaa Bolonyia ɛlilɛ gyegye bɛ a?

Menli dɔɔnwo di Bolonyia ɔwɔ nuhua kɛ bɛnwu ye kɛ ɔvi awozonle ɛzonlenlɛ nu, na eza Baebolo ne ɛnvua zo la. Menli ɛhye mɔ bahola abiza kɛ: Duzu ati a ɔwɔ kɛ Keleseɛnema kpo deɛ ɛhye mɔɔ menli dɔɔnwo kulo la ɛ? Duzu ati a bɛmaa ɔgyegye bɛ a?

Baebolo ne si yɛ adua kɛ yɛmmadi awie mɔ adwenle nzi na yɛva ‘adwenle kpalɛ’ yɛzonle. (Wulomuma 12:1, 2) Ɔkile yɛ kɛ yɛmaa nɔhalɛ ne ɛzonle bolɛ ɛmaa yɛ. (Dwɔn 4:23, 24) Mekɛ mɔɔ yɛlɛ ɛhulolɛ kɛ yɛbanwu kɛzi menli bu yɛ la, yɛfa Baebolo ngyinlazo yɛyɛ gyima saa menli anye ɛnrɛlie yɛ nwo bɔbɔ a.

Ɔwɔ nuhua kɛ yɛnli Bolonyia ɛdeɛ, noko yɛze kɛ awie biala lɛ adenle si edwɛkɛ ɛhye anwo kpɔkɛ. Yɛnzi menli mɔɔ di Bolonyia la adenle.